ଶୁଭମଙ୍କୁ ପୁଣି ସହାୟତାର ହାତ ବଢ଼ାଇଲା ପ୍ରଶାସନ
![Bolangir Dist Administration Extended Help Hand For Shubham's Educatio](https://www.nandighoshatv.com/wp-content/uploads/2021/12/Bolangir-Dist-Administration-Extended-Help-Hand-For-Shubhams-Educatio-1024x576.jpg)
ବଲାଙ୍ଗିର: କୃତ୍ରିମ ଗୋଡ଼ ପାଇ ପୁଣି ଥରେ ଠିଆ ହୋଇଥିବା ଶୁଭମକୁ ମିଳିଲା ଆହୁରି ସରକାରୀ ସହାୟତା । ଶୁଭମର ପାଠପଢା ଦାୟିତ୍ୱ ହାତକୁ ନେଇଛି ବଲାଙ୍ଗିର ଜିଲ୍ଲା ପ୍ରଶାସନ । ଏହା ସହିତ ଶୁଭମ ଯେପରି ଭଲ ଖେଳାଳି ହୋଇ ବାହାରିବ ସେନେଇ ସମସ୍ତ ସହାୟତା ଯୋଗାଇ ଦିଆଯିବ ବୋଲି ଜିଲ୍ଲାପାଳ ଚଞ୍ଚଳ ରାଣା ପ୍ରତିଶ୍ରୁତି ଦେଇଛନ୍ତି ।
ସୁସ୍ଥ ହେବା ପରେ ବାପାଙ୍କ ସହିତ ଚାଲି ଚାଲି ଆସି ଜିଲ୍ଲାପାଳ ଚଞ୍ଚଳ ରାଣାଙ୍କୁ ଦେଖା କରିଛନ୍ତି ଶୁଭମ । ବଡ଼ ହେଲେ ଜଣେ କ୍ରୀଡ଼ାବିତ୍ ହେବେ ବୋଲି ଶୁଭମ ଜିଲ୍ଲାପାଳଙ୍କୁ କହିଛନ୍ତି । ଦିବ୍ୟାଙ୍ଗଙ୍କ ପାଇଁ ଅନୁଷ୍ଠିତ ହେଉଥିବା କ୍ରୀଡ଼ାରେ ଶୁଭମକୁ ସାମିଲ୍ କରି ଉତ୍ସାହିତ କରିବା ପାଇଁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ଶୁଭମ ଯେପରି ଭବିଷ୍ୟତରେ ଭଲ କ୍ରୀଡ଼ାବିତ ହେବ ସେନେଇ ରାଜ୍ୟ ସରକାରଙ୍କ ତରଫରୁ ସମସ୍ତ ପ୍ରକାର ସହଯୋଗ କରାଯିବ ବୋଲି ଜିଲ୍ଲାପାଳ ପ୍ରତିଶ୍ରୁତି ଦେଇଛନ୍ତି ।
ଏଥିସହିତ ଶୁଭମର ପାଠପଢ଼ା ଖର୍ଚ୍ଚ ଜିଲ୍ଲା ପ୍ରଶାସନ ବହନ କରିବ । ବଲାଙ୍ଗିର ଜିଲ୍ଲା ସଗାରପାଲି ଗାଁର ଶୁଭମ ଦୁର୍ଘଟଣାରେ ଗୋଡ଼ ହରାଇଥିଲେ । ଜିଲ୍ଲାପାଳଙ୍କ ଉଦ୍ୟମରେ କୃତ୍ରିମ ଗୋଡ଼ ଲଗାଇବା ପରେ ପୁଣି ଥରେ ଠିଆ ହୋଇ ଚାଲୁଛନ୍ତି ଶୁଭମ୍ । ଏନେଇ ନନ୍ଦିଘୋଷ ଟିଭିରେ ଖବର ପ୍ରସାରଣ ହୋଇଥିଲା ।