କଟକ: ଆଜି ହାଇକୋର୍ଟରେ କୁକୁର ବନ୍ଧ୍ୟାକରଣ ମାମଲାର ଶୁଣାଣି ହେବ। ଶୁଣାଣିରେ ହାଇକୋର୍ଟ ବିଏମସି ସପକ୍ଷରେ ଅର୍ଥାତ ବନ୍ଧ୍ୟାକରଣ ଉପରେ ଲାଗିଥିବା ଷ୍ଟେ ଅର୍ଡର ହଟାଇବାର ଯଥେଷ୍ଟ ସମ୍ଭାବନା ରହିଛି। ଷ୍ଟେ ଅର୍ଡର ହଟିବା ପରେ କୁକୁରଙ୍କ ତୁରନ୍ତ ଅସ୍ତ୍ରୋପଚାର କରାଯାଇପାରେ। ବିଏମସି ମାମଲାରେ ନିଜଆଡ଼ୁ ପକ୍ଷ ରଖିବା ସହ ବନ୍ଧ୍ୟାକରଣ ଆରମ୍ଭ ପାଇଁ ଆଦେଶ ଦେବାକୁ ପ୍ରାର୍ଥନା କରିଛି। ବିଏମସିର ଆବେଦନ ହାଇକୋର୍ଟ ଗ୍ରହଣ କଲେ ଭୁବନେଶ୍ବରରେ ପୁଣି ଥରେ ବନ୍ଧ୍ୟାକରଣ ଆରମ୍ଭ ହେବାର ସମ୍ଭାବନା ରହିଛି ।
ଆପଣଙ୍କୁ କହିରଖୁଛୁ, ରାଜ୍ୟରେ ଚାଲିଥିବା ଆନିମଲ ବାର୍ଥ କଣ୍ଟ୍ରୋଲ କାର୍ଯ୍ୟକ୍ରମ ଠିକ ଓ ସୁରକ୍ଷିତ ଭାବେ କରାଯାଉନଥିବା ଅଭିଯୋଗ ହୋଇଥିଲା। ଏହାର ଶୁଣାଣି କରି ୨୦୨୨ ଜୁଲାଇ ୧୦ ତାରିଖରୁ ରାଜ୍ୟରେ ଏବିସି କାର୍ଯ୍ୟକ୍ରମ ଉପରେ ରୋକ ଲଗାଯାଇଥିଲା। ପ୍ରଥମେ ଅଗଷ୍ଟ ୩୧ ତାରିଖ ଯାଏ ରୋକ୍ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ମାତ୍ର କୋର୍ଟରୁ ମାମଲା ଉଠିପାରିନଥିବାରୁ ଏହାର ଶୁଣାଣିକୁ ଘୁଞ୍ଚାଇ ଦିଆଯାଇଥିଲା। ଆଜି କୋର୍ଟ ଏହି ମାମଲାର ଶୁଣାଣି କରିବେ।
