ଜାମ୍ମୁ କାଶ୍ମୀର: ପଦାକୁ ଆସୁଛି ଆକ୍ରମଣ ପୂର୍ବରୁ ଲୋମହର୍ଷକ ଘଟଣାବଳୀ। ଗଣହତ୍ୟା କରିବା ପୂର୍ବରୁ ଆତଙ୍କବାଦୀମାନେ ପର୍ଯ୍ୟଟକମାନଙ୍କୁ ସେମାନଙ୍କ ଧର୍ମ ସମ୍ପର୍କରେ ପଚାରିଥିଲେ ବୋଲି ସୂଚନା ମିଳିଛି। ବୈସରମ ଉପତ୍ୟକାରେ ଆତଙ୍କବାଦୀମାନେ ସୁଚିନ୍ତିତ ଯୋଜନା କରିଥିଲେ ଏବଂ ମିଲିଟାରୀ ପୋଷାକ ପିନ୍ଧି ବିପୁଳ ଅସ୍ତ୍ରଶସ୍ତ୍ର ଧରି ସେମାନେ ଆକ୍ରମଣ କରିଥିଲେ। ସେଠାରେ ଥିବା ଏକ ଦମ୍ପତିଙ୍କୁ ଜଣେ ଆତଙ୍କୀ ସେମାନଙ୍କ ଧର୍ମ ସମ୍ପର୍କରେ ପଚାରିଥିଲା। ପରେ ସେମାନଙ୍କୁ ଗୁଳି କରିଥିଲା। ପର୍ଯ୍ୟଟକଙ୍କୁ ଧାର୍ମିକ ବିଶ୍ବାସ ସମ୍ପର୍କିତ ସ୍ଲୋଗାନ କଲମା ବୋଲିବାକୁ କହିଥିଲେ। ଯେଉଁମାନେ ଏହା ବୋଲି ନଥିଲେ ସେମାନଙ୍କୁ ଆତଙ୍କୀମାନେ ଗୁଳି ମାରିଥିଲେ।
ଜଣେ ମହିଳା କହିଛନ୍ତି ତାଙ୍କ ସ୍ବାମୀଙ୍କୁ ଆତଙ୍କୀମାନେ ମୁଣ୍ଡରେ ହିଁ ଗୁଳି କରିଥିଲେ। ଗୁଳିକାଣ୍ଡ ସମୟରେ ସେଠାରେ ୪୦ରୁ ଅଧିକ ପର୍ଯ୍ୟଟକ ଥିଲେ ବୋଲି ସୂଚନା ମିଳିଛି। ଆତଙ୍କବାଦୀଙ୍କ କବଳରୁ କେହି ବର୍ତ୍ତିବା ସମ୍ଭବ ନଥିଲା। ସେମାନଙ୍କ ହାତରେ ଥିଲା ଅତ୍ୟାଧୁନିକ ଅସ୍ତ୍ରଶସ୍ତ୍ର।
