ନନ୍ଦିଘୋଷ ବ୍ୟୁରୋ : ସଂସଦରେ ଆଗତ ୧୩୧ ତମ ସମ୍ବିଧାନ ସଂଶୋଧନ ବିଲ୍ ଓଡ଼ିଶାର ସ୍ୱାର୍ଥ ବିରୋଧୀ ବୋଲି ବିଜୁ ଜନତା ଦଳର ସଭାପତି ଓ ବିରୋଧୀ ଦଳ ନେତା ନବୀନ ପଟ୍ଟନାୟକ କହିଛନ୍ତି। ଦଳମତ ନିର୍ବିଶେଷରେ ଜାତୀୟ ସ୍ତରରେ ଓଡ଼ିଶାର ସମ୍ମାନ ଓ ସ୍ୱାର୍ଥ ରକ୍ଷା ପାଇଁ ସମସ୍ତ ସାଂସଦଙ୍କୁ ଏକଜୁଟ ହୋଇ ବିରୋଧ କରିବାକୁ ସେ ଆହ୍ୱାନ ଦେଇଛନ୍ତି । ଆଜି ରାଜ୍ୟର ସମସ୍ତ ସାଂସଦଙ୍କୁ ଚିଠି ଲେଖି ନବୀନ ପଟ୍ଟନାୟକ କହିଛନ୍ତି ଯେ, ସଂସଦରେ ଆଗତ ୧୩୧ ତମ ସମ୍ବିଧାନ ସଂଶୋଧନ ବିଲ୍କୁ ଆମେ ସମର୍ଥନ କରିବୁ ଯଦି ଲୋକସଭାରେ ଓଡ଼ିଶାର ପ୍ରତିନିଧିତ୍ୱ ପ୍ରଭାବିତ ନ ହୁଏ। ପ୍ରସ୍ତାବିତ ବିଲ୍ ଉଦ୍ଦିଷ୍ଟ ଆଭିମୁଖ୍ୟକୁ ବିରୋଧ କରୁଛି ବୋଲି ସେ ଦର୍ଶାଇଛନ୍ତି।ନବୀନ ପଟ୍ଟନାୟକ କହିଛନ୍ତି, “ନାରୀ ସଂରକ୍ଷଣ ପ୍ରସଙ୍ଗକୁ ସୀମା ପୁନଃ ନିର୍ଦ୍ଧାରଣ ସହ ଯୋଡ଼ି ନ ଦେଇ ପୃଥକ ଭାବେ କେନ୍ଦ୍ର ସରକାର ଆଣିବା ଉଚିତ୍। ନାରୀ ସଶକ୍ତିକରଣ ଓ ଜନପ୍ରତିନିଧି ବ୍ୟବସ୍ଥାରେ ମହିଳାଙ୍କ ପ୍ରତିନିଧିତ୍ୱକୁ ବିଜେଡି ସମର୍ଥନ କରି ଆସୁଛି। ମହିଳାଙ୍କୁ ସଂସଦ ଓ ବିଧାନସଭାରେ ପ୍ରତିନିଧିତ୍ୱ ପାଇଁ ଆସନ ସଂରକ୍ଷିତ ରଖିବା ବ୍ୟବସ୍ଥା ସମୟୋପଯୋଗୀ ଏବଂ ଏହାର ଆବଶ୍ୟକତା ମଧ୍ୟ ରହିଛି। ମୁଁ ବ୍ୟକ୍ତିଗତ ଭାବେ ଏହାକୁ ଦୃଢ଼ ଭାବେ ସମର୍ଥନ କରେ।”ସେ ଆହୁରି କହିଛନ୍ତି, “ବିଜୁ ବାବୁ ପଞ୍ଚାୟତିରାଜ ବ୍ୟବସ୍ଥାରେ ୩୩ ପ୍ରତିଶତ ମହିଳା ସଂରକ୍ଷଣ କରି ଦେଶରେ ପ୍ରଥମ ରାଜ୍ୟ ଭାବେ ଓଡ଼ିଶାକୁ ପରିଚିତ କରାଇଥିଲେ। ବିଜୁ ଜନତା ଦଳ ନାରୀ ଶକ୍ତି ବନ୍ଦନ ଅଧିନିୟମ ୨୦୨୩କୁ ମଧ୍ୟ ସମର୍ଥନ କରିଥିଲା। କିନ୍ତୁ ସମ୍ପ୍ରତି ସଂସଦରେ ଆଗତ ସମ୍ବିଧାନ ସଂଶୋଧନ ବିଧେୟକରେ ସ୍ପଷ୍ଟତା ନ ଥିବାରୁ ଏହା ଆମ ପାଇଁ ଚିନ୍ତାର କାରଣ ପାଲଟିଛି।”
