ନନ୍ଦିଘୋଷ ବ୍ୟୁରୋ : ଆସନ୍ତା କାଲି ବିହାରର ପ୍ରଥମ ପର୍ଯ୍ୟାୟ ନିର୍ବାଚନ । ଗତକାଲି ପ୍ରଚାର ସରିଥିବା ବେଳେ ଆଜି ସାଇଲେନ୍ସ ପିରିୟଡ୍ । ପ୍ରଥମ ପର୍ଯ୍ୟାୟରେ ୧୨୧ଟି ଆସନରେ ପଡ଼ିବ ଭୋଟ। ୧୩୧୪ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବ। କେବଳ ପାଟଣା ବିଧାନସଭାରେ ଅଛନ୍ତି ୧୪୯ ପ୍ରାର୍ଥୀ। ପ୍ରଥମ ପର୍ଯ୍ୟାୟ ମତଦାନର ବେଶ୍ ଗୁରୁତ୍ଵ ରହିଛି। କାରଣ ଏହି ପର୍ଯ୍ୟାୟରେ ଯାହାର ପଲା ଭାରି ରହିବ, ପୂରା ଜନମତ ତା ସପକ୍ଷରେ ଯିବ ବୋଲି ସମୀକ୍ଷକ କହୁଛନ୍ତି। ଆଗରୁ ତ ଲାଲୁ-ନୀତୀଶ ହିଁ ବିହାର ରାଜନୀତିରୁ ଦୁଇ ମୁଖ୍ୟ ବିନ୍ଦୁ ଥିଲେ। ବାକିମାନେ ଏହି ଦୁଇ ଭେଟେରାନଙ୍କ ଚାରିପଟେ ବୁଲୁଥିଲେ। ଏଥର କିନ୍ତୁ ଗେମ୍ ବିଗାଡ଼ି ପାରନ୍ତି ନୂଆ ଖେଳାଳି ପ୍ରଶାନ୍ତ କିଶୋର। ତାଙ୍କର ଜନ ସୁରାଜ ପାର୍ଟି ପୁରା ବିହାରରେ ପ୍ରାର୍ଥୀ ଦେଇଛି। ଏହି ପାର୍ଟିର ପ୍ରଭାବ ବିହାର ନିର୍ବାଚନରେ କି ପ୍ରଭାବ ପକାଇବ, ତାକୁ ନେଇ ସମସ୍ତେ ଆଶା ଆଶଙ୍କାରେ। ବିଶେଷ କରି ପ୍ରଶାନ୍ତ କିଶୋର ବିଜେପି ଓ ଜେଡିୟୁର ଘାଟା କରିବେ ବୋଲି ଚର୍ଚ୍ଚା ହେଉଛି।
