ନନ୍ଦିଘୋଷ ବ୍ୟୁରୋ : ପାର୍ବଣ ପୂର୍ବରୁ ରାଜଧାନୀରେ ଚୋରା ମଦ ରାକେଟ ଉପରେ ଅବକାରୀ ବିଭାଗର ବଡ଼ ଧରଣର ଚଢ଼ାଉ। ରାଜଧାନୀର ଏକାଧିକ ସ୍ଥାନରେ ଚଢ଼ାଉ କରି ବିପୁଳ ପରିମାଣର ଦେଶୀ ମଦ ଜବତ କରିଛି ଅବକାରୀ ବିଭାଗ। ସ୍କର୍ପିଓ, ଥାର୍, ସାଣ୍ଟ୍ରୋ ଓ ୱାଗନର୍ ଭଳି ଗାଡ଼ିରେ ଦେଶୀ ମଦ ଚାଲାଣ ହେଉଥିବା ଜଣାପଡ଼ିଛି।
ଚାଲାଣ ହେଉଥିବା ଗାଡ଼ିଗୁଡ଼ିକୁ ବନ୍ଧୁକଧାରୀମାନେ ବାଇକ୍ରେ ଏସ୍କର୍ଟ ଦେଉଥିଲେ। ନକଲି ନମ୍ବର ପ୍ଲେଟ୍ ଲଗାଇ ମାଫିଆମାନେ ଏହି ମଦ ଚାଲାଣ କରୁଥିବା ସୂଚନା ମିଳିଛି। କାରଗୁଡ଼ିକୁ ପିଛା କରି ଅବକାରୀ ବିଭାଗ ଧରିଥିବା ବେଳେ ୭ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ଚଢ଼ାଉ ବେଳେ ବନ୍ଧୁକ ସହ ୩ଟି ବାଇକ୍, ମଦ ତିଆରି ମେସିନ୍, ବିପୁଳ ପରିମାଣର ଦେଶୀ ମଦ, ବୋତଲ ଏବଂ ବିଭିନ୍ନ ନକଲି ସାମଗ୍ରୀ ଜବତ କରାଯାଇଛି। ଆଗକୁ ପାର୍ବଣ ଋତୁ ଆସୁଥିବାରୁ ରାଜଧାନୀରେ ମଦ ବେପାର ପାଇଁ ଏହି ଚୋରା ମଦ ଆଣାଯାଉଥିବା ଜଣାପଡ଼ିଛି। ଆଗାମୀ ଦିନରେ ଏଭଳି ଚଢ଼ାଉକୁ ଆହୁରି ବ୍ୟାପକ କରାଯିବ ବୋଲି ଅବକାରୀ ସୁପରିଣ୍ଟେଣ୍ଡେଣ୍ଟ ସୂଚନା ଦେଇଛନ୍ତି।
