ଆକାଶ ଛୁଆଁ ହେଲାଣି ପିଆଜ ଦର ! ଜାଣନ୍ତୁ ଦରବୃଦ୍ଧି ପଛର ୪ କାରଣ ଓ କେବେ କମିବ ମୂଲ୍ୟ…

ନୂଆଦିଲ୍ଲୀ: ଦେଶବ୍ୟାପୀ ପିଆଜ ଦରରେ ଲାଗିଛି ନିଆଁ । ନିଇତି ବଢ଼ି ଚାଲିଛି ଦର । ଲଗାତାର ଦ୍ୱିତୀୟ ବର୍ଷ ଖୁଚୁରା ବଜାରରେ ବଢ଼ିଛି ପିଆଜର ଭାଉ । ମୁମ୍ବାଇ ଓ ପୁନେରେ ପିଆଜର ପାଇକାର ଦର କେଜି ପିଛା ୧୦୦ ଟଙ୍କା ପହଞ୍ଚିଛି । ସରକାରଙ୍କ ଅନୁସାରେ ଦେଶରେ ପିଆଜର ଖୁଚୁରା ମୂଲ୍ୟ ୫୫ ଟଙ୍କା ୬୦ ପଇସା କେଜି ପିଛା ଥିଲା । ସେହିଭଳି ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ପିଆଜର କେଜି ପିଛା ଦର ୫୦ ଟଙ୍କା ଥିଲା । ତେବେ, କାହିଁକି ଅଚାନକ ବଢ଼ିଲା ପିଆଜର ଦର ।

ସ୍ଥିତି ବିଗାଡ଼ିଲା ବର୍ଷା

ଭାରତରେ ତିନି ଋତୁ ଖରିଫ (ଗ୍ରୀଷ୍ମ), ଖରିଫ (ଗ୍ରୀଷ୍ମ ପରେ) ଓ ରବି (ଶୀତ)ରେ ପିଆଜ ଚାଷ ହୁଏ । ସେପ୍ଟେମ୍ବରରେ ଖରିଫ ପିଆଜର ଅମଳ ଆରମ୍ଭ ହୋଇଥାଏ । ନଭେମ୍ବର ପରେ ଖରିଫ ଓ ଏପ୍ରିଲ ପରେ ରବି ପିଆଜ ଆସେ । ଗତବର୍ଷ ଓ ଚଳିତବର୍ଷ ଦକ୍ଷିଣ-ପଶ୍ଚିମ ମୌସୁମୀ ବର୍ଷା ପରେ ପିଆଜ ଚାଷ ବେଶ୍ ପ୍ରଭାବିତ ହୋଇଥିଲା । କର୍ଣ୍ଣାଟକରେ ପିଆଜ ଖରିଫ ଫସଲ (ଗ୍ରୀଷ୍ମ) ସେପ୍ଟେମ୍ବରରେ ବଜାରକୁ ଆସେ । ଯାହାକି ପ୍ରବଳ ବର୍ଷା ପାଇଁ ପ୍ରଭାବିତ ହୋଇଛି । ସେହିଭଳି ଆନ୍ଧ୍ରପ୍ରଦେଶ, ତେଲଙ୍ଗାନା ଓ ମହାରାଷ୍ଟ୍ରରେ ବର୍ଷା ପିଆଜ ଫସଲକୁ ନଷ୍ଟ କରି ଦେଇଛି ।

ପିଆଜ ମଞ୍ଜିର ଅଭାବ

ପିଆଜ ଦର ଆକାଶ ଛୁଆଁ ହେବା ପଛରେ ଦ୍ୱିତୀୟ କାରଣ ହେଉଛି ମଞ୍ଜିର ଅଭାବ । ଡା. ପିକେ ଗୁପ୍ତାଙ୍କ ଅନୁସାରେ- ଗତବର୍ଷ ରବି ଓ ଖରିଫ ପିଆଜ ଫସଲ ପାଇଁ ମଞ୍ଜିର ଅଭାବ ଥିଲା ଓ ଚଳିତବର୍ଷ ରବି ଫସଲ ପାଇଁ ମଞ୍ଜିର ଅଭାବ ରହିଛି । ଫଳରେ ଦର ବୃଦ୍ଧି ଘଟିବ । ଦେଶର ଆବଶ୍ୟକତା ପିଆଜ ମଞ୍ଜିର ଅତି କମରେ ୧୦ ପ୍ରତିଶତ ନିଅଣ୍ଟ ରହୁଛି । କାରଣ ଅଧିକାଂଶ କୃଷକ ଦରବୃଦ୍ଧି ପରେ ଗତବର୍ଷର ରବି ଋତୁର ପୁନଃ ପ୍ରତିରୋପଣ ପାଇଁ ରଖିଥିବା ପିଆଜକୁ ବିକି ଦିଅନ୍ତି । ଯାହାର ପ୍ରଭାବ ଖରିଫ ଚାଷ ଉପରେ ପଡ଼ୁଛି । ଏବଂ ରବି ଫସଲ ସମୟରେ ମଧ୍ୟ ସମାନ ସ୍ଥିତି ଉପୁଜୁଛି ।

