ଫୁଲିବାରେ ଲାଗିଛି ବ୍ରାହ୍ମଣୀ: ବୈତରଣୀ ଓ ସୁବର୍ଣ୍ଣରେଖାରେ କମିଛି ବନ୍ୟା

ଫୁଲିବାରେ ଲାଗିଛି ବ୍ରାହ୍ମଣୀ। ବୈତରଣୀ ଓ ସୁବର୍ଣ୍ଣରେଖାରେ କମିଛି ବନ୍ୟା । ତିନି ଜିଲ୍ଲାରେ ୫୦ ହଜାରରୁ ଅଧିକ ଲୋକ ପ୍ରଭାବିତ। ରିଲିଫକୁ ନେଇ ଗାଁ ଗାଁରେ ଦେଖିବାକୁ ମିଳୁଛି ଅସନ୍ତୋଷ। ବୈତରଣୀ ବନ୍ୟାରେ ଧୋଇ ହୋଇଯାଇଛି ୨୦ ନମ୍ବର ଜାତୀୟ ରାଜପଥ ସାଙ୍ଗକୁ ଗାଁ ରାସ୍ତା । ସେପଟେ ହଜାର ହଜାର ହେକ୍ଟର ଜମିରେ ସାରଦ ଧାନ ତଳି ଉପରେ ଲହଡି ମାରୁଛି ବନ୍ୟା ଜଳ । ବୈତରଣୀ ବନ୍ୟାରେ ଭଦ୍ରକ ଜିଲ୍ଲାର ଭଣ୍ଡାରିପୋଖରୀ, ଧାମନଗର, ଚାନ୍ଦବାଲି, ତିହିଡି ବ୍ଲକରେ ବ୍ୟାପକ କ୍ଷୟକ୍ଷତି ହୋଇଛି। ଏପରିକି ଆଖଣ୍ଡଳମଣି-କୁଆଖିଆ ୨୦ ନମ୍ଵର ଜାତୀୟ ରାଜପଥର ବୋଡକ ନିକଟରେ ରାସ୍ତା ଧୋଇଯାଇଥିବାରୁ ଏବେ ବିପଦପୂର୍ଣ୍ଣ ଭାବେ ଯାଆଆସ କରୁଛନ୍ତି ଲୋକେ । ସେହିପରି ୪ଟି ବ୍ଲକର ୩୫ଟି ପଞ୍ଚାୟତର ହଜାର ହଜାର ହେକ୍ଟର ଚାଷ ଜମିରେ ଧାନ ତଳି ଉଜୁଡି ଯିବାକୁ ବସିଛି। ସୁବର୍ଣ୍ଣରେଖା ନଦୀର ଜଳସ୍ତର କମିଥିଲେ ବି ଦୁର୍ଦ୍ଦଶା ବଢୁଛି। ବାଲିଆପାଳ ଓ ଭୋଗରାଇ ବ୍ଲକର ବହୁ ଗାଁ ଜଳବନ୍ଦୀ ହୋଇ ରହିଛି। ପାଣି ଘେରରେ ରହିଛି ବାଲିଆପାଳ ବ୍ଲକର ୮ରୁ ଅଧିକ ଗାଁ। ଚାଷ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିବାରୁ ବର୍ଷ ଯାକ କିପରି ପରିବାର ପ୍ରତିପୋଷଣ ହେବ ଏବଂ ଚାଷ କାମ ପାଇଁ କରିଥିବା ଋଣ କିପରି ପରିଶୋଧ କରିବେ ସେ ଚିନ୍ତାରେ ଘାରି ହେଉଛନ୍ତି ବନ୍ୟା ବିପନ୍ନ। ସେପଟେ ବନ୍ୟା ଛାଡିବା ପରେ ଯାଜପୁର ଜିଲ୍ଲା ଦଶରଥପୁର ବ୍ଲକରେ ଜଳ ସମ୍ପଦ ବିଭାଗ ପକ୍ଷରୁ ଆରମ୍ଭ ହୋଇଛି ଘାଇ ମରାମତି କାମ । ବୈତରଣୀର ଶାଖା କାଣୀ ନଦୀରେ ଭୟଙ୍କର ବନ୍ୟା ଆସିବା ଯୋଗୁ ସମଗ୍ର ଦଶରଥପୁର ଅଞ୍ଚଳ ଜଳମଗ୍ନ ହୋଇଥିଲା ।