ଏବେ ସୁଧୁରିବନି ବନ୍ୟା ସ୍ଥିତି, ଜଳ ନିଷ୍କାସନକୁ ଲାଗିବ ଆହୁରି ୩ ଦିନ
ଭୁବନେଶ୍ୱର: ଅଧା ରାଜ୍ୟ ବନ୍ୟା ଜଳରେ ଉବୁଟୁବୁ । ବର୍ଷା ଥମି ଯାଇଥିଲେ ମଧ୍ୟ ଏବେ ବି ଅଧା ରାଜ୍ୟ ପାଣି ଘେରରେ । ଜଳବନ୍ଦୀରେ ରହିଛି ଅନେକ ଗାଁ । ଯାତାୟତ ବି ଠପ୍ । ହେଲେ ମହାନଦୀରେ ଜଳସ୍ତର ସ୍ଥିର ରହିଥିବା ସୂଚନା ମିଳିଥିବା ବେଳେ ଏବେ ଅନେକ ସ୍ଥାନରେ ବନ୍ୟା ପରିସ୍ଥିତି ସୁଧୁରୁଥିବା ଦେଖାଯାଇଛି । ତେବେ ଏଭଳି ପରିସ୍ଥିତିରେ ଏବେ ବନ୍ୟା ପୀଡ଼ିତଙ୍କ ପାଇଁ ନୂଆ ସଙ୍କଟ ଦେଖାଯାଇଛି । ମହାନଦୀରେ ପ୍ରବାହିତ ହୋଇ ବନ୍ୟା ଜଳ ସମୁଦ୍ର ମିଶିବାକୁ ଥିବା ବେଳେ ତାହା ଏବେ ବନ୍ଦ ହୋଇଯାଇଛି । ବନ୍ୟା ଜଳ କମିବା ପାଇଁ ଆହୁରି ତିନି ଦିନ ସମୟ ଲାଗିବ ବୋଲି ବିଶେଷଜ୍ଞମାନେ ମତ ଦେଇଛନ୍ତି ।
ବିଶେଷଜ୍ଞଙ୍କ କହିବାନୁଯାୟୀ ପୂର୍ଣ୍ଣିମା ଯୋଗୁଁ ଏବେ ପାଣି ଟାଣୁନି ସମୁଦ୍ର । ଜଳ ନିଷ୍କାସନ ପାଇଁ ଆହୁରି ୩ ଦିନ ସମୟ ଲାଗିବ । ବର୍ତ୍ତମାନ ପ୍ରତି ସେକେଣ୍ଡରେ ହୀରାକୁଦକୁ ୩ ଲକ୍ଷ ୫୯ ହଜାର କ୍ୟୁସେକ୍ ଜଳ ପ୍ରବେଶ କରୁଛି । ଅନ୍ୟପଟେ ୨୪ଟି ଗେଟ୍ ଦେଇ ୪ ଲକ୍ଷ ଘନଫୁଟ୍ ଜଳ ନିଷ୍କାସିତ ହେଉଛି । ସେହିଭଳି ମୁଣ୍ଡୁଳିରେ ୯ ଲକ୍ଷ ୮୦ ହଜାର ଘନଫୁଟ ବନ୍ୟାଜଳ ଏବେ ବି ପ୍ରବାହିତ ହେଉଛି । ହୀରାକୁଦରେ ଏବେ ଜଳ ସ୍ଥିର ରହିଛି । ଜଳସ୍ତର ୬୨୫.୭୯ ଫୁଟ୍ ରହିଛି । ଏ ପର୍ଯ୍ୟନ୍ତ ରାଜ୍ୟରେ ମୋଟ ୩୬ଟି ଘାଇ ସୃଷ୍ଟି ହୋଇଥିବା ସୂଚନା ରହିଛି ।
ପୂର୍ଣ୍ଣମୀ ପରେ ରାଜ୍ୟର ବନ୍ୟା ସ୍ଥିତିରେ ସୁଧାର ଆସିବ । ଏବେ ବନ୍ୟା ଜଳକୁ ସମୁଦ୍ରରେ ମିଶିବାକୁ ଦେଉନି ଜୁଆର । ୭୨୯ ଘଳିଆ ମରାଯାଇଛି । ଘାଇ ମରାମତି କାର୍ଯ୍ୟ ମଧ୍ୟ ଆରମ୍ଭ ହୋଇସାରିଲାଣି । ଯାଜପୁର ଦତ୍ତପୁରରେ ମଧ୍ୟ ଘାଇ ମରାମତି କାମ ଆରମ୍ଭ ହୋଇଥିବା ବେଳେ ମୟୁରଭଞ୍ଜରେ ମଧ୍ୟ ମରାମତି କାମ ଆରମ୍ଭ ହେବାକୁ ଯାଉଛି । ତେବେ ବର୍ଷା ପାଇଁ ମରାମତି କାମ ବିଳମ୍ବ ହେଉଥିବା ସୂଚନା ମିଳିଛି ।
