ଗଞ୍ଜାମ: ବନ୍ୟା ଆସିଲା, ଆଉ ଆଖି ପିଛୁଳାକେ ଉଜାଡ଼ିଦେଲା ସୁନାର ସଂସାର। କାହାର ଘର ଭାଙ୍ଗିଗଲା ତ ଆଉ କାହାର ଜୀବିକା ଛଡ଼ାଇନେଲା ବନ୍ୟାର ପ୍ରଖର ସ୍ରୋତ। ଏବେ ମୁଣ୍ଡ ଉପରେ ଛାତ ନାହିଁ କି ହାତରେ ରୋଜଗାରର ମାଧ୍ୟମ ନାହିଁ । ଋଷିକୂଲ୍ୟା ନଦୀର ପ୍ରଳୟଙ୍କରୀ ବନ୍ୟାରେ ଛାରଖାର ହୋଇଯାଇଛି ଗଞ୍ଜାମ ଜିଲ୍ଲା ଧରାକୋଟ ବ୍ଲକର ଜାହାଡ଼ା ଗାଁ। ଜୀବନ ବଞ୍ଚାଇବାକୁ ଘର ଛାଡ଼ିଥିବା ଲୋକେ ଏବେ ସର୍ବସ୍ୱ ହରାଇ ଅସହାୟ ହୋଇପଡ଼ିଛନ୍ତି।
ଏହି ବନ୍ୟା ବିପତ୍ତି ଭିତରେ ସବୁଠୁ ଦୁଃଖଦ କାହାଣୀ ହେଉଛି ୮୦ ବର୍ଷୀୟା ଦୃଷ୍ଟିବାଧିତ ବୃଦ୍ଧା ଚନ୍ଦ୍ରମା ସ୍ୱାଇଁଙ୍କର। ତିନି ଝିଅଙ୍କ ବିବାହ ପରେ ସାନ ଝିଅ ଶୈଳଙ୍କ ସହ ଏକ ଛୋଟ ଘରେ ରହୁଥିଲେ ଚନ୍ଦ୍ରମା। ଘର ବାରଣ୍ଡାରେ ଥିଲା ଏକ ଛୋଟିଆ ଦୋକାନ। ସେହି ଦୋକାନରୁ ଯାହା ରୋଜଗାର ହେଉଥିଲା, ସେଥିରେ ମାଆ ଝିଅ ଚଳୁଥିଲେ । ହେଲେ ବନ୍ୟା ମାଡ଼ରେ ଘର ସହ ଦୋକାନ ମଧ୍ୟ ନଷ୍ଟ ହୋଇଯାଇଛି। ତେବେ ବନ୍ୟାର ପ୍ରଖର ସ୍ରୋତରେ ଭାସିଯାଇଥିଲେ ଚନ୍ଦ୍ରମା। ତେବେ ଗ୍ରାମବାସୀଙ୍କ ଉଦ୍ୟମରେ ତାଙ୍କ ଜୀବନ ତ ବଞ୍ଚିଗଲା, ହେଲେ ହଜିଗଲା ବଞ୍ଚିବାର ଏକମାତ୍ର ଆଧାର। ଏବେ ଭଙ୍ଗା ଘରର ଅବଶେଷ ପାଖରେ ବସି ମାଆ ଓ ଝିଅ ଲୁହ ଗଡ଼ାଉଛନ୍ତି।
ବର୍ତ୍ତମାନ ଚନ୍ଦ୍ରମା ଓ ତାଙ୍କ ଝିଅଙ୍କ ପାଇଁ ରିଲିଫ୍ ଖାଦ୍ୟ ଓ ପିନ୍ଧିବା ପାଇଁ ପୋଷାକ ହିଁ ଏକମାତ୍ର ଭରସା। ସ୍ୱେଚ୍ଛାସେବୀଙ୍କ ସହାୟତାରେ ଚାଲିଛି ଦୁଇ ଜଣଙ୍କ ଜୀବନ। ହେଲେ କେତେଦିନ ଏମିତି ଅନ୍ୟର ସାହାଯ୍ୟରେ ବଞ୍ଚିବେ ଦୁହେଁ? କେବେ ମିଳିବ ତାଙ୍କୁ ନୂଆ ଘର? କେବେ ଫେରିବ ସ୍ୱାଭାବିକ ଜୀବନ? ଏଭଳି ଅନେକ ପ୍ରଶ୍ନ ଏବେ ବିପନ୍ନଙ୍କ ମନରେ ଅଛି ।
କେବଳ ଚନ୍ଦ୍ରମା ନୁହନ୍ତି, ବନ୍ୟାରେ ଜାହାଡ଼ା ଗାଁର ମୋଟ ୧୩ଟି ପରିବାରର ଘର ଭାଙ୍ଗିଥିବା ସୂଚନା ମିଳିଛି। ସମସ୍ତେ ଏବେ ସରକାରୀ ସହାୟତାକୁ ଅପେକ୍ଷା କରିଛନ୍ତି। ଅନ୍ୟପଟେ ବନ୍ୟା ବିପନ୍ନ ଓ ଘର ଭାଙ୍ଗିଥିବା ପରିବାରଙ୍କୁ ସରକାରୀ ସହାୟତା ଯୋଗାଇ ଦିଆଯିବ ବୋଲି ଜିଲ୍ଲାପାଳ କହିଛନ୍ତି।