ଷ୍ଟକ ପର୍ଯ୍ୟାପ୍ତ ନୁହେଁ

ଚେନ୍ନାଇସ୍ଥିତ ରାଜତି ଗ୍ରୁପର ନିର୍ଦ୍ଦେଶକ ମଦନ ପ୍ରକାଶ (ପିଆଜ ରପ୍ତାନକାରୀ) କହିଛନ୍ତି- କେନ୍ଦ୍ର ସରକାରଙ୍କ ପାଖରେ ପିଆଜ ଷ୍ଟକ୍ ପର୍ଯ୍ୟାପ୍ତ ନାହିଁ । ସେ ସରକାରଙ୍କ ପିଆଜ ଷ୍ଟକ୍ (ଏକ ଲକ୍ଷ ଟନ୍) ଉପରେ ଆଶ୍ଚର୍ଯ୍ୟ ପ୍ରକାଶ କରିଛନ୍ତି । ସେ କହିଛନ୍ତି କେବଳ ତାମିଲନାଡ଼ୁକୁ ଗୋଟିଏ ଦିନରେ ୨ ହଜାର ଟନ୍ ପିଆଜ ଆବଶ୍ୟକ । ଏଥିରୁ ଆପଣ ଅନୁମାନ କରିପାରିବେ ଦେଶବ୍ୟାପୀ କେତେ ଆବଶ୍ୟକତା ରହିଛି । ସେ ଆହୁରି କହିଛନ୍ତି- ଭୀଷଣ ବର୍ଷା ପାଇଁ ପିଆଜ ଫସଲରେ ଅନ୍ଥ୍ରୋନୋଜ ଓ ଟ୍ୱିଷ୍ଟର ନାମକ ବ୍ୟାକ୍ଟେରିଆ ବଢ଼ି ଯାଇଛନ୍ତି । ଯେଉଁଥିପାଇଁ ୭୦ ପ୍ରତିଶତ ପିଆଜ ଫସଲ କ୍ଷତିଗ୍ରସ୍ତ ହୋଇଛି । ଏଥିପାଇଁ ରବି ଫସଲର ୩୫ ପ୍ରତିଶତ ସଂରକ୍ଷଣ ମଧ୍ୟ ନଷ୍ଟ ହୋଇଛି ।

ଅସ୍ଥିର ପ୍ରିମିୟମ୍

ଏମସିଏକ୍ସ ଅଧ୍ୟୟନ ଅନୁସାରେ ଦ୍ରବ୍ୟର ଆନୁମାନିକ ଅଭାବ ହେତୁ ପିଆଜର ଦର ବୃଦ୍ଧିର ଚତୁର୍ଥ କାରଣ ‘ଅସ୍ଥିର ପ୍ରିମିୟମ୍’ । ଏଥିପାଇଁ କୃଷି ଉତ୍ପାଦନ ମାର୍କେଟିଂ କମିଟିର ବଜାର ଦର ଖୁଚୁରା ଠାରୁ ପ୍ରାୟ ଦୁଇଗଣ ହୋଇଯାଏ । କୃଷି ଅର୍ଥଶାସ୍ତ୍ରୀଙ୍କ ପ୍ରକାରେ- ଉତ୍ପାଦନ କମ୍ ହେବା କ୍ଷଣି ଦର ଓ ପ୍ରିମିୟମ୍ ଅଚାନକ ବଢ଼ିଯାଏ । ତେବେ, ଡା. ଗୁପ୍ତା ପିଆଜ ମୂଲ୍ୟ ବୃଦ୍ଧି ଉପରେ ଅଙ୍କୁଶ ଲଗାଇବା ଉପରେ ଆଶା ପ୍ରକାଶ କରିଛନ୍ତି । କହିଛନ୍ତି- କେନ୍ଦ୍ର ସରକାର ଏଥିପାଇଁ ବିଭିନ୍ନ ପଦକ୍ଷେପ ନେଉଛନ୍ତି । ବିଶେଷ କରି ଇଜିପ୍ଟ ଭଳି ଦେଶରୁ ଆମଦାନୀ ଅନୁମତି ଦେଉଛନ୍ତି ।