କରୋନାକୁ ନେଇ ସାରା ବିଶ୍ୱ ଏବେ ଆତଙ୍କିତ ଅବସ୍ଥାରେ ରହିଛି । ଆମ ଦେହରେ ଭାଇରସ ଆସିଯାଇନି ତ ? ଏଭଳି ପ୍ରଶ୍ନରେ ପୁରା ପୃଥିବୀ ଥରହର ହେଉଛି । ସାମାଜିକ ଦୂରତା ଏହାର ଏକ ମାତ୍ର ପ୍ରତିକାରକ । ଯାହା ପାଇଁ ସମସ୍ତେ କରୋନା ଦାଉରୁ ବଞ୍ଚିବା ପାଇଁ ଘରେ ନିଜକୁ ବନ୍ଦୀ କରି ରଖୁଛନ୍ତି । ତେବେ କରୋନା ଯୁଦ୍ଧର ଅସ୍ତ୍ର ଆଣ୍ଟିଭାଇରସ ପାଇଁ ଚାଲିଛି ପରୀକ୍ଷା ପରେ ପରୀକ୍ଷା । ବିଶ୍ୱର ପ୍ରତିଟି ବୈଜ୍ଞାନିକ ଗବେଷଣା କେନ୍ଦ୍ର ଏବେ କରୋନା ପ୍ରତିକାର ବାହାର କରିବାରେ ବ୍ୟସ୍ତ । କିନ୍ତୁ ପ୍ରତିଥର ବୈଜ୍ଞାନିକ ମାନଙ୍କୁ ବିଫଳତାର ସ୍ୱାଦ ଚାଖିବାକୁ ପଡ଼ୁଛି। ଲାଗୁଛିକି ଯେମିତି ସଫଳତାର ଦୁଆର ମୁହଁରେ ଦରଓ୍ୱାନ ହୋଇ ଜଗି ରହିଛି କରୋନା ଭାଇରସ । କିନ୍ତୁ ଏସବୁକୁ ଖାତିର ନକରି ବୈଜ୍ଞାନିକ ମାନେ ଚଲାଇଛନ୍ତି ତାଙ୍କର ଗବେଷଣା ।
ଏଇ ଭିତରେ ବ୍ରିଟେନର ବୈଜ୍ଞାନିକ ମଣିଷଙ୍କ ଉପରେ ପ୍ରଥମ ଥର ପାଇଁ କରୋନା ଆଣ୍ଟିଭାଇରସର ପରୀକ୍ଷା କରିଛନ୍ତି । ଶୁକ୍ର ବାର ଦିନ ଏହି ଟିକାର ମଣିଷଙ୍କ ଉପରେ ପରୀକ୍ଷା କରାଯାଇଛି । ତେବେ ଏହି ପରୀକ୍ଷାରେ ଜଣେ ମାଇକ୍ରୋ ବାୟୋଲୋଜିଷ୍ଟ ବୈଜ୍ଞାନିକଙ୍କୁ କୋଭିଡ-19 ର ପ୍ରତିଷେଧକ ଟୀକା ଦିଆଯାଇଛି । ଅକ୍ସଫୋର୍ଡ ୟୁନିଭରସିଟି ଦ୍ୱାରା କରାଯାଇଥିବା ଏହି ପରୀକ୍ଷାରେ ୮ଶହ ଜଣଙ୍କ ମଧ୍ୟରୁ ଏଲିସା ଗ୍ରେନେଟୋଙ୍କୁ ବଛାଯାଇଥିଲା ।
ଅକ୍ସଫୋର୍ଡ ୟୁନିଭରସିଟିର ବୈଜ୍ଞାନିକ ମାନେ କହିଛନ୍ତି ଯେ ଏଲିସାଙ୍କ ଠାରେ ଲାଗିଥିବା ଟୀକା ଉପରେ ସେମାନଙ୍କର ଭରସା ରହିଛି । ସେମାନେ ଦାବି କରିଛନ୍ତି ଯେ ଏହି ଟିକା ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି କରି କରୋନା ଭାଇରସ୍ ସହିତ ଲଢ଼ିବାରେ ସାହାଯ୍ୟ କରିବ।
ସେପଟେ ନିଜ ଉପରେ ହୋଇଥିବା ପରୀକ୍ଷା ପରେ ଆଲିସା କହିଛନ୍ତି, ‘ଜଣେ ବୈଜ୍ଞାନିକ ଭାବରେ ମୁଁ ଏହି ଅନୁସନ୍ଧାନକୁ ସମର୍ଥନ କରିବାକୁ ଚାହୁଁଛି । ମୁଁ ବର୍ତ୍ତମାନ ପର୍ଯ୍ୟନ୍ତ ଏହି ଭାଇରସ ଉପରେ କୌଣସି ଅଧ୍ୟୟନ କରି ନଥିବାରୁ ଦୁଃଖିତ । କିନ୍ତୁ ବର୍ତ୍ତମାନ ଏଭଳି ସାହାଯ୍ୟ କରିବା ପରେ ମୁଁ ନିଜକୁ ବହୁତ ଖୁସି ଅନୁଭବ । ସବୁଠାରୁ ବଡ଼କଥା ହେଉଛି ଆଲିସାଙ୍କର ୩୨ ତମ ଜନ୍ମ ଦିନରେ ତାଙ୍କ ଉପରେ ଏହି କରୋନା ଟେଷ୍ଟ କରାଯାଇଥିଲା ।
