ନନ୍ଦିଘୋଷ ବ୍ୟୁରୋ: ବାତ୍ୟା, ତା’ ପରବର୍ତ୍ତୀ ବନ୍ୟା ଓ ଭୂସ୍ଖଳନ ଦୁଃଖ ସରିନଥିବା ବେଳେ ପୁଣି ସମୁଦ୍ର ଭିତରେ ମୁଣ୍ତ ଟେକିଲାଣି ବାତ୍ୟା ‘ଆକଭାନ” । ଏନେଇ ସକ୍ରିୟ “ଲଘୁଚାପ” ଅଧିକ ଘନୀଭୂତ ହୋଇ ଆଜି ସକାଳ “ସୁଦୃଶ୍ୟ ଲଘୁଚାପ କ୍ଷେତ୍ର” ରେ ପରିଣତ ହୋଇଛି। ଏହା ଆହୁରି ଅଧିକ ଘନୀଭୂତ ହେବା ସହ ଆଗାମୀ ୨୪ ଘଣ୍ଟା ମଧ୍ୟରେ “ଅବପାତ” ରେ ପରିଣତ ହେବାର ସମ୍ଭାବନା ରହିଛି । ୧୬ ସନ୍ଧ୍ୟା ସୁଦ୍ଧା ଆହୁରି ଅଧିକ ଶକ୍ତିଶାଳୀ ହୋଇ ବାତ୍ୟାରେ ପରିଣତ ହେବାର ସମ୍ଭାବନା ରହିଛି।
ସେପଟେ ରାଜ୍ୟରେ ଧାନ ପାଚିଥିବା ବେଳେ ଆଉ ଦିନ କେଇଟା ପରେ ଅମଳ ହେବ । ଏହି ସମୟରେ ପୁଣି ବାତ୍ୟା ଆଶଙ୍କା ଯୋଗୁଁ ଚାଷୀଙ୍କ ମନରେ ଛନକା ପଶିଛି । ଯଦି ବାତ୍ୟା କି ବାତ୍ୟା ପ୍ରଭାବରେ ବର୍ଷା ହୁଏ ତାହାଲେ ସବୁ ଉଜାଡ଼ି ଯିବ । ବାତ୍ୟା ‘ଆକଭାନ”ର ଗତିପଥ ଓ ତୀବ୍ରତା ଏଯାଏଁ ସ୍ପଷ୍ଟ ହୋଇନାହିଁ । ତଥାପି ଅଧିକାଂଶ ମଡେଲର ଆକଳନ ଅନୁଯାୟୀ, ଏଥର ବି ବାତ୍ୟା ଆନ୍ଧ୍ରକୁ ଯାଇପାରେ। ସିଧା ମାଡ଼ ନ ହେଲେ ବି ସମ୍ଭାବ୍ୟ ବିପଦ ବଳୟରୁ ସମ୍ପୂର୍ଣ୍ଣ ମୁକ୍ତ ହୋଇନପାରେ ଓଡ଼ିଶା। ବିଶେଷ କରି ଦକ୍ଷିଣ ଓଡ଼ିଶା ଓ ଉପକୂଳ ଅଞ୍ଚଳ ପ୍ରଭାବିତ ହୋଇପାରେ।
ବାତ୍ୟା ‘ଆକଭାନ” ପ୍ରଭାବରେ ୧୭ ତାରିଖଠାରୁ ଉପକୂଳ ଓଡ଼ିଶାରେ ପାଗ ବଦଳିବା ସହ ୧୮ ଓ ୧୯ ତାରିଖରେ ବର୍ଷା ପବନ ହେବା ନେଇ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି । ୧୮ ତାରିଖରେ କେନ୍ଦ୍ରାପଡ଼ା ଓ ଜଗତସିଂହପୁର ଜିଲ୍ଲାର କେତେକ ସ୍ଥାନରେ ପ୍ରବଳ ବର୍ଷା ହେବ । ଏହା ସହ ବାଲେଶ୍ବର, ଭଦ୍ରକ, ଗଞ୍ଜାମ, ପୁରୀ, କେନ୍ଦୁଝର, ନୟାଗଡ଼, କଟକ, ଖୋର୍ଦ୍ଧା ଓ କେନ୍ଦୁଝର ଜିଲ୍ଲାରେ ବିଜୁଳି ଘଡ଼ଘଡ଼ି ସହ ଘଣ୍ଟାପ୍ରତି ୩୦ରୁ ୪୦ କିମି ବେଗରେ ପବନ ହୋଇପାରେ । ଏହି ସବୁ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି । ସେହିପରି ୧୯ ତାରିଖରେ ରାୟଗଡ଼ା, ଗଜପତି, ଗଞ୍ଜାମ ଓ ପୁରୀ ଜିଲ୍ଲାର କେତେକ ସ୍ଥାନରେ ପ୍ରବଳ ବର୍ଷା ଓ ଉପକୂଳ ଓଡ଼ିଶାରେ ବିଜୁଳି ଘଡ଼ଘଡ଼ି ସହ ଘଣ୍ଟା ୩୦ରୁ ୪୦ କିମି ବେଗରେ ପବନ ହେବ ବୋଲି ପାଣିପାଗ ବିଭାଗ ପୂର୍ବାନୁନମାନ କରାଯ।ଇଛି । ସମ୍ଭାବ୍ୟ ବାତ୍ୟାକୁ ନେଇ ରାଜ୍ୟ ସରକାର ପ୍ରସ୍ତୁତି ଆରମ୍ଭ କରି ଦେଇଛନ୍ତି। ସ୍ଥିତି ଉପରେ ନଜର ରଖିବା ଲାଗି ଆସନ୍ତା ଦୁଇ ଦିନ ଏସଆରସିଙ୍କ କାର୍ଯ୍ୟାଳୟ ଖୋଲା ରହିବ।
