ଭୁବନେଶ୍ବର : ଆଜିଠୁ ଯୁକ୍ତ ଦୁଇ ପରୀକ୍ଷା । ବିଜ୍ଞାନ, କଳା, ବାଣିଜ୍ୟ ଓ ଧନ୍ଦାମୂଳକ ପରୀକ୍ଷା ଦେବେ ଛାତ୍ରଛାତ୍ରୀ । ୨୮ ମାର୍ଚ୍ଚ ପର୍ଯ୍ୟନ୍ତ ୨୩ଟି ସିଟିଂରେ ଅନୁଷ୍ଠିତ ହେବ ପରୀକ୍ଷା । ୨୧୧ଟି ପରୀକ୍ଷା ପରିଚାଳନା ହବ୍ ଅଧୀନରେ ଥିବା ୧୯୦୯ଟି ଉଚ୍ଚ ମାଧ୍ୟମିକ ବିଦ୍ୟାଳୟର ୧୩୫୭ଟି ପରୀକ୍ଷା କେନ୍ଦ୍ରରେ ପରୀକ୍ଷା ହେଉଛି । ଚଳିତ ଥର ୪ ଲକ୍ଷ ୧ହଜାର ୬୩୨ ଜଣ ଛାତ୍ରଛାତ୍ରୀ ପରୀକ୍ଷା ଦେବେ । ସୁରକ୍ଷିତ ପରୀକ୍ଷା ପରିଚାଳନା ପାଇଁ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନକୁ ଦାୟିତ୍ବ ଦିଆଯାଇଛି । ହବ ଗୁଡ଼ିକରେ ପ୍ରଥମ ଥର ପାଇଁ ଏଆଇ କ୍ୟାମେରା ଲଗାଯାଇଛି । ଯାହାର କମାଣ୍ଡ କଣ୍ଟ୍ରୋଲ ରୁମ ସିଏଚଏସଇ ଅଫିସରେ ଖୋଲାଯାଇଛି । ସମସ୍ତ ପରୀକ୍ଷା ସେଣ୍ଟର ସିସିଟିଭି ମନିଟରିଂ ବି ସିଏଚଏସଇର ସ୍ବତନ୍ତ୍ର କଣ୍ଟ୍ରୋଲ ରୁମର କରାଯିବ । ପରୀକ୍ଷାରେ ଇଲେକ୍ଟ୍ରୋନିକ ସମାଗ୍ରୀକୁ ବାରଣ କରାଯାଇଛି ।
ସମସ୍ତ ଅଧିକାରୀ, ପର୍ଯ୍ୟବେକ୍ଷକ, ସ୍ମାତ୍ ସଦସ୍ୟ, ଜିଲ୍ଲା ପ୍ରଶାସନର କର୍ମଚାରୀ ଏବଂ ଅନ୍ୟ କର୍ମଚାରୀମାନେ ପରୀକ୍ଷା କେନ୍ଦ୍ରରେ ପ୍ରବେଶ କରିବା ପୂର୍ବରୁ ନିଜର ମୋବାଇଲ୍ ଫୋନ କେନ୍ଦ୍ର ସୁପରିଣ୍ଟେଣ୍ଡେଣ୍ଟଙ୍କ ପାଖରେ ଜମା କରିବେ କିମ୍ବା ନିଜ ଗାଡ଼ିରେ ରଖିବେ । କେନ୍ଦ୍ର ସୁପରିଣ୍ଟେଣ୍ଡେଣ୍ଟମାନେ ଏହିପରି ଜମା ହୋଇଥିବା ଫୋନର ତାରିଖ ଅନୁସାରେ ରେକର୍ଡ ରଖିବେ । ପରୀକ୍ଷା ଶେଷ ଘଣ୍ଟି ବାଜିବା ପୂର୍ବରୁ ଯଦି କୌଣସି ପରୀକ୍ଷାର୍ଥୀ ପରୀକ୍ଷା କେନ୍ଦ୍ର ଛାଡନ୍ତି, ତେବେ ତାଙ୍କୁ ପ୍ରଶ୍ନପତ୍ର ବାହାରକୁ ନେବାକୁ ଅନୁମତି ଦିଆଯିବ ନାହିଁ । ଚାପମୁକ୍ତ ପରୀକ୍ଷା ପାଇଁ ଛାତ୍ରଛାତ୍ରୀମାନଙ୍କୁ ସରକାର ପରାମର୍ଶ ଦେଇଛନ୍ତି । କପି କଲାବେଳେ ଧରା ପଡ଼ିଲେ, ମାଲ୍ ପ୍ରାକ୍ଟିସ ଭାବେ ବିବେଚନା କରାଯିବ । ଯାହା ସଂପୃକ୍ତ ଛାତ୍ର ବା ଛାତ୍ରୀଙ୍କ ଏକ ବର୍ଷ ନଷ୍ଟ କରି ପାରେ ।
