ନନ୍ଦିଘୋଷ ବ୍ୟୁରୋ : ସରିଲା ମହଲତ, ଏଣିକି କାର୍ଯ୍ୟାନୁଷ୍ଠାନ । ଦୁଇ ଦୁଇ ଥର ନୋଟିସ ଓ ଅଭିଯୋଗ ଶୁଣାଣି କରିବା ପରେ କଠୋର ପଦକ୍ଷେପ ନେଇଛି ବ୍ରହ୍ମପୁର ମହାନଗର ନିଗମ । ମ୍ୟୁନିସିପାଲଟି କଲୋନୀକୁ ଜବରଦଖଲ ମୁକ୍ତ କରିବାକୁ ଆରମ୍ଭ ହୋଇଛି ପ୍ରକ୍ରିୟା । ଡାକବାଜି ଯନ୍ତ୍ର ଯୋଗେ ଚିହ୍ନଟ ହୋଇଥିବା ତଥା ପୂର୍ବରୁ ନୋଟିସ ଜାରି କରାଯାଇଥିବା ଜବରଦଖଲକାରୀଙ୍କୁ କରାଯାଉଛି ଉଚ୍ଛେଦ ।
ସରିଲା ମହଲତ, ଆକ୍ସନ ମୋଡରେ ବିଇଏମସି । ମୁକ୍ତ ହେବ ମ୍ୟୁନିସିପାଲଟି କଲୋନୀ ଜବରଦଖଲ । ଡାକବାଜୀ ଯନ୍ତ୍ରରେ ପ୍ରଚାର ପରେ ଆରମ୍ଭ ହେଲା ଉଚ୍ଛେଦ । କଡ଼ା ସୁରକ୍ଷା ବଳୟରେ ଲାଞ୍ଜିପଲ୍ଲୀ ସୁବାଷପୁର ମୌଜାରେ ୭୬ଟି କ୍ୱାର୍ଟରକୁ ନେଇ ମ୍ୟୁନିସିପାଲଟି କଲୋନୀ ପ୍ରତିଷ୍ଠା କରାଯାଇଥିଲା । କଲୋନୀର ଅଧିକାଂଶ କ୍ୱାର୍ଟର ବିପଦଶଙ୍କୁଳ ଥିବାବେଳେ ଜବରଦଖଲରେ ଥିଲା । ୪୬ଟି କ୍ୱାର୍ଟର୍ସ ଜବରଦଖଲରେ ଥିବା ଜଣାପଡ଼ିବା ପରେ ସେମାନଙ୍କୁ ପ୍ରଥମେ ୨୦ ଡିସେମ୍ବର ଏବଂ ପରେ ୨୬ ତାରିଖରେ ଦ୍ଵିତୀୟ ନୋଟିସ ଜାରି କରାଯାଇଥିଲା । ୭ ଦିନର ମହଲତ ଦେଇ ସେମାନଙ୍କ ଅଭିଯୋଗର ଶୁଣାଣି ପାଇଁ ସୁଯୋଗ ଦିଆଯାଇଥିଲା । ୯ ପରିବାର ହାଜର ହୋଇ ନିଜର ପକ୍ଷ ରଖୁବା ସହିତ ଆବଶ୍ୟକ ନଥୂପତ୍ର ଦାଖଲ କରିଥିଲେ । କିଏ ଚାକିରିରୁ ଦୀର୍ଘବର୍ଷ ଧରି ଅବସର ନେଇଥିବାବେଳେ କିଏ ନିଜ ସମ୍ପର୍କୀୟଙ୍କୁ ସେଠାରେ ରଖୁଥିଲେ । ଏପରିକି ଅନେକ ସରକାରୀ କ୍ୱାର୍ଟର ଭଡା ସୂତ୍ରରେ ଲାଗିଥିଲା।
ନୋଟିସ ପାଇଥିବା ମୋଟ ୪୬ ଜଣଙ୍କ ମଧ୍ୟରୁ ପ୍ରାୟ ୧୬ ଜଣ ନ୍ୟାୟ ପାଇଁ ହାଇକୋର୍ଟଙ୍କ ଦ୍ବାରସ୍ଥ ହୋଇଛନ୍ତି । ସେମାନଙ୍କ କ୍ବାର୍ଟରକୁ ବାଦ ଦେଇ ଅବଶିଷ୍ଟ ୩୦ଟି କ୍ୱାର୍ଟରକୁ ଭଙ୍ଗା ଯାଇଛି । ରାମନଗର ମ୍ୟୁନିସିପାଲଟି କଲୋନୀରେ ଜବରଦଖଲ ଉଚ୍ଛେଦ କରାଯିବା ସହ ସେଠାରେ ବିଇଏମସି କର୍ମଚାରୀଙ୍କ ପାଇଁ ବହୁତଳ କୋଠା ନିର୍ମାଣ କରି ଯୋଗାଇ ଦିଆଯିବ ।
