ଯାଜପୁର ରୋଡରୁ :ଜମୁଛି ଯାଜପୁରର ଗଣପର୍ବ କାଳୀପୂଜା । ସଜେଇ ହୋଇଛି ବ୍ୟାସନଗର ସହର। ମୃଣ୍ମୟୀ ମୂର୍ତ୍ତୀ ସହ ସୁଉଚ୍ଚ ତୋରଣ । ରଙ୍ଗୀନ ଆଲୋକମାଳାରେ ଝଲସୁଛି ସହରର ଗଳିକନ୍ଦି। ଚାଲିଛି ମା ଶ୍ୟାମାକାଳୀଙ୍କ ପୂଜାର୍ଚ୍ଚନା। ଚଳିତବର୍ଷ ୧୯ ଟି ମଣ୍ଡପରେ ପୂଜା ପାଉଛନ୍ତି ମା ଶ୍ୟାମାକାଳୀ। ଗତ ୮ ତାରିଖ ମଧ୍ୟରାତ୍ରରୁ ପୂଜା ଆରମ୍ଭ ହୋଇଥିବା ବେଳେ ଏହା ଆସନ୍ତା ୧୮ ତାରିଖ ପର୍ଯ୍ୟନ୍ତ ଚାଲିବ। ପ୍ରତିଦିନ ସଂନ୍ଧ୍ୟାରେ ଦର୍ଶକଙ୍କ ଖଚାଖଚ୍ ଭିଡ଼ ଦେଖିବାକୁ ମିଳୁଛି। ଜିଲ୍ଲା ଓ ଜିଲ୍ଲା ବାହାରର ଦର୍ଶକ ମଧ୍ୟ ଏଠାକୁ ପୂଜା ଉପଭୋଗ କରିବାକୁ ଆସୁଛନ୍ତି।
ଗଣପର୍ବ ପାଇଁ ବେଶ୍ ଉତ୍ସାହିତ ଅଞ୍ଚଳବାସୀ। ମଣ୍ଡପରେ ସାଜସଜ୍ଜାକୁ ବିଶେଷ ଗୁରୁତ୍ବ ଦେଇଛନ୍ତି ପୂଜା କମିଟି। ଆକର୍ଷଣୀୟ ମୃଣ୍ମୟୀ ମୂର୍ତ୍ତୀ ସହ ବିଭିନ୍ନ ବିଷୟବସ୍ତୁ ଉପରେ ଥିମ୍ ଓ ସୁଉଚ୍ଚ ତୋରଣ ନିର୍ମାଣ କରାଯାଇଛି। ୧୦ ରୁ ଉର୍ଦ୍ଧ୍ବ ସ୍ଥାନରେ ମୀନାବଜାରର ଆୟୋଜନ ସହ ଦର୍ଶକଙ୍କ ମନୋରଞ୍ଜନ ପାଇଁ ବ୍ୟାପକ ବନ୍ଦୋବସ୍ତ କରାଯାଇଛି। ପ୍ରତ୍ୟେକ ଦିନ ସନ୍ଧ୍ୟାରେ ସାଂସ୍କୃତିକ ଓ ରଙ୍ଗାରଙ୍ଗ କାର୍ଯ୍ୟକ୍ରମ ସହ ଅପେରାର ମଜା ନେଉଛନ୍ତି ଦର୍ଶକ। ଶାନ୍ତିଶୃଙ୍ଖଳା ବଜାୟ ରଖିବା ପାଇଁ ସହରରେ ୮ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିବା ବେଳେ ଟ୍ରାଫିକ କଟକଣା ଜାରି କରାଯାଇଛି।
ଆସନ୍ତା ୧୮ରେ ଅନୁଷ୍ଠିତ ହେବ ଭସାଣ ଉତ୍ସବ। ମା’ଙ୍କୁ ବିଦାୟ ଦେବେ ସହରବାସୀ।କାଳୀ ମେଳଣ ପଡ଼ିଆରେ ସମସ୍ତ ମେଢ଼କୁ ଏକତ୍ରିତ କରାଯିବା ପରେ ପ୍ରଶାସନ ଦ୍ବାରା ସ୍ଥିର ହୋଇଥିବା ସ୍ଥାନରେ ବିସର୍ଜନ କରାଯିବ।
