ଆସିକା: ଆସିକାବାସୀଙ୍କ ଅଣ୍ଟା ଭାଙ୍ଗିଛି ବନ୍ୟା। ସହରରେ ହୋଇଛି ବ୍ୟାପକ କ୍ଷୟକ୍ଷତି। ଉଦାସୀନ ସରକାର, ବେଫିକର ପ୍ରଶାସନ। ସାମୟିକ ରିଲିଫ୍ ବଦଳରେ ବନ୍ୟାର ସ୍ଥାୟୀ ପ୍ରତିକାର ଦାବି। ଗଞ୍ଜାମ ଜିଲ୍ଲାର ପ୍ରମୁଖ ସହର ଆସିକା ପାଇଁ ବନ୍ୟା ଏକ ଦୀର୍ଘସ୍ଥାୟୀ ସମସ୍ୟା ପାଲଟିଛି। ୧୯୯୦ ପରଠାରୁ ୪ଟି ବଡ଼ ବନ୍ୟା ଦେଖିଛନ୍ତି ସହରବାସୀ। ବନ୍ୟାଜଳ ନିଷ୍କାସନ ପାଇଁ ଆସିକା ସହରରେ ନାହିଁ କୌଣସି ଠୋସ୍ ବ୍ୟବସ୍ଥା। ସହରର ବନ୍ୟାଜଳ ନିଷ୍କାସନରେ ଟିପିସର ନାଳ ପ୍ରମୁଖ ଭୂମିକା ଗ୍ରହଣ କରୁଥିବା ବେଳେ ସମ୍ପ୍ରତି ଜବରଦଖଲ ସହ ଅଳିଆ ଆବର୍ଜନା ପଡ଼ି ରହିବା ଯୋଗୁଁ ଏହା ସଙ୍କୁଚିତ ହେବାରେ ଲାଗିଛି। ଟିପିସର ନାଳ ସମେତ ସହରର ଡ୍ରେନେଜ୍ ବ୍ୟବସ୍ଥାର ପୁନରୁଦ୍ଧାର ଓ ନିୟମିତ ରକ୍ଷଣାବେକ୍ଷଣ ହୋଇପାରୁ ନଥିବା ଅଭିଯୋଗ ହୋଇଛି। ଫଳରେ ପ୍ରତିବର୍ଷ ଜଳବନ୍ଦୀ ସ୍ଥିତି ଉତ୍ପନ୍ନ ହେଉଛି ଏବଂ ସାଧାରଣ ଲୋକଙ୍କ ଠାରୁ ଆରମ୍ଭ କରି ବ୍ୟବସାୟୀଙ୍କ ପର୍ଯ୍ୟନ୍ତ ସମସ୍ତେ ଆର୍ଥିକ କ୍ଷତି ସହୁଛନ୍ତି।
ଅନ୍ୟପଟେ ଆସିକାରେ ବାରମ୍ବାର ହେଉଥିବା ବନ୍ୟାର ଅନ୍ୟତମ ପ୍ରମୁଖ କାରଣ ଏହାର ଭୌଗୋଳିକ ସ୍ଥିତି ବୋଲି ବୁଦ୍ଧିଜିବୀ କହିଛନ୍ତି। ସହରର ଦୁଇ ପାର୍ଶ୍ୱରେ ରହିଛି ଋଷିକୁଲ୍ୟା ଓ ବଡ଼ନଦୀ। ଉଭୟ ନଦୀ କୂଳରେ ବେଆଇନ୍ ବାଲି ଉତ୍ତୋଳନ ବଢ଼ିଥିବାରୁ ନଦୀ ବନ୍ଧ ଦୁର୍ବଳ ହେଉଛି। ନଦୀରେ ଜଳପ୍ରବାହ ବୃଦ୍ଧି ସମୟରେ ପାଣିର ପ୍ରବଳ ଚାପକୁ ସମ୍ଭାଳି ନପାରି ଦୁର୍ବଳ ନଦୀ ବନ୍ଧ ଭାଙ୍ଗିଯିବା ସହ ଘାଇ ସୃଷ୍ଟି ହେଉଛି ଏବଂ ବନ୍ୟାଜଳ ସହର ଭିତରକୁ ପଶି ଧନଜୀବନ ନଷ୍ଟ କରୁଛି। ନଦୀ ବନ୍ଧକୁ ସୁଦୃଢ଼ କରିବା ଦିଗରେ ପ୍ରଶାସନ ପଦକ୍ଷେପ ନେବା ଜରୁରୀ ହୋଇପଡ଼ିଛି ବୋଲି ସହରବାସୀ କହିଛନ୍ତି।
ଉଭୟ ଋଷିକୁଲ୍ୟା ଓ ବଡ଼ନଦୀର ଜଳସ୍ତର ବଢ଼ିଲେ ଆସିକାବାସୀଙ୍କ ମନରେ ଛନକା ପଶୁଛି। ବିଶେଷକରି ଅକ୍ଟୋବର ଓ ନଭେମ୍ବର ମାସ ଆସିଲେ ବନ୍ୟା ଆଶଙ୍କା ଲୋକଙ୍କୁ ଭୟଭୀତ କରାଉଛି। କେବେ ବନ୍ୟା ସମସ୍ୟାର ସ୍ଥାୟୀ ପ୍ରତିକାର ପ୍ରତି ଦୃଷ୍ଟି ଦେବେ ସରକାର। ତା ଉପରେ ନଜର..।
