ନନ୍ଦିଘୋଷ ବ୍ୟୁରୋ : ତାଣ୍ଡବ ରଚିଲା ପ୍ରକୃତି । ମହାବିନାଶକ ବନ୍ୟା ନେଇଗଲା ଅନେକଙ୍କ ମୁଣ୍ଡ । ଛାରଖାର ହୋଇଗଲା ବାସ, ଧୋଇ ନେଇଗଲା ସହର । ମାଟିତଳୁ ଏବେବି ଦବି ରହିଛି କୁଢ଼କୁଢ଼ ଶବ । ନେପାଳ ଓ ତିବ୍ବତ ସୀମରେ ଘଟିଥିବା ସେହି ପ୍ରଳୟଙ୍କରୀ ବନ୍ୟା ବିଭୀଷିକା ସାରା ବିଶ୍ବକୁ ଦୋହଲାଇ ଦେଇଛି । ଜୀବନ-ମୃତ୍ୟୁ ସହ ଅନେକ ଲୋକ ସଂଘର୍ଷ କରୁଥିବା ବେଳେ ସେହି ମହାପ୍ରଳୟରୁ ଜୀବନ ନେଇ ଫେରିଛନ୍ତି ବାରିପଦା ପୌରାଞ୍ଚଳ ୨୩ ନମ୍ବର ୱାର୍ଡ, ନାଥ ସାହିର ୨୦ ବର୍ଷୀୟା ମେହେନ୍ଦୀ ଆର୍ଟିଷ୍ଟ କୁଲସୁମ ନିଗାର । ପ୍ରଳୟ ସ୍ଥଳରୁ ପ୍ରାୟ ୪ଶହ କିଲୋମିଟର ଦୂରରେ ଥିବାରୁ ଏବଂ ନେଟୱାର୍କ ନଥିବାରୁ କୁଲସୁମ ବାହାର ଦୁନିଆର ସ୍ଥିତି ବାବଦରେ କିଛି ଜାଣିପାରି ନଥିଲେ। ପରେ ନେଟୱାର୍କ ଆସିବା କ୍ଷଣି ପରିସ୍ଥିତିର ଗମ୍ଭୀରତା ବୁଝି ପାରିଥିଲେ। ଶେଷରେ ନେପାଳ ପ୍ରଶାସନ ଓ ସ୍ଥାନୀୟ ପୋଲିସର ସହାୟତାରେ ସେ ସୁରକ୍ଷିତ ଭାବେ ଭାରତ ଫେରି ଆସିଛନ୍ତି । ନିଜ ଭିଟାମାଟିରେ ପହଞ୍ଚିବା ପରେ ନନ୍ଦିଘୋଷ ଟିଭି ଆଗରେ ବଖାଣିଛନ୍ତି ସେହି ଭୟାନକ ଅନୁଭୂତି ।
ଗତ ୨୧ ତାରିଖରେ ନିଜ ୧୦ ଜଣ ସାଙ୍ଗଙ୍କ ସହ ସେ ବୁଲିବା ପାଇଁ ନେପାଳର ପୋଖରା ଅଞ୍ଚଳକୁ ଯାଇଥିଲେ କୁଲସୁମ । ହେଲେ ସେଠାରେ ପହଞ୍ଚିବା ପରେ ଆରମ୍ଭ ହୋଇଯାଇଥିଲା ପ୍ରକୃତିର ମହା ତାଣ୍ଡବ । ପାହାଡ଼ିଆ ଅଞ୍ଚଳରେ ଟ୍ରେକିଂ ବେଳେ ମୋବାଇଲ ନେଟୱାର୍କ ସମ୍ପୂର୍ଣ୍ଣ ଠପ୍ ହୋଇଯାଇଥିଲା । ଯୋଗାଯୋଗ ବିଚ୍ଛିନ୍ନ ହେବା ପରେ ଆତଙ୍କିତ ହୋଇପଡ଼ିଥିଲେ ତାଙ୍କ ପରିବାର । ଭାରତୀୟ ଦୂତାବାସ, ପୋଖରା ପୋଲିସ ଓ ଓଡ଼ିଶା ପ୍ରଶାସନ ନିକଟରେ ଝିଅକୁ ଉଦ୍ଧାର କରିବା ପାଇଁ ଆକୁଳ ନିବେଦନ କରିଥିଲେ । ଝିଅ ସୁରକ୍ଷିତ ଥିବା ମେସେଜ୍ ଆସିବା ପରେ ବାପା-ମାଆଙ୍କ ଆଖିରୁ ଖୁସିର ଲୁହ ଝରିପଡ଼ିଥିଲା । ଏହି ସଙ୍କଟ ସମୟରେ ସହଯୋଗ କରିଥିବାରୁ ଓଡ଼ିଶା ସରକାର, ନେପାଳ ପ୍ରଶାସନ ଏବଂ ନନ୍ଦିଘୋଷ ଟିଭିକୁ କୃତଜ୍ଞତା ଜଣାଇଛି ପରିବାର ।
ଝିଅ ଫେରିଥିବାରୁ ପରିବାରରେ ଖୁସି ଫେରିଛି । ହେଲେ ନେପାଳରେ ଏବେ ବି ଫସି ରହିଛନ୍ତି ଅନେକ ଓଡ଼ିଆ । ସେମାନଙ୍କ ସୁରକ୍ଷିତ ପ୍ରତ୍ୟାବର୍ତ୍ତନ ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି କୁଲସୁମ ଓ ତାଙ୍କ ପରିବାର ।
