ନନ୍ଦିଘୋଷ ବ୍ୟୁରୋ : ଆସୁଛନ୍ତି ଗଜାନନ। ଗଣେଶ ପୂଜାରୁ ଆରମ୍ଭ ହେବ ପାର୍ବଣ ଋତୁ। ଏଥିପାଇଁ ସାରା ରାଜ୍ୟରେ ଚାଲିଛି ଜୋରସୋର ପ୍ରସ୍ତୁତି। କାରିଗରଙ୍କ ରଙ୍ଗ ଓ ତୂଳୀର ସ୍ପର୍ଶରେ ଏବେ ଶେଷ ରୂପ ପାଉଛନ୍ତି ପ୍ରଭୁ ଗଜାନନ। ମୂର୍ତ୍ତି ନିର୍ମାଣ କାରିଗରଙ୍କ ଗାଁ ଭାବେ ପରିଚିତ ଖୋର୍ଦ୍ଧା ଜିଲ୍ଲା ଜଟଣୀ କୁଦିଆରୀ ଗାଁରେ ଦିନରାତି ଚାଲିଛି ମୂର୍ତ୍ତି ନିର୍ମାଣ କାମ। ଗଣେଶ ପୂଜାକୁ ଆଉ ଅଳ୍ପଦିନ ଥିବାରୁ କାରିଗରମାନେ ଦିନରାତି ଏକ କରି ମୂର୍ତ୍ତି ନିର୍ମାଣରେ ଲାଗିପଡ଼ିଛନ୍ତି। କୁଦିଆରୀରେ ତିଆରି ହେଉଥିବା ଗଣେଶ ମୂର୍ତ୍ତିର ରହିଛି ବେଶ୍ ଚାହିଦା। ମୂର୍ତ୍ତି କିଣିବା ପାଇଁ ଗ୍ରାହକଙ୍କ ଭିଡ଼ ମଧ୍ୟ ଜମୁଛି। ହେଲେ ଦିନରାତି ପରିଶ୍ରମ କରୁଥିଲେ ମଧ୍ୟ ସେହି ଅନୁପାତରେ ପାଉଣା ମିଳୁନଥିବା କହିଛନ୍ତି କାରିଗର। ସେପଟେ ପାର୍ବଣ ଋତୁ ପାଇଁ ଚଳଚଞ୍ଚଳ ହୋଇପଡ଼ିଛି ଯାଜପୁର ଜିଲ୍ଲା ବିଞ୍ଝାରପୁର ଅଞ୍ଚଳ। ମୂର୍ତ୍ତି ନିର୍ମାଣ କାମ ଏବେ ଶେଷ ପର୍ଯ୍ୟାୟରେ ପହଞ୍ଚିଛି। ଚଳିତବର୍ଷ ଏଠାରେ ଦେଖିବାକୁ ମିଳିବ ମୁମ୍ବାଇ ଓ ହାଇଦ୍ରାବାଦ ଶୈଳୀର ଆକର୍ଷଣୀୟ ଗଣେଶ ମୂର୍ତ୍ତି।
ଏଭଳି ଭିନ୍ନ ଭିନ୍ନ ଡିଜାଇନର ମୂର୍ତ୍ତି ନିର୍ମାଣ କରି ଏବେ ଚର୍ଚ୍ଚାରେ ସିଂହପୁର ଅଞ୍ଚଳର ଯୁବ କାରିଗର ପାର୍ଥସାରଥୀ ବେହେରା। ତାଙ୍କ ହାତରେ ରୂପ ନେଇଛି ମୁମ୍ବାଇର ପ୍ରସିଦ୍ଧ ଲାଲବାଗଚା ରାଜାଙ୍କ ସମେତ ବାଲ ଗଣେଶ, ମୟୂରେଶ୍ୱର ଗଣେଶ, ବକ୍ରତୁଣ୍ଡ ଗଣେଶ, ରାଜା ଗଣେଶ ଓ ସିଦ୍ଧିବିନାୟକଙ୍କ ଭଳି ଅନେକ ଡିଜାଇନର ମୂର୍ତ୍ତି। ପାର୍ଥସାରଥୀ ଏପର୍ଯ୍ୟନ୍ତ ୫୦ରୁ ଊର୍ଦ୍ଧ୍ୱ ଗଣେଶ ମୂର୍ତ୍ତି ନିର୍ମାଣ କରିସାରିଛନ୍ତି। ତେବେ ସେଥିମଧ୍ୟରୁ ଶଙ୍କର ଗଣେଶ ଓ ଦଗଡୁଶେଠ ଗଣେଶ ମୂର୍ତ୍ତି ଗ୍ରାହକଙ୍କୁ ବେଶ୍ ଆକର୍ଷିତ କରୁଛି। ଏହି ମୂର୍ତ୍ତିଗୁଡ଼ିକୁ ନେବା ପାଇଁ ଗ୍ରାହକଙ୍କ ଭିଡ଼ ଜମିବାରେ ଲାଗିଛି। କାରିଗରଙ୍କ ହାତରେ ଶେଷ ସ୍ପର୍ଶ ପାଉଥିବା ଗଜାନନଙ୍କ ମୂର୍ତ୍ତି ଏବେ ପୂଜାମଣ୍ଡପରେ ବିରାଜିବାକୁ ପ୍ରସ୍ତୁତ। ଗଣେଶ ପୂଜାକୁ ନେଇ ଚାରିଆଡ଼େ ଉତ୍ସାହ ଓ ଉଦ୍ଦୀପନାର ମାହୋଲ।
