କ୍ରାଇମବ୍ରାଞ୍ଚର ୨ ଦିନିଆ ରିମାଣ୍ଡରେ ପ୍ରଦୀପ ପାଣିଗ୍ରାହୀଙ୍କ ସହଯୋଗୀ ସର୍ବେଶ୍ୱର

ଭୁବନେଶ୍ୱର: ଟାଟା ମୋଟର୍ସରେ ନିଯୁକ୍ତି ନାଁରେ ଠକେଇ ମାମଲା । ରିମାଣ୍ଡରେ ଗଲେ ଗୋପାଳପୁର ବିଧାୟକ ପ୍ରଦୀପ ପ୍ରାଣିଗ୍ରାହୀଙ୍କ ସହଯୋଗୀ ସର୍ବେଶ୍ବର ରାଓ । ତାଙ୍କୁ ଦୁଇ ଦିନିଆ ରିମାଣ୍ଡରେ ନେଇଛି କ୍ରାଇମ୍‌ବ୍ରାଞ୍ଚ୍‌ । ଝାରପଡ଼ା ଜେଲରୁ ସର୍ବେଶ୍ବରଙ୍କୁ କ୍ରାଇମବ୍ରାଞ୍ଚ ଟିମ୍ ରିମାଣ୍ଡରେ ନେଇଛି ।

ପାଠକ ଓ ପାଣିଗ୍ରାହୀଙ୍କ ସହିତ ମିଶି ସର୍ବେଶ୍ବର କେମିତି ରଚୁଥିଲେ ଠକେଇ ଷଡଯନ୍ତ୍ର ? ନିଯୁକ୍ତି ନାଁରେ କେତେ ଜଣଙ୍କଠାରୁ କରିଛନ୍ତି ଲୁଟ୍ ? ଠକେଇରେ ପ୍ରଦୀପ ପାଣିଗ୍ରାହୀଙ୍କର କ’ଣ ଥିଲା ଭୂମିକା ?  କିପରି ଚାଲିଥିଲା ଜାଲ୍ ନିଯୁକ୍ତି ଓ କ୍ୟାମ୍ପସ ଚୟନ ? ଏଥିସହ ଠକେଇର ଶିକାର କେବଳ ୬୮ ଜଣ ହୋଇଛନ୍ତି ନା ଅଧିକ ହୋଇଛନ୍ତି ? ସେ ନେଇ ଖୋଳତାଡ଼ କରିବ କ୍ରାଇମ୍‌ବ୍ରାଞ୍ଚ୍‌ । କେବଳ ଏତିକି ନୁହେଁ, ଆକାଶ ପାଠକ ଓ ପ୍ରଦୀପ ପାଣିଗ୍ରାହୀ ରିମାଣ୍ଡ ସମୟରେ ଦେଇଥିବା ତଥ୍ୟକୁ ନେଇ ସର୍ବେଶ୍ବରଙ୍କୁ କ୍ରାଇମ୍‌ବ୍ରାଞ୍ଚ୍‌ ଜେରା କରିବ ।

ସୂଚନା ଯୋଗ୍ୟ, ମିଡିଲ ମ୍ୟାନ୍ ସର୍ବେଶ୍ୱର ହେଉଛନ୍ତି ଜଣେ ଅବସରପ୍ରାପ୍ତ କଲେଜ ଅଧ୍ୟକ୍ଷ । ଗତ ୧୭ ତାରିଖରେ ଟାଟା ମୋଟର୍ସରେ ନିଯୁକ୍ତି ନାଁରେ ଠକେଇ ଅଭିଯୋଗରେ ତାଙ୍କୁ ଗିରଫ କରାଯାଇଥିଲା । ଅଭିଯୋଗ ଅନୁଯାୟୀ ପ୍ରଦୀପ ଓ ପାଠକଙ୍କ ପାଇଁ ଶିକାର ଖୋଜୁଥିଲେ ସର୍ବେଶ୍ୱର । ଆଉ ଲକ୍ଷ ଲକ୍ଷ ଟଙ୍କା ଲୁଟୁଥିଲେ । ଟାଟାମୋଟର୍ସରେ ନିଯୁ୍କ୍ତି ଦେବେ କହି ଲୋକଙ୍କୁ ଲୁଟ କରୁଥିଲେ ।

ଏଥିସହ ପଢ଼ନ୍ତୁ- ଟାଟାରେ ନିଯୁକ୍ତି ନାଁରେ ଠକେଇ ମାମଲା: ପ୍ରଦୀପଙ୍କ ସହଯୋଗୀ ସର୍ବେଶ୍ୱରଙ୍କୁ ରିମାଣ୍ଡରେ ନେବ କ୍ରାଇମବ୍ରାଞ୍ଚ