ଫ୍ରାନ୍ସର ଏୟାର ଷ୍ଟ୍ରାଇକ୍, ୫୦ ଆତଙ୍କବାଦୀ ନିହତ
ଫ୍ରାନ୍ସ: ଫ୍ରାନ୍ସ ବାୟୁ ସେନା ପକ୍ଷରୁ ମାଲିରେ ଥିବା ଆତଙ୍କବାଦୀ ଆଡ୍ଡା ଉପରେ ବିସ୍ଫୋରଣ କରାଯାଇଛି । ବାୟୁସେନାର ଏହି ଏୟାର୍ ଷ୍ଟ୍ରାଇକ୍ରେ ପ୍ରାୟ ୫୦ ଜଣ ଆତଙ୍କବାଦୀ ନିହତ ହୋଇଥିବା ଆଶଙ୍କା କରାଯାଉଛି । ଫ୍ରାନ୍ସର ସେନା ମୁଖପାତ୍ର କର୍ଣ୍ଣେଲ ଫ୍ରେଡେରିକ୍ ବାର୍ବାରୀ କହିଛନ୍ତି ଯେ, ଚାରିଜଣ ଆତଙ୍କବାଦୀ ଧରାପଡ଼ିଛନ୍ତି । ଏକ ଆତ୍ମଘାତୀ ଜ୍ୟାକେଟ ମଧ୍ୟ ଜବତ କରାଯାଇଛି । ସେ ଆହୁରି ମଧ୍ୟ କହିଛନ୍ତି ଯେ, ଏହି ସଂଗଠନ ଫ୍ରାନ୍ସ ସେନା ଉପରେ ଆକ୍ରମଣ କରିବାର ଯୋଜନା କରୁଥିଲା ।
ଫ୍ରାନ୍ସର ବୁର୍କିନା ଫାସୋ ଏବଂ ନାଇଜର ସୀମା ନିକଟରେ ଅନେକ ମୋଟରସାଇକେଲ ଏକାଠି ଯାତ୍ରା କରୁଥିବା ଦେଖାଯାଇଥିଲା । ସେହି ମୋଟର ସାଇକେଲରେ ଆତଙ୍କବାଦୀ ଯାଉଥିବା ଖବର ପାଇ ଦୁଇଟି ମିରାଜ ବିମାନରୁ ସେମାନଙ୍କ ଉପରକୁ ମିଶାଇଲ ମାଡ଼ କରାଯାଇଥିଲା ।
ଗତ ସପ୍ତାହରେ ଫ୍ରାନ୍ସ ଏହି ଅଞ୍ଚଳରେ ଜିହାଦୀମାନଙ୍କ ବିରୋଧରେ ଅଭିଯାନ ଆରମ୍ଭ କରିଥିଲା । ଫ୍ରାନ୍ସର ପ୍ରତିରକ୍ଷା ମନ୍ତ୍ରୀ ଫ୍ଲୋରେନ୍ସ ପାର୍ଲୀ କହିଛନ୍ତି, ମୁଁ ଏମିତି ଏକ ଅପରେସନ୍ ବିଷୟରେ କହିବାକୁ ଚାହେଁ ଯାହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହାକୁ ଅକ୍ଟୋବର ୩୦ରେ କାର୍ଯ୍ୟକାରୀ କରାଯାଇଥିଲା । ଏହା ଅପରେସନ୍ରେ ପ୍ରାୟ ୫୦ ଜଣ ଆତଙ୍କବାଦୀ ନିହତ ହୋଇଥିଲେ । ଖାଲି ସେତିକି ନୁହେଁ ଏହି ଅପରେସନ୍ରେ ବିପୁଳ ପରିମାଣର ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ସାମଗ୍ରୀ ଉଦ୍ଧାର କରାଯାଇଛି ।
ଆଇଏସ୍ ଆତଙ୍କବାଦୀଙ୍କ ବିରୋଧରେ ଅପରେସନ୍ ଜାରି:
ସେନା ମୁଖପାତ୍ର ବାର୍ବରୀ ଏହା ମଧ୍ୟ କହିଛନ୍ତି ଯେ, ମାଲିରେ ଆଇଏସ୍ ଆତଙ୍କବାଦୀର ଶାଖା ‘ଇସ୍ଲାମିକ୍ ଷ୍ଟେଟ୍ ଇନ୍ ଗ୍ରେଟର ସାହାରା’ ବିରୋଧରେ ମଧ୍ୟ ଏକ ଅପରେସନ ଆରମ୍ଭ ହୋଇଛି । ଏଥିରେ ପ୍ରାୟ ୩୦୦୦ ସୈନିକଙ୍କୁ ନିୟୋଜିତ କରାଯାଇଛି । ଏହି ଅପରେସନ୍ ପ୍ରାୟ ମାସେ ପୂର୍ବରୁ ଆରମ୍ଭ ହୋଇଥିଲା । ଏହାର ଫଳାଫଳ ଆଗାମୀ ଦିନରେ ପ୍ରକାଶ କରାଯିବ । ମିଳିତ ଜାତିସଂଘ ପକ୍ଷରୁ ଶାନ୍ତି ପ୍ରତିଷ୍ଠା ପାଇଁ ମାଲିରେ ୧୩ ହଜାର ସୈନ୍ୟଙ୍କୁ ମୁତୟନ କରାଯାଇଛି । ଏହା ସହିତ ଫ୍ରାନ୍ସ ଏହି ଅଞ୍ଚଳରେ ୫ ହଜାର ୧୦୦ ସୈନ୍ୟଙ୍କୁ ନୟୋଜିତ କରିଛି ।