ନବୀନ ପଟ୍ଟନାୟକ କହିଛନ୍ତି ଯେ, ଲୋକସଭାର ମୋଟ ଆସନର ୩.୯ ପ୍ରତିଶତ ଓଡ଼ିଶା ପ୍ରତିନିଧିତ୍ୱ କରୁଛି, ଯାହା ୨୧ଟି ଆସନରେ ସୀମିତ। ସୀମାପୁନଃନିର୍ଦ୍ଧାରଣ ବିଲ୍ ପାରିତ ହେଲେ ଏହି ଆସନ ସଂଖ୍ୟା ୨୯ ହେବ ସତ୍ୟ, କିନ୍ତୁ ମୋଟ ଆସନର ପ୍ରତିଶତ ହ୍ରାସ ପାଇ ୩.୪ ପ୍ରତିଶତ ହୋଇଯିବ। ଏହା ଲୋକସଭାରେ ରାଜ୍ୟର ସ୍ୱରକୁ ଦୁର୍ବଳ କରିବ। ଦୁର୍ବିପାକ ପରିଚାଳନା, ଜନଜାତି କଲ୍ୟାଣ, ଆଞ୍ଚଳିକ ବିକାଶ ଭଳି ରାଜ୍ୟ ସ୍ୱାର୍ଥ ସମ୍ବଳିତ ପ୍ରସଙ୍ଗଗୁଡ଼ିକ ଜାତୀୟ ସ୍ତରରେ ଉପେକ୍ଷିତ ହେବ ବୋଲି ସେ ଚିନ୍ତା ପ୍ରକାଶ କରିଛନ୍ତି।ଏହା କେବଳ ଏକ ରାଜନୈତିକ ପ୍ରସଙ୍ଗ ନୁହେଁ, ବରଂ ସଂଘୀୟ ବ୍ୟବସ୍ଥାରେ ଅସନ୍ତୁଳନ ସୃଷ୍ଟି କରିବ ବୋଲି ନବୀନ କହିଛନ୍ତି। ସଂସଦରେ ପ୍ରତିନିଧିତ୍ୱ ରାଜ୍ୟ ପାଇଁ କେବଳ ଏକ ସଂଖ୍ୟା ନୁହେଁ, ଏହା ଓଡ଼ିଆ ଅସ୍ମିତା ଓ ପ୍ରତ୍ୟେକ ଓଡ଼ିଆଙ୍କ ଆଶା-ଆକାଂକ୍ଷାର ପ୍ରତୀକ।ସେ ଆହୁରି କହିଛନ୍ତି ଯେ, ଭାରତରେ ଜନସଂଖ୍ୟା ନିୟନ୍ତ୍ରଣ ଓ ମାନବ ସମ୍ବଳ ବିକାଶ କ୍ଷେତ୍ରରେ ଓଡ଼ିଶା ଅଗ୍ରଣୀ ଭୂମିକା ଗ୍ରହଣ କରିଛି। କିନ୍ତୁ ଜନସଂଖ୍ୟା ଆଧାରିତ ସୀମା ପୁନଃ ନିର୍ଦ୍ଧାରଣ ପ୍ରକ୍ରିୟାରେ ରାଜ୍ୟର ସ୍ୱାର୍ଥ ବଳି ପଡ଼ୁଛି। ଜନସଂଖ୍ୟା ବହୁଳ ରାଜ୍ୟଗୁଡ଼ିକ ଏଥିରୁ ଅଧିକ ଫାଇଦା ପାଇବେ ଏବଂ କେନ୍ଦ୍ରୀୟ ଅନୁଦାନ ଓ ଯୋଜନାର ସୁଫଳ ସେମାନଙ୍କୁ ଅଧିକ ମିଳିବ, ଅପରପକ୍ଷେ ଓଡ଼ିଶା ବଞ୍ଚିତ ହେବ।ନବୀନ ପଟ୍ଟନାୟକ ସମସ୍ତ ସାଂସଦଙ୍କୁ ଅର୍ଥନୈତିକ ଓ ରାଜନୈତିକ ଭବିଷ୍ୟତକୁ ଦୃଷ୍ଟିରେ ରଖି ଦଳମତ ନିର୍ବିଶେଷରେ ଓଡ଼ିଶାର ସ୍ୱାର୍ଥ ପାଇଁ ସ୍ୱର ଉଠାଇବାକୁ ଆହ୍ୱାନ ଦେଇଛନ୍ତି। ଯଦି ଓଡ଼ିଶାର ନ୍ୟାୟୋଚିତ ଦାବି ପ୍ରତି କର୍ଣ୍ଣପାତ କରା ନଯାଏ, ତେବେ ବିଜୁ ଜନତା ଦଳ ଏହି ପ୍ରସଙ୍ଗରେ ଲୋକଙ୍କ ପାଖକୁ ଯିବ ବୋଲି ସେ ସ୍ପଷ୍ଟ କରିଛନ୍ତି
