ମଧୁମେୟ ରୋଗୀଙ୍କ ପାଇଁ ଖୁସି ଖବର; ଏଣିକି ପ୍ରତିଦିନ ବଦଳରେ ସପ୍ତାହକୁ ଥରେ ନେବେ ଇନସୁଲିନ
ନନ୍ଦିଘୋଷ ବ୍ୟୁରୋ: ମେଡିକାଲ ଜଗତରେ ମାଇଲଖୁଣ୍ଟ । ବିଶେଷ କରି ମଧୁମେୟ ରୋଗୀଙ୍କ ପାଇଁ ଖୁସି ଖବର । ବିଶ୍ବର ପ୍ରଥମ ଥର ଲାଗି ଭାରତରେ ଆରମ୍ଭ ହେଲା ସପ୍ତାହକୁ ଥରେ ନିଆଯାଇପାରୁଥିବା ଇନସୁଲିନ । ନୋଭୋ ନର୍ଡିସ୍କ ପକ୍ଷରୁ ଲଞ୍ଚ ହୋଇଛି ଅବିକ୍ଲି । ମଧୁମେହରେ ପୀଡ଼ିତ ବ୍ୟକ୍ତିଙ୍କ ଲାଗି ଏହା ବରଦାନ ସଦୃଶ ହୋଇଛି । ଡାଏବେଟିସରେ ପୀଡ଼ିତ ରୋଗୀଙ୍କୁ ବାରମ୍ବାର ଇଞ୍ଜେକସନ ନେବାରୁ ବର୍ତ୍ତମାନ ମିଳିଛି ମୁକ୍ତି । ଡେନମାର୍କର ଔଷଧ ନିର୍ମାତା ନୋଭୋ ନର୍ଡିସ୍କ ପକ୍ଷରୁ ଅବିକ୍ଲି ବା ଇନସୁଲିନ କୋଡେକ ଲଞ୍ଚ ହୋଇଛି । ଟାଇପ-୧ ଓ ଟାଇପ-୨ ଡାଏବେଟିସ ଲାଗି ଏହା ବ୍ୟବହୃତ ହେବ । ଫଳରେ ବର୍ଷ ସାରା ଇନସୁଲିନ ନେଉଥିବା ବ୍ୟକ୍ତିମାନେ ଏଣିକି ମାତ୍ର ୫୨ଟି ଇଞ୍ଜେକସନ ନେବେ ।
ରକ୍ତ ଶର୍କରା ନିୟନ୍ତ୍ରଣ କରିବାରେ ଇନସୁଲିନ ପରି ଏକ ହରମୋନ ଜରୁରୀ ହୋଇଥାଏ । ଟାଇପ-୧ ଓ ଟାଇପ-୨ ଡାଏବେଟିସରେ ପୀଡ଼ି ରୋଗୀମାନେ ସାଧାରଣତଃ ଦୈନିକ ଇଞ୍ଜେକସନ ନେଇଥାନ୍ତି । ମାତ୍ର ବର୍ତ୍ତମାନ ସେମାନେ ଏହି ଯନ୍ତ୍ରଣାରୁ ମୁକ୍ତି ପାଇବେ । ଏହି ନୂଆ ଇଞ୍ଜେକନ ଯୋଗୁଁ ଭାରତରେ ଦେଖାଦେଉଥିବା ଅନେକ ସମସ୍ୟାର ଦୂର ହୋଇପାରିବ ଓ କୋଟି କୋଟି ରୋଗୀ ଉପକୃତ ହେବେ ।
ସୂଚନାଯୋଗ୍ୟ, ଅନେକ ରୋଗୀ ଡାଏବେଟିସ ନିୟନ୍ତ୍ରଣ ଲାଗି ଦୈନିକ ୧୦ ୟୁନିଟ ଇନସୁଲିନ ନେଇଥାନ୍ତି । ଅର୍ଥାତ ସାପ୍ତାହିକ ୭୦ ୟୁନିଟ ନେଇଥାନ୍ତି । ଫଳରେ ସେମାନଙ୍କୁ ସାପ୍ତାହିକ ୨୬୧ ଟଙ୍କା ଖର୍ଚ୍ଚ କରିବାକୁ ପଡ଼ିଥାଏ । ମାତ୍ର ବର୍ତ୍ତମାନ ରୋଗୀମାନେ ଉପକୃତ ହେବା ଆଶା ରହିଛି । ଦେଶରେ ୧୦ କୋଟି ୧୦ ଲକ୍ଷ ଲୋକ ମଧୁମେହରେ ପୀଡ଼ିତ ଅଛନ୍ତି । ୧୩ କୋଟି ୬୦ ଲକ୍ଷ ଲୋକ ପ୍ରିଡାଏବେଟିସରେ ପୀଡ଼ିତ । ଟାଇପ-୧ ଡାଏବେଟିସରେ ୯ ଲକ୍ଷ ଲୋକ ପୀଡ଼ିତ ।
