ନନ୍ଦିଘୋଷ ବ୍ୟୁରୋ : ଖଡ଼ଗ ନଦୀରେ ଡଙ୍ଗା ବୁଡ଼ିଲା, ଶଶୁର ଓ ବୋହୂ ନିଖୋଜ। କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ଡାକା ଗାଁରେ ଘଟିଛି ଅଭାବନୀୟ ଘଟଣା। ନିଖୋଜ ଦୁଇ ଜଣ ହେଲେ ସୁଡ୍ରା ଅଞ୍ଚଳର ଶଶୁର ଗୁନ୍ଦନା ମଲ୍ଲିକ ଓ ବୋହୂ ରାଇଙ୍ଗି ମଲ୍ଲିକ।
ସୂଚନା ଅନୁଯାୟୀ, ରାଇଙ୍ଗି ନିଜ ବାପଘର ଡାଟା ଗ୍ରାମକୁ ସୁଦ୍ଧାକ୍ରିୟାରେ ଯୋଗଦେବା ପାଇଁ ଶ୍ୱଶୁର ଗୁନ୍ଦନା ମଲ୍ଲିକଙ୍କ ସହ ଯାଇଥିଲେ। ପରେ ନଦୀ ଆରପାରିରେ ଥିବା ନିଜ ମାମୁଁ ଘରକୁ ଡଙ୍ଗାରେ ଖଡ଼ଗ ନଦୀ ପାର ହୋଇ ଶଶୁରଙ୍କ ସହ ଯାଇଥିଲେ। ଗତକାଲି ଫେରିବା ବେଳେ ଡଙ୍ଗା ଭାରସାମ୍ୟ ହରାଇ ନଦୀ ମଝିରେ ଓଲଟି ପଡ଼ିଥିଲା।
ଡଙ୍ଗାରେ ଥିବା ୧୦ ଜଣଙ୍କ ମଧ୍ୟରୁ ୮ ଜଣ ଉଦ୍ଧାର ହୋଇଥିବା ବେଳେ ଗୁନ୍ଦନା ମଲ୍ଲିକ ଓ ରାଇଙ୍ଗି ମଲ୍ଲିକ ନିଖୋଜ ହୋଇଯାଇଥିଲେ। ଆଜି ଘଟଣାସ୍ଥଳରେ ବାଲିଗୁଡ଼ା ଅଗ୍ନିଶମ ବାହିନୀ ପହଞ୍ଚି ନିଖୋଜ ଦୁଇଜଣଙ୍କୁ ଉଦ୍ଧାର ପାଇଁ ନଦୀରେ ସର୍ଚ୍ଚ ଅଭିଯାନ ଜାରି ରଖିଛନ୍ତି। ସେପଟେ ସମ୍ପର୍କୀୟ ଓ ପରିବାର ଲୋକେ ମଧ୍ୟ ଖୋଜାଖୋଜି ଜାରି ରଖିଛନ୍ତି।
