ପାତାଳକୁ ଯିବାକୁ ରାସ୍ତା ଖୋଜୁଛି ଚୀନ! ସଙ୍କଟରେ ପଡିବ କି ଦୁନିଆକୁ?

ବେଜିଂ: ପାତାଳକୁ ଯିବାକୁ ରାସ୍ତା ଖୋଜୁଛି ଚୀନ। ୧୦ ହଜାର ମିଟର ତଳକୁ ଗାତ ଖୋଳୁଛି ଚାଇନା । ଏଥିପାଇଁ ଯୋଜନା ମଧ୍ୟ ଆରମ୍ଭ କରିସାରିଛି। ମେ ୩୦ ତାରିଖରୁ ଚୀନର ସିନଜିୟାଙ୍ଗ ପ୍ରାନ୍ତରେ ଥିବା ସବୁଠାରୁ ବଡ ତୈଳ ଭଣ୍ଡାର ପରିସରରେ ଏହି ଖନନ ପ୍ରକ୍ରିୟା ଆରମ୍ଭ ହୋଇଛି । ୨୦୨୧ ମସିହାରେ ଚାଇନାର ରାଷ୍ଟ୍ରପତି, ବିଶେଷଜ୍ଞଙ୍କ ସହ ମିଶି ସେହି ସ୍ଥାନକୁ ଯାଇ ଆଲୋଚନା କରିଥିଲେ। ୨୦୨୩ ରେ ବର୍ତ୍ତମାନ ଏହାର କାର୍ଯ୍ୟ ଆରମ୍ଭ ହୋଇଛି|

ଚୀନ ଦିନକୁ ଦିନ ନୂଆ ନୂଆ ପରୀକ୍ଷଣ ଜାରି ରଖିଛି । ଯାହାକୁ ନେଇ ଚିନ୍ତା ପ୍ରକଟ କରିଛନ୍ତି ଆଖପାଖର ଦେଶ ଗୁଡିକ। ଆକାଶ ଠାରୁ ନେଇ ଚନ୍ଦ୍ର ପୃଷ୍ଠ ପର୍ଯ୍ୟନ୍ତ ସବୁର ପରୀକ୍ଷଣ ଜାରି ରଖିଛି ଚୀନ୍ । ତେବେ ଏହି ଘଟଣାକୁ ଚୀନ ଦୁନିଆ ଠାରୁ ଲୁଚାଇ ରଖିଛି । ଏପର୍ଯ୍ୟନ୍ତ କେହି ସନ୍ଧାନ ପାଇ ନାହାନ୍ତି ଯେ, ଚୀନ କାହିଁକି ୧୦ ହଜାର ମିଟରର ଗାତ ଖୋଳୁଛି । ଏଭଳି ପରିସ୍ଥିତିରେ ଲୋକମାନେ ବର୍ତ୍ତମାନ ଭୟ କରୁଛନ୍ତି କି ଚୀନର ଏହା ଏକ ନୂଆ ଚାଲ୍ ହୋଇଥାଇପାରେ, ଦୁନିଆକୁ ବିପଦ ମୁଖରେ ପକାଇବା ପାଇଁ ।

ସୂଚନା ଅନୁଯାୟୀ, ଚୀନ ରାଷ୍ଟ୍ରପତି ସି ଜିନପିଙ୍ଗ୍ ଏହି ପ୍ରସଙ୍ଗରେ ୨୦୨୧ରେ ଏକ ସଭାରେ କହିଥିଲେ ଯେ, ଚୀନ ଭୂଗର୍ଭରେ ଥିବା ଅନେକ ରହସ୍ୟର ସନ୍ଧାନ କରିବ। ତେବେ ଏହି ପ୍ରକଳ୍ପର ମୂଳ ଉଦ୍ଦେଶ୍ୟ ଏପର୍ଯ୍ୟନ୍ତ ଚୀନ୍ ସ୍ପଷ୍ଟ କରି ନାହିଁ। ତେବେ ଅନେକ ଦେଶ ଏହି ଖବର ପାଇବା ମାତ୍ରକେ ଚୀନ ଉପରେ ନଜର ରଖିବା ଆରମ୍ଭ କରିଦେଇଛନ୍ତି।