ନନ୍ଦିଘୋଷ ବ୍ୟୁରୋ : ବାର ମାସରେ ତେର ଯାତ୍ରା। ଏହି ପର୍ବପର୍ବାଣୀ ମଧ୍ୟରେ ଝୁଲଣ ଯାତ୍ରା ଅନ୍ୟତମ। ରାଧାକୃଷ୍ଣଙ୍କ ରାହାସ ଲୀଳାର ଏହି ଅନନ୍ୟ ଯାତ୍ରା ଶ୍ରୀମନ୍ଦିର ସମେତ ପୁରୀ ସହରର ବିଭିନ୍ନ ବୈଷ୍ଣବ ମଠ ଓ ମନ୍ଦିରରେ ବେଶ୍ ଆନନ୍ଦ ଓ ଉତ୍ସାହର ସହ ପାଳିତ ହେଉଛି। ଶ୍ରୀମନ୍ଦିରରେ ଶ୍ରୀକୃଷ୍ଣଙ୍କ ଅବତାର ଭାବେ ଶ୍ରୀଜୀଉଙ୍କ ଚଳନ୍ତି ପ୍ରତିମା ମଦନମୋହନ, ଶ୍ରୀଦେବୀ ଓ ଭୂଦେବୀଙ୍କୁ ନେଇ ଏହି ଯାତ୍ରା ଅନୁଷ୍ଠିତ ହୁଏ। ଏଥିପାଇଁ ଶ୍ରୀମନ୍ଦିର ପରିସରରେ ଥିବା ଝୁଲଣ ମଣ୍ଡପକୁ ଆକର୍ଷଣୀୟ ଭାବେ ସଜ୍ଜିତ କରାଯାଇଥାଏ। ସାତ ଦିନ ଧରି ଚାଲୁଥିବା ଏହି ଯାତ୍ରାରେ ଝୁଲଣ ମଣ୍ଡପରେ ରାଧାକୃଷ୍ଣଙ୍କ ପ୍ରାବୃଟ ରାସ ସହ ଦୋଳି ଖେଳିବାର ନୀତି ଓ ପରମ୍ପରା ଦେଖିବାକୁ ମିଳେ।
ପୁରୀର ବିଭିନ୍ନ ଗଳିକନ୍ଦିରେ ପ୍ରାଚୀନ କାଳରୁ ଏହି ପରମ୍ପରା ଚାଲିଆସୁଛି। ଜିଅର ସ୍ୱାମୀ ମଠ, ଉତ୍ତର ପାର୍ଶ୍ୱ ମଠ, ଗୌଡ଼ୀୟ ମଠ, ରାଧାବଲ୍ଲଭୀ ମଠ, ସାନ ମଠ ଓ ଶ୍ରୀଜଗନ୍ନାଥ ବଲ୍ଲଭ ମଠ ସମେତ ବିଭିନ୍ନ ମଠ ଓ ମନ୍ଦିରରେ ଝୁଲଣ ମହୋତ୍ସବ ଧୁମଧାମରେ ପାଳିତ ହେଉଛି। ଝୁଲଣ ମଣ୍ଡପଗୁଡ଼ିକୁ ସୋଲ, ଜରି ଓ ଜମ୍ବୁରରେ ସୁନ୍ଦର ଭାବେ ସଜାଯାଇଥିବା ବେଳେ ବିଭିନ୍ନ ରଙ୍ଗର ଆଲୋକ ସଜ୍ଜା ମଧ୍ୟ ମନ ମୋହୁଛି। ବିଭିନ୍ନ ମଠରେ ପାରମ୍ପରିକ ନୃତ୍ୟ, ସଙ୍ଗୀତ, ପାଲା ଓ ପ୍ରବଚନ ଭଳି କାର୍ଯ୍ୟକ୍ରମ ଆୟୋଜିତ ହେଉଛି। ରାଧାକୃଷ୍ଣଙ୍କ ଅପୂର୍ବ ଲୀଳାର ପ୍ରତୀକ ଏହି ଝୁଲଣ ଯାତ୍ରା ଭକ୍ତଙ୍କ ମନରେ ଭକ୍ତି ଓ ଆନନ୍ଦ ଭରିଦେଇଥିବା ବେଳେ ଶ୍ରୀକ୍ଷେତ୍ରର ପରିବେଶକୁ ମଧ୍ୟ ଆଧ୍ୟାତ୍ମିକ କରିଦେଇଛି।
ChatGPT is A
