ନନ୍ଦିଘୋଷ ବ୍ୟୁରୋ: ଏକ ପେଡ୍ ମା କେ ନାମ ଅଭିଯାନର ସାଂଘାତିକ ଚିତ୍ର। କେବଳ କାଗଜ କଲମରେ ଲାଗୁଛି ଗଛ। ବୃକ୍ଷରୋପଣ କରାଯାଇଥିବା ସ୍ଥାନ ପାଲଟିଛି ଚରାଭୂଇଁ। ପଞ୍ଚାୟତକୁ ଆସୁଥିବା ଲକ୍ଷାଧିକ ଟଙ୍କା ହରିଲୁଟ୍ ହେଉଥିବା ଅଭିଯୋଗ। ଏକ ପେଡ୍ ମା କେ ନାମ ଅଭିଯାନରେ ବନ ବିଭାଗ ପକ୍ଷରୁ ଗତ ବର୍ଷ ସେପ୍ଟେମ୍ବରରେ ପ୍ରତି ପଞ୍ଚାୟତକୁ ୫୦୦ ଚାରା ଯୋଗାଇ ଦିଆଯାଇଥିଲ।। ରାଜନଗର ଲୁଣା ଜଙ୍ଗଲ ବନଖଣ୍ଡ ଡିଭିଜନ ଅଧୀନରେ ଥିବା କେନ୍ଦ୍ରାପଡା ଓ ଜଗତସିଂହପୁର ଜିଲ୍ଲାର ୨୫୪ ପଞ୍ଚାୟତରେ ୧ ଲକ୍ଷ ୨୭ ହଜାର ଚାରା ଯୋଗାଇ ଦିଆଯାଇଥିବା ସରକାରୀ ଦସ୍ତାବିଜ କହୁଛି। ହେଲେ ବାସ୍ତବ ସ୍ଥିତି ସମ୍ପୁର୍ଣ୍ଣ ଭିନ୍ନ । କାଁଭାଁ ଗଛ ଥିବା ଦେଖିବାକୁ ମିଳିଛି।
ବନ ବିଭାଗ ପକ୍ଷରୁ ମୋଟ ୨୫ ଲକ୍ଷ ୩୮ ହଜାର ୧୬୫ ଟଙ୍କାର କେବଳ ପରିବହନ ଖର୍ଚ୍ଚ ହୋଇଥିବା ସରକାରୀ ଦସ୍ତାବିଜରେ ଉଲ୍ଲେଖ ରହିଛି। ସେହିପରି NREGS ଅଧିନରେ ଚାରା ଲଗାଇବା ସହ ଏହାର ରକ୍ଷଣାବେକ୍ଷଣ ଓ ଯତ୍ନ ନେବା ପାଇଁ ପଞ୍ଚାୟତ ସ୍ତରରେ ୧ ଲକ୍ଷରୁ ଉର୍ଦ୍ଧ୍ବ ଟଙ୍କା ଖର୍ଚ୍ଚ ହୋଇଛି। ହେଲେ ପଞ୍ଚାୟତ ଗୁଡ଼ିକରେ ମାତ୍ର ୨୦ରୁ ୩୦ଟି ଚାରା ଲଗାଯିବା ସହ ଫଟୋ ଉଠାଇ କାମ ସାରିଦିଆଯାଇଥିବା ଅଭିଯୋଗ ହୋଇଛି। ଘଟଣାର ପୁଙ୍ଖାନୁପୁଙ୍ଖ ତଦନ୍ତ ସହ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।
