ନନ୍ଦିଘୋଷ ବ୍ୟୁରୋ: ଆମେରିକାବାସୀଙ୍କ ପାଇଁ ଆଶ୍ୱସ୍ତିର ଖବର। ଦୀର୍ଘ ଦୁଇ ମାସର ଅପେକ୍ଷା ପରେ ଦେଶରେ ଡିଜେଲ୍ ଦର ପ୍ରତି ଗ୍ୟାଲନ୍ ୬ ଡଲାର ତଳକୁ ଖସିଛି। ଇନ୍ଧନ ମୂଲ୍ୟରେ ଏହି ହ୍ରାସ ସାଧାରଣ ଲୋକଙ୍କଠାରୁ ଆରମ୍ଭ କରି ଚାଷୀ ଓ ବ୍ୟବସାୟୀଙ୍କୁ ଆଶ୍ୱସ୍ତି ଦେଇଛି। ଶନିବାର ଡିଜେଲର ଜାତୀୟ ହାରାହାରି ମୂଲ୍ୟ ପ୍ରତି ଗ୍ୟାଲନ୍ ୫.୯୯୮ ଡଲାର ରେକର୍ଡ କରାଯାଇଛି। କେବଳ ଡିଜେଲ୍ ନୁହେଁ, ପେଟ୍ରୋଲ ଦର ମଧ୍ୟ ପ୍ରତି ଗ୍ୟାଲନ୍ ୪ ଡଲାର ତଳକୁ ଖସିଛି।
ଗତ କିଛି ମାସ ଧରି ଆମେରିକାରେ ଇନ୍ଧନ ଦର ଲଗାତାର ବଢ଼ି ଚାଲିଥିଲା। ଇରାନକୁ ନେଇ ଆମେରିକା–ଇସ୍ରାଏଲ୍ ଯୁଦ୍ଧ ଏବଂ ରୁଷିଆର ତୈଳ ବିଶୋଧନାଗାର ଉପରେ ୟୁକ୍ରେନର ଆକ୍ରମଣ ଯୋଗୁଁ ତେଲ ଯୋଗାଣ ପ୍ରଭାବିତ ହୋଇଥିଲା। ଫଳରେ ଡିଜେଲ୍ ଦର ରେକର୍ଡ ସ୍ତରରେ ପହଞ୍ଚିଥିଲା। ସେପ୍ଟେମ୍ବର ୨୨ରେ ଏହା ପ୍ରତି ଗ୍ୟାଲନ୍ ୬.୫୧୯ ଡଲାରର ସର୍ବୋଚ୍ଚ ସ୍ତର ଛୁଇଁଥିଲା। କାଲିଫର୍ନିଆରେ ତ ଡିଜେଲ୍ ଦର କିଛି ସମୟ ପାଇଁ ୧୦ ଡଲାର ମଧ୍ୟ ଅତିକ୍ରମ କରିଥିଲା।
ଇନ୍ଧନ ଦର ବୃଦ୍ଧି ଯୋଗୁଁ ପରିବହନ ଖର୍ଚ୍ଚ ବଢ଼ିବା ସହ ନିତ୍ୟବ୍ୟବହାର୍ଯ୍ୟ ସାମଗ୍ରୀର ଦର ଉପରେ ମଧ୍ୟ ଚାପ ପଡ଼ିଥିଲା। ଏହା ଆମେରିକାରେ ମୁଦ୍ରାସ୍ଫୀତିକୁ ଆହୁରି ବଢ଼ାଇଥିଲା। ତେଣୁ ଇନ୍ଧନ ଦର ହ୍ରାସ କରିବାକୁ ଟ୍ରମ୍ପ ପ୍ରଶାସନ ବିଭିନ୍ନ ପଦକ୍ଷେପ ନେଇଥିଲା। ହେଲେ ବିଶ୍ୱ ବଜାରରେ ତୈଳ ଯୋଗାଣ ସମସ୍ୟା ଯୋଗୁଁ ଏହାର ବିଶେଷ ପ୍ରଭାବ ପଡ଼ିନଥିଲା।
ତେବେ ଏବେ ବଦଳିଛି ବଜାର ସ୍ଥିତି। ଗତ ଦୁଇ ସପ୍ତାହ ମଧ୍ୟରେ ବ୍ରେଣ୍ଟ ଅଶୋଧିତ ତୈଳର ଭବିଷ୍ୟତ ମୂଲ୍ୟ ପ୍ରାୟ ୧୮.୫ ପ୍ରତିଶତ ହ୍ରାସ ପାଇଛି। ଏହା ସହିତ ଶରତ ଋତୁରେ ଯାତାୟାତ କମିବାରୁ ଇନ୍ଧନର ଚାହିଦା ମଧ୍ୟ ହ୍ରାସ ପାଇଛି। ଅନ୍ୟପଟେ ବାତ୍ୟା ଋତୁ ଶେଷ ହେବା ସହ ରିଫାଇନାରୀଗୁଡ଼ିକର ମରାମତି କାମ ମଧ୍ୟ ପ୍ରାୟ ଶେଷ ହୋଇଛି। ଫଳରେ ତେଲ ଉତ୍ପାଦନ ସ୍ୱାଭାବିକ ହେବା ସହ ବଜାରରେ ଯୋଗାଣ ବଢ଼ିଛି।
ଏହି ସବୁ କାରଣରୁ ଆମେରିକାରେ ଡିଜେଲ୍ ଓ ପେଟ୍ରୋଲ ଦର ହ୍ରାସ ପାଉଛି। ଦୀର୍ଘ ଦିନ ଧରି ମହଙ୍ଗା ଇନ୍ଧନର ମାଡ଼ ସହୁଥିବା ଆମେରିକାବାସୀଙ୍କ ପାଇଁ ଏହା ନିଶ୍ଚିତ ଭାବେ ଏକ ଆଶ୍ୱସ୍ତିକର ଖବର।
