ଆମେରିକା ଆକ୍ରମଣରେ କାତାଏବ ହେଜବୁଲ୍ଲର କମାଣ୍ଡର ମୃତ

ଓ୍ବାସିଂଟନ: ଆମେରିକା ଆକ୍ରମଣରେ ଇରାନ ସମର୍ଥିତ ଆତଙ୍କବାଦୀ ସଂଗଠନ କାତାଏବ ହେଜବୁଲ୍ଲାର ଜଣେ କମାଣ୍ଡର ଆବୁ ବାଗିର ଅଲ-ସାଦିଙ୍କ ମୃତ୍ୟୁ । ଆମେରିକୀୟ ସୈନ୍ୟଙ୍କ ଉପରେ ହୋଇଥିବା ଆକ୍ରମଣ ପ୍ରତିବାଦରେ ଇରାକ ସ୍ଥିତ ସଂଗଠନର ଆଡ୍ଡା ସ୍ଥଳୀ ଉପରେ ଆକ୍ରମଣ କରିଥିଲା ଆମେରିକା ।

ଆମେରିକା ମିଲିଟାରୀ ପକ୍ଷରୁ କୁହାଯାଇଛି, ଆମେରିକୀୟ ବାହିନୀ ଉପରେ ହୋଇଥିବା ଆକ୍ରମଣ ଘଟଣାରେ ସିଧାସଳଖ ସମ୍ପୃକ୍ତ ଥିଲା ହେଜବୁଲ୍ଲା କମାଣ୍ଡର ।  ବାଗଦାଦର ପୂର୍ବାଞ୍ଚଳରେ ଏକ ଗାଡି ଉପରେ ଆମେରିକୀୟ ଡ୍ରୋନ ଆକ୍ରମଣରେ ତା’ର ମୃତ୍ଯୁ ଘଟିଥିଲା । ଇରାକର ପପୁଲାର ମୋବିଲାଇଜେସନ ଫୋର୍ସର ଏହି ଗାଡିରେ ସେ ଯାଉଥିବାବେଳେ ଆକ୍ରମଣ କରିଥିଲେ ଆମେରିକୀୟ ବାହିନୀ ।

ସେପଟେ ପ୍ରାୟ ସାଢେ ଚାରିମାସର ଯୁଦ୍ଧ ପରେ ଅସ୍ତ୍ରବିରତି ପ୍ରସ୍ତାବ ଦେଇଛି ହମାସ । କତାର ଓ ଇଜିପ୍ଟର ମଧ୍ୟସ୍ଥତାରେ ଏହି ପ୍ରସ୍ତାବ ଦିଆଯାଇଛି । ଅସ୍ତ୍ରବିରତି ନେଇ ଆମେରିକା ଓ ଇସ୍ରାଏଲ ଏହି ପ୍ରସ୍ତାବ ଉପରେ ବିଚାର ବିମର୍ଶ କରୁଥିବା ସୂଚନା ମିଳିଛି । ଅସ୍ତ୍ରବିରତି ଯୋଜନାରେ କତାର, ଇଜିପ୍ଟ, ତୁର୍କୀ, ଋଷ ଓ ଜାତିସଂଘ ଗ୍ଯାରେଣ୍ଟର ରହିବେ ବୋଲି କହିଛନ୍ତି ହମାସ ନେତା ମହମ୍ମଦ ନାଜାଲ ।