ନୂଆଦିଲ୍ଲୀ: ଚୀନ୍ରୁ ଏବେ ସାରା ବିଶ୍ୱକୁ ବ୍ୟାପିଛି ଭୟଙ୍କର କରୋନା ଭାଇରସ୍ । ଦିନକୁ ଦିନ ଏଥିରେ ଆକ୍ରାନ୍ତଙ୍କ ସଂଖ୍ୟା ବଢ଼ିବା ସହ ମୃତ୍ୟୁ ସଂଖ୍ୟା ମଧ୍ୟ ବଢ଼ିବାରେ ଲାଗିଛି । ଏହାର ପ୍ରତିକାର ନେଇ ଏଯାଏଁ ସେଭଳି କିଛି ନିର୍ଦ୍ଦିଷ୍ଟ ଔଷଧ ବାହାରିନଥିବା ବେଳେ ସଚେତନତା ମାଧ୍ୟମରେ ଏହାକୁ ବ୍ୟାପିବାରୁ ରୋକାଯାଉଛି ।
ଭାରତରେ କରୋନାକୁ ନେଇ ସେଭଳି କିଛି ଗମ୍ଭୀର ସ୍ଥିତି ଉପୁଜିନଥିଲେ ଏହାକୁ ବ୍ୟାପିବାରୁ ରୋକିବା ନେଇ ଆରମ୍ଭ ହୋଇଯାଇଛି ସଚେତନତା । ଏହି ଦିଗରେ ଦୂରସଞ୍ଚାର ମନ୍ତ୍ରାଳୟ ଏବେ ନୂଆ ଉଦ୍ୟମ ଆରମ୍ଭ କରିଛି | ଟେଲିକମ ମନ୍ତ୍ରାଳୟ ଟେଲିକମ୍ ଅପରେଟରମାନଙ୍କୁ ଭାରତରେ ଏହି ରୋଗ ବିଷୟରେ ଅବଗତ କରାଇବା ପାଇଁ ନିୟମିତ ରିଙ୍ଗଟୋନ୍ ପରିବର୍ତ୍ତେ କରୋନା ଭାଇରସ୍ ସଚେତନତା ବାର୍ତ୍ତା ଦେବାକୁ କହିଛି। ଭାରତ ସଞ୍ଚାର ନିଗମ ଲିମିଟେଡ୍ (ବିଏସ୍ଏନ୍ଏଲ୍), ଏୟାରଟେଲ ଏବଂ ଜିଓ ସେମାନଙ୍କ ଗ୍ରାହକଙ୍କ ପାଇଁ ଏକ ପ୍ରି-କଲ୍ ସଚେତନତା କଲର୍ ଟ୍ୟୁନ୍ କାର୍ଯ୍ୟକାରୀ କରିଛନ୍ତି |
କିନ୍ତୁ ଯଦି ଜଣେ ଉପଭୋକ୍ତା ଅଲଗା ଭାବରେ ଏକ କଲର୍ ଟ୍ୟୁନ୍ କୁ ସବସ୍କ୍ରାଇବ କରିଥିବେ ତେବେ ଏହି କଲର ଟ୍ୟୁନ ଶୁଣାଯିବ ନାହିଁ | ଏହି କଲର ଟ୍ୟୁନରେ କୁହାଯାଇଛି ଯେ “କାଶ କିମ୍ବା ଛିଙ୍କିବା ସମୟରେ ସର୍ବଦା ରୁମାଲ କିମ୍ବା ଟିସୁ ସାହାଯ୍ୟରେ ମୁହଁକୁ ରକ୍ଷା କରନ୍ତୁ। ନିୟମିତ ଭାବେ ସାବୁନରେ ହାତ ସଫା କରନ୍ତୁ।”
ଦେଶର ଜନତାଙ୍କୁ ସଚେତନତା ଯୋଗାଇବା ପାଇଁ ଏହି ବାର୍ତ୍ତା ହିନ୍ଦୀରେ ଶୁଣିବାକୁ ମିଳିଛି । ଏହା ସହ “ଆପଣଙ୍କ ମୁହଁ, ଆଖି କିମ୍ବା ନାକକୁ ଛୁଇଁବା ଠାରୁ ଦୂରେଇ ରୁହନ୍ତୁ। ବିସ୍ତୃତ ଜାଣିବା ପାଇଁ ୧୧୨୩୭୯୭୮୦୪୬ ନମ୍ବରରେ କଲ କରିବା ପାଇଁ କୁହାଯାଇଛି |
