ରାଜଧାନୀରେ ବ୍ୟାପୁଛି ବାର୍ଡ ଫ୍ଲୁ; ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଚିଡିଆଖାନା ବନ୍ଦ
1 min read
ନନ୍ଦିଘୋଷ ବ୍ୟୁରୋ: : ଚିନ୍ତା ବଢାଇଲା ବାର୍ଡ ଫ୍ଲୁ । ଦିଲ୍ଲୀ ଚିଡିଆଖାନାରେ H5N1 ଫ୍ଲୁ ବ୍ୟାପିବାରେ ଲାଗିଛି । ଏହାକୁ ଦୃଷ୍ଟିରେ ରଖି ପ୍ରଶାସନ ଶନିବାର ଠାରୁ ଚିଡିଆଖାନାକୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ବନ୍ଦ ରଖିବାକୁ ନିର୍ଦ୍ଦେଶ ଦେଇଛି । ଦିଲ୍ଲୀରେ ୩ ଥର ପାଇଁ ଏହା ବ୍ୟାପିବାରେ ଲାଗିଛି । ପୂର୍ବରୁ ମଧ୍ୟ ଅକ୍ଟୋବର ୨୦୧୬ରେ ଚିଡିଆଖାନାକୁ ବନ୍ଦ କରାଯାଇଥିଲା ।
ସେହି ବର୍ଷ ୭୦ରୁ ଅଧିକ ପକ୍ଷୀଙ୍କ ମୃତ୍ୟୁ ହୋଇଥିଲା। ଚଳିତ ବର୍ଷ ଦିଲ୍ଲୀ ଚିଡ଼ିଆଖାନାରେ ଗୋଟିଏ ପକ୍ଷୀର ମୃତ୍ୟୁ ପରେ ଏହାକୁ ପରୀକ୍ଷା ପାଇଁ ଭୋପାଳ ପଠାଯାଇଥିଲା । ଯେଉଁଠାରେ ପକ୍ଷୀଟି ସଂକ୍ରମିତ ହୋଇଥିବା ଜଣାପଡିଥିଲା। ଏହା ପରେ ଚିଡ଼ିଆଖାନା ଉପରେ ପ୍ରଶାସନ ନଜର ବୃଦ୍ଧି କରିଛି।
ଚିଡ଼ିଆଖାନା ବନ୍ଦ କରିବା ନିର୍ଦ୍ଦେଶ ଉପରେ ପ୍ରଶାସନ ସୂଚନା ଦେଇଛି ଯେ ଏହି ଭୂତାଣୁ ୨୧ ଦିନ ପର୍ଯ୍ୟନ୍ତ ସକ୍ରିୟ ରହିଥାଏ ଏବଂ ଅନ୍ୟ ପ୍ରାଣୀମାନଙ୍କୁ ସଂକ୍ରମିତ କରିପାରେ। ତେଣୁ ଅତି କମରେ ୨୧ ଦିନର କ୍ୱାରେଣ୍ଟାଇନ୍ ଆବଶ୍ୟକ। ନଜର ବୃଦ୍ଧି କରାଯାଇଛି ଏବଂ ସମସ୍ତ ପ୍ରବାସୀ ପକ୍ଷୀଙ୍କୁ ପୃଥକ ଭାବରେ ରଖାଯିବ। ଏହା ବ୍ୟତୀତ ଚିଡ଼ିଆଖାନାରେ ବାଘ ଏବଂ ସିଂହ ଛୁଆମାନଙ୍କର ମଧ୍ୟ ବିଶେଷ ଯତ୍ନ ନିଆଯାଉଛି କାରଣ କିଛି ଦିନ ପୂର୍ବରୁ ଚିଡ଼ିଆଖାନାରେ ସଂକ୍ରମଣ ଯୋଗୁଁ ବାଘ ଛୁଆଙ୍କ ମୃତ୍ୟୁ ଘଟିଛି। ବର୍ତ୍ତମାନ ଚିଡ଼ିଆଖାନାରେ ପ୍ରାୟ ୧,୩୫୦ ପକ୍ଷୀଙ୍କ ଉପରେ ନଜର ରଖାଯାଇଛି।
