ଦିଲ୍ଲୀରେ ଚାଲିପାରିବନି ଟୁ-ହୁଇଲର ଟାକ୍ସି
1 min read
ନୂଆଦିଲ୍ଲୀ: ବର୍ତ୍ତମାନ ଲାଗି ଦିଲ୍ଲୀରେ ଚାଲିପାରିବନି ଟୁ-ହୁଇଲର ଟାକ୍ସି । ଏନେଇ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ଏହାସହ ଟାକ୍ସି ଚାଲିବାକୁ ନେଇ ହାଇକୋର୍ଟ ଦେଇଥିବା ନିର୍ଦ୍ଦେଶ ଉପରେ ରହିତାଦେଶ ଲଗାଇଛନ୍ତି ସର୍ବୋଚ୍ଚ ଅଦାଲତ । ନୂଆ ନୀତି ତିଆରି ନହେବା ଯାଏ କୌଣସି ବଳପୂର୍ବକ କାର୍ଯ୍ୟାନୁଷ୍ଠାନ ଗ୍ରହଣ ନ କରିବାକୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ କୋର୍ଟ ।
ଆସନ୍ତା ୩୦ ତାରିଖ ସୁଦ୍ଧା ଏକ ନୂଆ ନୀତି ଆଣିବା ଲାଗି ଅଦାଲତରେ କହିଛନ୍ତି ଦିଲ୍ଲୀ ସରକାର । ଦିଲ୍ଲୀ ସରକାରଙ୍କ ପ୍ରସ୍ତାବ ସମ୍ପର୍କରେ ଗତ ସପ୍ତାହରେ କେନ୍ଦ୍ର ସରକାରଙ୍କଠାରୁ ଉତ୍ତର ମାଗିଥିଲେ କୋର୍ଟ । ଓଲା, ରାପିଡୋ ଆଦି ସଂସ୍ଥା ମୋଟର ଯାନ ଆଇନ ୧୯୮୮ର ଉଲ୍ଲଂଘନ କରୁଛନ୍ତି ବୋଲି ଦିଲ୍ଲୀ ସରକାର ଏକ ନୋଟିସ ଜାରି କରିଥିଲେ । ପ୍ରଥମେ ୫ ହଜାର ଟଙ୍କା, ଦ୍ବିତୀୟ ଥର ଲାଗି ୧୦ ହଜାର ଟଙ୍କା ଓ ବର୍ଷେ ଯାଏ ଜେଲଦଣ୍ଡ ବ୍ୟବସ୍ଥା ଏହି ଆଇନରେ ରହିଛି । ଦିଲ୍ଲୀ ସରକାରଙ୍କ ନୋଟିସ ବିରୋଧରେ କୋର୍ଟଙ୍କ ଦ୍ବାରସ୍ଥ ହୋଇଥିଲା ରାପିଡୋ ।
