ଆନନ୍ଦପୁର: ନିଦ ହଜାଇ ଦେଲାଣି ଚକଡା ପୋକ । ଚାଷୀଙ୍କୁ ଘାରିଛି ଚକଡା ଦାଉରୁ ଧାନ ଫସଲକୁ ବଞ୍ଚାଇବାର ଚିନ୍ତା । ସାର, କୀଟନାଶକ ପକାଇ ନୟାନ୍ତ ହେଲେଣି ଚାଷୀ, ହେଲେ ଚକଡା ପୋକ ଯିବାର ନାଁ ନେଉନି । ଗୋଟିଏ କ୍ଷେତରୁ ଆଉ ଗୋଟିଏ କ୍ଷେତକୁ ମାଡିଚାଲିଛି ପୋକ। ସମ୍ପୂର୍ଣ୍ଣ ଧାନ ଗଛ ନଷ୍ଟ ହେବାକୁ ବସିଥିବା ବେଳେ ଧାର କରଜ ସୁଝିବା ଚିନ୍ତାରେ ଚାଷୀକୁଳ ।
କିଛି ଦିନ ପୂର୍ବରୁ ଭଲ ଧାନ ଚାଷ ହୋଇ ଗଛରୁ ବାହାରୁଥିଲା ଧାନକେଣ୍ଡା। ସବୁଜୀମା ପରିବେଶ ସୃଷ୍ଟି ହୋଇ ଧାନକ୍ଷେତରେ ଗଛସବୁ ଲହରି ମାରିବା ଆରମ୍ଭ କରୁଥିବା ବେଳେ ଚାଷୀଙ୍କ ଅଣ୍ଟା ଭାଙ୍ଗିଦେଇଛି ଚକଡା ପୋକ। ପ୍ରଥମେ ଗୋଟିଏ ଦୁଇଟି ସ୍ଥାନରୁ ଆରମ୍ଭହୋଇ ଏବେ ଆନନ୍ଦପୁର ଉପଖଣ୍ଡ ଘସିପୁରା ବ୍ଲକର ଅନେକ ଗାଁର ଶହ ଶହ ଏକର ଚାଷ ଜମିକୁ ବ୍ୟାପିଯାଇଛି ଚକଡା ପୋକ। ଧାର କରଜ କରି ଧାନ ଚାଷ କରିଥିବା ଚାଷୀ ଏବେ ପରିବାର ଚଳାଇବା ଚିନ୍ତାରେ।
ଚକଡା ପୋକ ଦାଉରୁ ଫସଲକୁ ବଞ୍ଚାଇବାକୁ ଚାଷୀମାନେ ଅନେକ ଉପାୟ ଆପଣେଇଲେଣି । କୃଷୀ ବିଭାଗକୁ ଯାଇ ପରାମର୍ଶ ଅନୁସାରେ ସାର, କିଟନାସକ ଫସଲରେ ପକାଇ ଅନେକ ଖର୍ଚ୍ଚାନ୍ତ ହେଲେଣି। ହେଲେ ଚକଡା ରୋଗ ଦମନର ନା ଧରୁନାହିଁ। ବର୍ତ୍ତମାନ ସୁଦ୍ଧା ନା ପହଁଞ୍ଚିଛନ୍ତି କୃଷି ବିଭାଗର କୌଣସି କର୍ମଚାରୀ ନା ଅଧିକାରୀ। ଚକଡାକୁ ନେଇ ଚାଷୀଙ୍କୁ ସଚେତନ କରିବା ସହିତ କ୍ଷେତ୍ର ପରିଦର୍ଶନ କରି ଜିଲ୍ଲା ସ୍ତରୀୟ ଅଧିକାରୀଙ୍କୁ ସୂଚନା ଦିଆ ଯାଉଛି। ତୁରନ୍ତ ଏହାର ସମାଧାନ ଦିଗରେ ପଦକ୍ଷେପ ନିଆଯିବ ବୋଲି କହିଛନ୍ତି ଘସିପୁରା ବ୍ଲକ କୃଷୀ ଅଧିକାରୀ।
