ପୁରୀ : ଆଗାମୀ ୧୮ ତାରିଖରେ ପବିତ୍ର ଅଁଳା ନବମୀ। ଏହି ଅବସରରେ ସାକ୍ଷୀଗୋପାଳର ସାକ୍ଷୀଗୋପୀନାଥ ମନ୍ଦିରରେ ପ୍ରବଳ ଭିଡ଼ ପରିଲକ୍ଷିତ ହେବ। ପରମ୍ପରା ଅନୁସାରେ ବର୍ଷକ ଗୋଟିଏ ଦିନ ଅଁଳା ନବମୀ ତିଥିରେ ସାକ୍ଷୀଗୋପୀନାଥ ମନ୍ଦିରରେ ଦୁର୍ଲଭ ନଟବର ବେଶ ଅନୁଷ୍ଠିତ ହୋଇଥାଏ। ଏହି ଦିନ ମା’ ରାଧାରାଣୀଙ୍କର ପାଦ ଦର୍ଶନର ସୌଭାଗ୍ୟ ମିଳିଥାଏ। ପ୍ରବଳ ଜନ ସମାଗମକୁ ନଜରରେ ରଖି ପୁରୀ ପୋଲିସ ପକ୍ଷରୁ ସ୍ୱତନ୍ତ୍ର ଟ୍ରାଫିକ ପ୍ଲାନ ସହ ଆଡଭାଇଜରୀ ପ୍ରସ୍ତୁତ କରାଯାଇଛି।
ଭୁବନେଶ୍ୱର ପଟୁ ଆସୁଥିବା ସମସ୍ତ ଚାରି ଚକିଆ ଯାନ ଗୁଡିକ ସାକ୍ଷୀଗୋପାଳ କଲେଜ ଛକ ବାଟ ଦେଇ ଆସିବା ସହ କୋଠ ଉପର ଓ ବିଏସଏନଲ ପଡିଆରେ ପାର୍କିଙ୍ଗ କରିବେ। ସମାନ ମାର୍ଗ ଦେଇ ମଧ୍ୟ ସେହି ଗାଡି ଗୁଡିକ ପ୍ରସ୍ଥାନ କରିବେ। ସେହିପରି ଦୁଇ ଚକିଆ ଯାନ ଗୁଡିକ ସରସ୍ବତୀ ଶିଶୁ ମନ୍ଦିର ସ୍କୁଲ ନିକଟର ଉଭୟ ପାର୍ଶ୍ୱରେ ପାର୍କିଙ୍ଗ କରିବା ସହ ସମାନ ମାର୍ଗ ଦେଇ ଫେରିବେ।
ସାକ୍ଷୀଗୋପାଳ ବଜାର ଦେଇ ଆସୁଥିବା ଗାଡି ଗୁଡିକ ରେଳବାଇ ଲେଭେଲ କ୍ରସିଂ ନିକଟରେ ପାର୍କଂ କରିବା ସହ ମହାମାୟା ସାହି ରିଲାଏନ୍ସ ବାଟ ହୋଇ ଜାତୀୟ ରାଜପଥ ଦେଇ ପ୍ରତ୍ୟାବର୍ତ୍ତନ କରିବେ। ଅଲଗୁମ ପଟୁ ଆସୁଥିବା ଉଭୟ ଚାରି ଚକିଆ ଓ ଦୁଇ ଚକିଆ ଗାଡି ଗୁଡିକ ପୋଡଙ୍ଗ ସାହି ଓ ସାରୁଗାଡିଆ ନିକଟରେ ନିର୍ଦ୍ଧାରିତ ପାର୍କିଙ୍ଗ ସ୍ଥାନରେ ପାର୍କିଙ୍ଗ କରିବା ସହ ପ୍ରତ୍ୟାବର୍ତ୍ତନ କରିବେ। ପୁରୀ ପୋଲିସ ପକ୍ଷରୁ ଏ ନେଇ ସ୍ୱତନ୍ତ୍ର ରୁଟ ପ୍ଲାନ ପ୍ରସ୍ତୁତ ହୋଇଥିବା ବେଳେ, ଯାତାୟାତ ସୁବିଧା ନେଇ ବ୍ୟାପକ ପ୍ରସ୍ତୁତି କରାଯାଇଛି।
