ନନ୍ଦିଘୋଷ ବ୍ୟୁରୋ:ରୁଷ-ଆମେରିକା କୂଟନୈତିକ ସମ୍ପର୍କ ମଧ୍ୟରେ ଆସିଛି ଏକ ବଡ଼ ଖବର । ଆମେରିକାରେ ରୁଷର ରାଷ୍ଟ୍ରଦୂତ ଆଲେକଜାଣ୍ଡାର ଡାର୍ଚିଏଭଙ୍କ ୬୬ ବର୍ଷ ବୟସରେ ମୃତ୍ୟୁ ହୋଇଛି । ନଭେମ୍ବର ୧୧ ତାରିଖରେ ତାଙ୍କର ଦେହାନ୍ତ ହୋଇଥିବା ରୁଷ ବୈଦେଶିକ ମନ୍ତ୍ରଣାଳୟ ଘୋଷଣା କରିଛି । ପ୍ରଥମେ ମନ୍ତ୍ରଣାଳୟ ତାଙ୍କ ମୃତ୍ୟୁକୁ ଅଚାନକ ବୋଲି କହିଥିବା ବେଳେ ପରେ ମୁଖପାତ୍ର ମାରିଆ ଜାଖାରୋଭା ଏହା ଏକ ଅଜ୍ଞାତ ଦୀର୍ଘକାଳୀନ ରୋଗ ଯୋଗୁଁ ହୋଇଥିବା ସୂଚନା ଦେଇଛନ୍ତି । ତାଙ୍କର ମୃତ୍ୟୁ ମସ୍କୋରେ ହୋଇଥିବା ଜଣାପଡ଼ିଛି । ରୁଷ୍ ଓ ଆମେରିକା ମଧ୍ୟରେ କୂଟନୈତିକ ସମ୍ପର୍କରେ ସେ ଜଣେ ଅଭିଜ୍ଞ ବ୍ୟକ୍ତି ଥିଲେ। ରୁଷ ବୈଦେଶିକ ମନ୍ତ୍ରଣାଳୟ ଏକ ଅନଲାଇନ୍ ବିବୃତିରେ ଡାର୍ଚିଏଭଙ୍କୁ ଜଣେ ଉତ୍କୃଷ୍ଟ କୂଟନୀତିଜ୍ଞ, ଅଭିଜ୍ଞ ନେତା, ଭଲ ସହକର୍ମୀ ଓ ପରାମର୍ଶଦାତା ଭାବେ ବର୍ଣ୍ଣନା କରିଛି। ସେ ଆମେରିକା ସମ୍ପର୍କିତ ବିଷୟରେ ଜଣେ ଦକ୍ଷ ବିଶେଷଜ୍ଞ ଥିଲେ। ୨୦୨୫ ମାର୍ଚ୍ଚରୁ ସେ ଆମେରିକାରେ ରୁଷର ରାଷ୍ଟ୍ରଦୂତ ଭାବେ ଦାୟିତ୍ୱ ତୁଲାଉଥିଲେ। ଏହି ପଦରେ ସେ ଆନାତୋଲି ଆଣ୍ଟୋନୋଭଙ୍କ ସ୍ଥାନ ନେଇଥିଲେ। ଆଣ୍ଟୋନୋଭ ୨୦୨୪ ଶେଷ ଭାଗରେ ଏହି ପଦ ଛାଡ଼ିଥିଲେ । ୨୦୨୫ ଫେବୃଆରୀରେ ଇସ୍ତାନବୁଲ୍ରେ ଆମେରିକା ସହ ଆଲୋଚନା ପାଇଁ ରୁଷ୍ର ପ୍ରତିନିଧି ଦଳର ନେତୃତ୍ୱ ମଧ୍ୟ ନେଇଥିଲେ। ତାଙ୍କ ମୃତ୍ୟୁରେ ରୁଷ୍ର ବୈଦେଶିକ ମନ୍ତ୍ରଣାଳୟ ଶୋକ ପ୍ରକାଶ କରିଛି।
