ନିଶାଗ୍ରସ୍ତ ଅବସ୍ଥାରେ ବିମାନ ଚଳାଉଥିଲେ, ପାଇଲଟ୍ ବରଖାସ୍ତ

ନୂଆଦିଲ୍ଲୀ: ଚାକିରି ନେଲା ମଦ । ମଦ ପିଇ ଚାକିରି ହରାଇଛନ୍ତି ପାଇଲଟ। ନିଶାଗ୍ରସ୍ତ ଅବସ୍ଥାରେ ବିମାନ ଚଳାଉଥିବା ଏୟାର ଇଣ୍ଡିଆ ପାଇଲଟ ବରଖାସ୍ତ ହୋଇଛନ୍ତି। ଫୁକେତ-ଦିଲ୍ଲୀ ଅନ୍ତର୍ଜାତୀୟ ବିମାନ ଉଡ଼ାଇବା ସମୟରେ ପାଇଲଟ ମଦ ପିଇଥିବା ଅଭିଯୋଗ ହୋଇଥିଲା। ଆଲକହଲ ସେବନ ରିପୋର୍ଟ ପଜିଟିଭ୍ ଆସିବା ପରେ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

ଏନେଇ ଏୟାର ଇଣ୍ଡିଆ ତରଫରୁ ଡିଜିସିଏକୁ ଅବଗତ କରାଯାଇଛି। ଗତ ସପ୍ତାହରେ ପାଇଲଟ ଜଣଙ୍କ ମଦ୍ଯପାନ କରି ବିମାନ ଉଡ଼ାଇଥିବା ଅଭିଯୋଗ ଆସିଥିଲା । ପରେ ଆଲକହଲ ସେବନ ପରୀକ୍ଷା କରାଯାଇଥିଲା । ରିପୋର୍ଟ ପଜିଟିଭ୍ ଆସିବାପରେ ବିମାନଉଡ଼ାଣକାରୀ ସଂସ୍ଥା ତରଫରୁ ତାଙ୍କୁ ବରଖାସ୍ତ କରାଯାଇଛି।

“ଏଭଳି କାର୍ଯ୍ୟକଳାପ ଉପରେ ଆମେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଥାଉ । କାହା ପାଇଁ ବି ସହନଶୀଳ ମନୋବୃତ୍ତି ରଖୁନି। ଏଭଳି ସ୍ଥଳେ ଖାଲି ବରଖାସ୍ତ ନୁହେଁ ବରଂ କ୍ରିମିନାଲ୍ ଆଇନ ଅନୁସାରେ ଏଫଆଇଆର୍ ମଧ୍ୟ ଦାୟର କରିଥାଉ’’ ବୋଲି ଡିଜିସିଏ ପକ୍ଷରୁ ସୂଚନା ଦିଆଯାଇଛି।