ନନ୍ଦିଘୋଷବ୍ୟୁରୋ: ଇରାନ୍ ଓ ଆମେରିକା ମଧ୍ୟରେ ଉତ୍ତେଜନା ଜାରି ରହିଥିବା ବେଳେ ହର୍ମୁଜ୍ ପ୍ରଣାଳୀରେ ଘଟିଛି ବଡ଼ ଅଘଟଣ। ସମୁଦ୍ରରେ ଜଳିଛି ୩ଟି ତେଲ ବୋଝେଇ ଜାହାଜ। ନୌସେନା ମାଇନ୍ ବା ସମୁଦ୍ରରେ ବିଛାଯାଇଥିବା ବିସ୍ଫୋରକ ସହ ଧକ୍କା ହେବା ପରେ ଏହି ଜାହାଜଗୁଡ଼ିକରେ ନିଆଁ ଲାଗିଥିବା ଇରାନର ରାଷ୍ଟ୍ରାୟତ୍ତ ଗଣମାଧ୍ୟମ ପକ୍ଷରୁ ରିପୋର୍ଟ ପ୍ରକାଶ ପାଇଛି।
ଇରାନର ନୌସେନା ସୂଚନା ଅନୁସାରେ, ଶନିବାର ସକାଳେ ହର୍ମୁଜ୍ ପ୍ରଣାଳୀର ପୂର୍ବ ଭାଗରେ ଗୋଟିଏ ତେଲ ଟ୍ୟାଙ୍କର ସମୁଦ୍ରରେ ବିଛାଯାଇଥିବା ମାଇନ୍ ସହ ଧକ୍କା ହୋଇଥିଲା। ଏହାପରେ ପରବର୍ତ୍ତୀ ସମୟରେ ଆଉ ଦୁଇଟି ଜାହାଜ ମଧ୍ୟ ମାଇନ୍ ସହ ଧକ୍କା ହୋଇଥିଲେ। ଫଳରେ ତିନୋଟି ଯାକ ଜାହାଜରେ ନିଆଁ ଲାଗିଯାଇଥିଲା।
ଏନେଇ ଇରାନର ସରକାରୀ ସମ୍ବାଦ ସଂସ୍ଥା IRNA ପକ୍ଷରୁ ରିଭଲ୍ୟୁସନାରୀ ଗାର୍ଡସ ନୌସେନାର ବୟାନ ଉଦ୍ଧୃତ କରାଯାଇଛି। ବୟାନ ଅନୁସାରେ, ସନ୍ଧ୍ୟା ସମୟରେ ଦୁଇଟି ଜାହାଜ ନିଷିଦ୍ଧ ଜଳପଥ ଦେଇ ଯିବାକୁ ଚେଷ୍ଟା କରୁଥିଲେ। ଏହି ସମୟରେ ସେମାନେ ସମୁଦ୍ରରେ ବିଛାଯାଇଥିବା ମାଇନ୍ ସହ ଧକ୍କା ହୋଇଥିଲେ। ଏହା ଦ୍ବାରା ଜୋରଦାର ବିସ୍ଫୋରଣ ସହ ଜାହାଜଗୁଡ଼ିକରେ ନିଆଁ ଲାଗିଯାଇଥିଲା।
ତେବେ ଇରାନର ଏହି ଦାବିକୁ ରଏଟର୍ସ ପକ୍ଷରୁ ତୁରନ୍ତ ସ୍ୱାଧୀନ ଭାବେ ଯାଞ୍ଚ କରାଯାଇପାରିନାହିଁ। ଘଟଣାର ପ୍ରକୃତ ସ୍ଥିତି ସମ୍ପର୍କରେ ଏବେ ମଧ୍ୟ ସ୍ପଷ୍ଟତା ଆସିନାହିଁ।
ସେପଟେ ହର୍ମୁଜ୍ ପ୍ରଣାଳୀ ଦେଇ ଯାତାୟାତ କରୁଥିବା ଜାହାଜଗୁଡ଼ିକ ଉପରେ ଇରାନ୍ କଟକଣା ଲଗାଇଛି। ଏହି ନିୟମ ଉଲ୍ଲଂଘନ କରୁଥିବା ଜାହାଜଗୁଡ଼ିକ ଉପରେ ଇରାନ୍ ଆକ୍ରମଣ କରୁଥିବା ଅଭିଯୋଗ ହୋଇଛି। ରଣନୈତିକ ଦୃଷ୍ଟିରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏହି ଜଳପଥ ଉପରେ ନିଜର ନିୟନ୍ତ୍ରଣ ବଢ଼ାଇବା ସହ ଆମେରିକା ଉପରେ ଚାପ ସୃଷ୍ଟି କରିବାକୁ ଇରାନ୍ ଏଭଳି ପଦକ୍ଷେପ ନେଉଥିବା କୁହାଯାଉଛି।
