ନନ୍ଦିଘୋଷ ବ୍ୟୁରୋ: ରାସ୍ତା ନିର୍ମାଣକୁ ନେଇ ବିବାଦ। ବିଲଡର୍ସଙ୍କ ମଧୁଚନ୍ଦ୍ରିକାରେ ରାତି ଅଧିଆ କାମ ହେଉଥିବା ଅଭିଯୋଗ। ବେଆଇନ ମୋରମ ବ୍ୟବହାରକୁ ନେଇ ପ୍ରଶ୍ନ ଉଠାଇଲେ ଗ୍ରାମବାସୀ। ଖୋର୍ଦ୍ଧା ଜିଲ୍ଲା ଜଟଣୀ ବ୍ଲକ ଅଞ୍ଚଳରୁ ଆସିଛି ଏଭଳି ଅଭିଯୋଗ। ତରାବୋଇ ଗ୍ରାମପଞ୍ଚାୟତର ନୂଆସାହି ଛକ ଠାରୁ ବରହମପୁରା ପର୍ଯନ୍ତ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ କୋଟି କୋଟି ଟଙ୍କାର ଏକ ରାସ୍ତା ନିର୍ମାଣ କରାଯାଉଛି। ରାତି ଅଧିଆ ରାସ୍ତା ନିର୍ମାଣ କାର୍ଯ୍ୟ ହେଉଥିବାରୁ ଅସନ୍ତୋଷ ପ୍ରକାଶ କରିଛନ୍ତି ଗ୍ରାମବାସୀ। ସ୍ଥାନୀୟ ଜନ ପ୍ରତିନିଧି ହୋଇ ବି ରାସ୍ତା ନିର୍ମାଣ ନେଇ ତାଙ୍କ ନିକଟରେ କୌଣସି ସୂଚନା ନଥିବା କହିଛନ୍ତି ତରାବୋଇ ସରପଞ୍ଚ।
ବିଲଡର୍ସଙ୍କ ମଧୁଚନ୍ଦ୍ରିକାରେ ରାସ୍ତା ନିର୍ମାଣ ହେଉଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ଅନ୍ୟପଟେ କୋଟି କୋଟି ଟଙ୍କା ବ୍ୟୟରେ ନିର୍ମାଣ ହେଉଥିବା ଏହି ରାସ୍ତାରେ ବେଆଇନ ମୋରମ ପଡୁଥିବାରୁ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ସରକାର ଜଟଣୀ ଅଞ୍ଚଳରେ ମୋରମକୁ ବେଆଇନ ଘୋଷଣା କରିଥିବା ବେଳେ ଗ୍ରାମ୍ୟ ଉନ୍ନୟନ ବିଭାଗ କିଭଳି ରାସ୍ତା ନିର୍ମାଣ କାର୍ଯ୍ୟରେ ଶହ ଶହ ଟ୍ରିପ ମୋରମ ବ୍ୟବହାର କରୁଛି, ତାକୁ ନେଇ ଉଠିଛି ପ୍ରଶ୍ନ।
