ବିହାର ପରେ ତ୍ରିପୁରା: ଭୋଟ ଚୋରି ବିରୋଧରେ କଂଗ୍ରେସର ଅଭିଯାନ

ବିହାର ପରେ ତ୍ରିପୁରାରେ ପ୍ରଦେଶ କଂଗ୍ରେସ କମିଟି ପକ୍ଷରୁ ଆଜି ଭୋଟ ଚୋରି ବିରୋଧରେ ଅଭିଯାନ।ଭୋଟ ଚୋର ଗାଦି ଛାଡ଼ ଆହ୍ବାନରେ ଏହି ରାଲି ଆୟୋଜିତ ହେବ । ପ୍ରଶାସନିକ ପରିଚାଳନା, ନିଯୁକ୍ତି, ଆଇନଶୃଙ୍ଖଳା ପ୍ରସଙ୍ଗରେ ତ୍ରିପୁରା ସରକାରଙ୍କ ବିରୋଧରେ ଏହି ଆନ୍ଦୋଳନ କରାଯିବ । ତ୍ରିପୁରା ପିସିସି ସଭାପତି ପ୍ରବୀର ଚକ୍ରବର୍ତ୍ତୀ କହିଛନ୍ତି- ଏହି ରାଲି ଅଗରତାଲା ପ୍ରେସ କ୍ଲବରୁ ରାଜ୍ୟ ସଚିବାଳୟ ଅଭିମୁଖେ ଯିବ ଏବେ ସେଠାରେ ପ୍ରତିବାଦ ଆନ୍ଦୋଳନ କରାଯିବ । ଏଥିରେ ବରିଷ୍ଠ ନେତାମାନେ ସାମିଲ ହେବେ । ରାଜ୍ୟରେ ହେରୋଇନ ସମେତ ନିଶାଦ୍ରବ୍ୟର ଚୋରାଚାଲାଣ ଚାଲିଛି । ରାଜ୍ୟକୁ ନିଶାମୁକ୍ତ କରିବା ସ୍ଲୋଗାନ ବିଫଳ ହୋଇଛି । ଏହା ସହ ଅପରାଧ, ଦୁର୍ନୀତି, ରାଜନୈତିକ ହିଂସା ଆଦି ଚରମ ସୀମାରେ ପହଞ୍ଚିଛି ବୋଲି ଅଭିଯୋଗ କରିଛି କଂଗ୍ରେସ । ରାଜ୍ୟରେ ହିଂସାମୁକ୍ତ ଶାସନ ପ୍ରତିଷ୍ଠାରେ ବିଜେପି ବିଫଳ ହୋଇଥିବା ଦର୍ଶାଇ କଂଗ୍ରେସ ରାସ୍ତାକୁ ଓହ୍ଲାଇବ ।