ଜମ୍ମୁ-କଶ୍ମୀର: ଜମ୍ମୁ-କଶ୍ମୀରର କୁଲଗାମରେ CRPF ଚେକ୍ପୋଷ୍ଟ ଉପରେ ଆତଙ୍କବାଦୀଙ୍କ ଆକ୍ରମଣ ହୋଇଛି । ବୁଧବାର ତଥା ଆଜି ଅପରାହ୍ନରେ ମିର ବଜାର ନିକଟ ଅଖରାନ୍ରେ ଥିବା CRPF କ୍ୟାମ୍ପକୁ ଟାର୍ଗେଟ କରିଥିଲେ ବାଇକ୍ରେ ଆସିଥିବା ଆତଙ୍କବାଦୀ । ଏହି ଆକ୍ରମଣରେ ୩ ଜଣ CRPF ଯବାନ ଆହତ ହୋଇଛନ୍ତି । ତେବେ ଏହି ଘଟଣା ପରେ ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଦିଆଯାଇଛି ।
ଏହି ଆକ୍ରମଣର ଭୟାନକ ଦୃଶ୍ୟ CCTV କ୍ୟାମେରାରେ ମଧ୍ୟ କଏଦ ହୋଇଛି । ସିସିଟିଭି ଫୁଟେଜ୍ରେ ମାତ୍ର ୧୫ ସେକେଣ୍ଡ ମଧ୍ୟରେ ପ୍ରାୟ ୩୦ ରାଉଣ୍ଡ ଗୁଳି ଫୁଟିବାର ଶବ୍ଦ ଶୁଣିବାକୁ ମିଳୁଛି । ପରବର୍ତ୍ତୀ ଏକ ମିନିଟ୍ ମଧ୍ୟରେ ଆହୁରି ପ୍ରାୟ ୧୨ ରାଉଣ୍ଡ ଗୁଳି ଫୁଟିଥିବା ରେକର୍ଡ ହୋଇଛି । CCTVରେ ଜଣେ CRPF ଯବାନ ଦୋକାନ ସାମ୍ନାରେ ବସିଥିବା ବେଳେ ହଠାତ୍ ଗୁଳିମାଡ଼ ଆରମ୍ଭ ହେଉଥିବା ଦେଖାଯାଉଛି । ପରେ ଦୁଇ ଯବାନ ମେସିନ୍ଗନ୍ ଧରି ଆକ୍ରମଣର ଦିଗକୁ ଆଗକୁ ବଢ଼ୁଛନ୍ତି ।
CRPF ପକ୍ଷରୁ ସୂଚନା ଅନୁଯାୟୀ, ଅପରାହ୍ନ ପ୍ରାୟ ୨ଟା ୧୫ରେ ଏହି ଘଟଣା ଘଟିଥିଲା । ଆକ୍ରମଣକାରୀମାନେ ଗୁଳି ଚଳାଇ ଘଟଣାସ୍ଥଳରୁ ଫେରାର ହୋଇଯାଇଥିଲେ । ତେେ ଆହତ ହୋତଥିବା ଯବାନମାନେ ହେଲେ ରାକେଶ ଦାସ, ସନ୍ତୋଷ ଚନ୍ଦ୍ରୁ ଏବଂ ସୋମବୀର ସିଂହ । ସେମାନଙ୍କୁ ଅନନ୍ତନାଗ ଜିଲ୍ଲାର ଏକ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ତିନି ଯବାନ ବିପଦମୁକ୍ତ ଥିବା ଜଣାପଡ଼ିଛି ।
ଅନ୍ୟପଟେ ଆକ୍ରମଣ ପରେ ଘଟଣାସ୍ଥଳରେ ଅତିରିକ୍ତ ବ୍ୟାରିକେଡ୍ ଲଗାଯାଇଛି । ବୁଲେଟ୍ପ୍ରୁଫ୍ ଗାଡ଼ି ସହ ଅଧିକ ସୁରକ୍ଷାବଳ ମୁତୟନ କରାଯାଇଛି । ଲାଉଡସ୍ପିକର ଯୋଗେ ସ୍ଥାନୀୟ ଲୋକଙ୍କୁ ଘର ଭିତରେ ରହିବାକୁ ସତର୍କ କରାଯାଇଛି । ବର୍ତ୍ତମାନ ଆକ୍ରମଣକାରୀଙ୍କ ତଲାସୀ ଜାରି ରହିଛି ।
