ନନ୍ଦିଘାେଷବ୍ୟୁରୋ: ମଧୁବାବୁ ପେନସନ୍ ଯୋଜନାକୁ ନେଇ ରାଜ୍ୟ ସରକାରଙ୍କୁ ଘେରିଛି ବିଜେଡି। ଯୋଜନାରେ ୫ ଲକ୍ଷ ନୂଆ ହିତାଧିକାରୀଙ୍କୁ ସାମିଲ କରିବା ଘୋଷଣାର ଉଦ୍ଦେଶ୍ୟକୁ ନେଇ ପ୍ରଶ୍ନ ଉଠାଇଛନ୍ତି ବିଜେଡି ସଂସଦୀୟ ଦଳ ନେତା ମାନସ ରଞ୍ଜନ ମଙ୍ଗରାଜ। ଏହି ଘୋଷଣା ରାଜନୈତିକ ଉଦ୍ଦେଶ୍ୟ ବୋଲି ସେ ଅଭିଯୋଗ କରିଛନ୍ତି।
ମାନସ ମଙ୍ଗରାଜଙ୍କ ଅଭିଯୋଗ ଅନୁସାରେ, ସରକାର ନୂଆ ହିତାଧିକାରୀଙ୍କୁ ପେନସନ୍ ଦେବା ନେଇ ଘୋଷଣା କରୁଥିବା ବେଳେ ପୂର୍ବରୁ ଥିବା ହିତାଧିକାରୀଙ୍କୁ ଠିକ୍ ସମୟରେ ପେନସନ୍ ମିଳୁନାହିଁ। ହଜାର ହଜାର ବୟସ୍କ ଓ ଅସହାୟ ହିତାଧିକାରୀ ମାସ ମାସ ଧରି ପେନସନ୍ ଅପେକ୍ଷାରେ ରହୁଛନ୍ତି। ଏପରିକି ୨୦୨୬ ଏପ୍ରିଲରୁ ଜୁନ୍ ମାସ ମଧ୍ୟରେ ପ୍ରାୟ ୧୮ରୁ ୨୦ ଲକ୍ଷ ହିତାଧିକାରୀ ତିନି ମାସ ଧରି ପେନସନ୍ ପାଇନଥିବା ସେ ଅଭିଯୋଗ କରିଛନ୍ତି। ଏହା ସହ ବୈଷୟିକ ତ୍ରୁଟି ଯୋଗୁଁ ପେନସନ୍ ବଣ୍ଟନରେ ବାରମ୍ବାର ବାଧା ସୃଷ୍ଟି ହେଉଥିବା ମଧ୍ୟ ମାନସ ମଙ୍ଗରାଜ କହିଛନ୍ତି। ସାମାଜିକ ସୁରକ୍ଷା ଯୋଜନାରେ ସରକାରଙ୍କ ବ୍ୟବସ୍ଥା ଓ ପରିଚାଳନାକୁ ନେଇ ସେ ପ୍ରଶ୍ନ ଉଠାଇଛନ୍ତି।
ପେନସନ୍ ବଣ୍ଟନ ବ୍ୟବସ୍ଥାରେ ସ୍ୱଚ୍ଛତା ଓ ସମୟାନୁବର୍ତ୍ତିତା ରକ୍ଷା କରିବାକୁ ସେ ଦାବି କରିଛନ୍ତି। ଏଥିସହ ପେନସନ୍ ନପାଇ ମୃତ୍ୟୁବରଣ କରିଥିବା ହିତାଧିକାରୀଙ୍କ ପରିବାରକୁ କ୍ଷତିପୂରଣ ଦେବାକୁ ମଧ୍ୟ ଦାବି କରିଛନ୍ତି ମାନସ ରଞ୍ଜନ ମଙ୍ଗରାଜ।
