ପଦାକୁ ଆସିଲା ଏୟାର ଇଣ୍ଡିଆର ନିରାପତ୍ତା ନେଇ ଅବହେଳା : ଦୁର୍ଘଟଣାଜନିତ ତଦନ୍ତ ଲାଗି ଦିଆଯାଉନାହିଁ ଗୁରୁତ୍ବ

ନନ୍ଦିଘୋଷ ବ୍ୟୁରୋ : ପଦାକୁ ଆସିଲା ଏୟାର ଇଣ୍ଡିଆର ନିରାପତ୍ତା ନେଇ ଅବହେଳା। ଗତ ମାର୍ଚ୍ଚରେ ବିମାନ ଦୁର୍ଘଟଣାର ତଦନ୍ତ ଓ ବିମାନ ଚଳାଚଳ ନିରାପତ୍ତା ସଂକ୍ରାନ୍ତ ପାଣ୍ଠି ଯୋଗାଣ ପ୍ରସଙ୍ଗରେ ତାଳମେଳ ରହୁ ନଥିବା ନେଇ ସଂସଦୀୟ କମିଟି ଉଦବେଗ ପ୍ରକାଶ କରିଥିଲା। ବିଶ୍ବ ସ୍ତରରେ ଭାରତ ତୃତୀୟ ବୃହତ ଆଭିଏସନ ମାର୍କେଟରେ ପରିଣତ ହୋଇଥିବାବେଳେ ନିରାପତ୍ତା ଭିତ୍ତିଭୂମି ଓ ଦୁର୍ଘଟଣାଜନିତ ତଦନ୍ତ ଲାଗି ଖୁବ୍ କମ୍ ବ୍ୟୟବରାଦକୁ ନେଇ କମିଟି ଉଦବେଗ ପ୍ରକାଶ କରିଥିଲା। ଗତ ମାର୍ଚ୍ଚ ୨୫ରେ ପର୍ଯ୍ୟଟନ, ପରିବହନ ଓ ସଂସ୍କୃତି ସମ୍ପର୍କିତ ସଂସଦୀୟ ଷ୍ଟାଣ୍ଡିଂ କମିଟି ପକ୍ଷରୁ ଏହି ରିପୋର୍ଟ ରାଜ୍ୟସଭାରେ ଦାଖଲ କରାଯାଇଥିଲା।

କମିଟି ପକ୍ଷରୁ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶକ ବା ଡିଜିସିଏ, ବିମାନ ଦୁର୍ଘଟଣା ତଦନ୍ତ ବ୍ୟୁରୋ ବା ଏଏଆଇବି ଓ ବେସାମରିକ ବିମାନ ନିରାପତ୍ତା ବା ବିସିଏଏସ ନିକଟରେ ଏହି ବିଷୟ ଅବଗତ କରାଯାଇଥିଲା।ଏପରିକି ୨୦୨୫-୨୬ ଆର୍ଥିକ ବର୍ଷ ଲାଗି ଡିଜିସିଏକୁ ୩୦ କୋଟି, ଏଏଆଇବିକୁ ୨୦ କୋଟି ଓ ବିସିଏଏସକୁ ୧୫ କୋଟି ଟଙ୍କାର ପାଣ୍ଠି ଦିଆଯାଇଥିଲା। ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ ବର୍ତ୍ତମାନ ଏଏଆଇବି କରୁଛି। ଏହି ଦୁର୍ଘଟଣାରେ ୨୭୦ ଲୋକଙ୍କ ମୃତ୍ୟୁ ଘଟିଥିଲା। ଏହା ସହ ଡିଜିସିଏ, ବିସିଏଏସ ଓ ଏଏଆଇରେ ସୀମିତ ମାନବ ଶକ୍ତି ନେଇ ବି କମିଟି ଉଦବେଗ ପ୍ରକାଶ କରିଥିଲା।