ଟାରିଫ୍ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ କୋର୍ଟରୁ ବଡ଼ ଝଟକା

ବିଭିନ୍ନ ଦେଶ ଉପରେ ଆମେରିକାର ଟାରିଫ୍ ନେଇ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ କୋର୍ଟରୁ ବଡ଼ ଝଟକା। ରାଷ୍ଟ୍ରପତି ଟ୍ରମ୍ପ ଲଗାଇଥିବା ଟାରିଫ୍ ବେଆଇନ କହିଲେ ଅଦାଲତ। ଆମେରିକାର ଏକ କୋର୍ଟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଅଧିକାଂଶ ଶୁଳ୍କ ନୀତିକୁ ବେଆଇନ ଘୋଷଣା କରିଛନ୍ତି। ୱାଶିଂଟନ୍ ଡିସି ସ୍ଥିତ ଆମେରିକାର ଫେଡେରାଲ୍ ସର୍କିଟ୍ କୋର୍ଟ ଅଫ୍ ଆପିଲସ ତାଙ୍କ ଆଦେଶରେ କହିଛନ୍ତି ଯେ ଜରୁରୀକାଳୀନ କ୍ଷମତା ଉଲ୍ଲେଖ କରି ଟ୍ରମ୍ପ୍ ତାଙ୍କ କ୍ଷମତା ଅତିକ୍ରମ କରିଛନ୍ତି। ଆଇନ ରାଷ୍ଟ୍ରପତିଙ୍କୁ ଜରୁରୀକାଳୀନ ପରିସ୍ଥିତିରେ ଅନେକ ପଦକ୍ଷେପ ନେବାକୁ ଅନୁମତି ଦିଏ। କିନ୍ତୁ ଏଥିରେ ଶୁଳ୍କ କିମ୍ବା ଟିକସ ଲଗାଇବାର କ୍ଷମତା ଅନ୍ତର୍ଭୁକ୍ତ ନୁହେଁ ବୋଲି କହିଛନ୍ତି କୋର୍ଟ। ସେପଟେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କୋର୍ଟଙ୍କ ନିଷ୍ପତ୍ତିକୁ କଡ଼ା ବିରୋଧ କରିଛନ୍ତି। ଟ୍ରମ୍ପ କହିଛନ୍ତି ତାଙ୍କର ଶୁଳ୍କ ନୀତି ଅକ୍ଷୁର୍ଣ୍ଣ ରହିଛି ଏବଂ ସେ ଏହି ମାମଲାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିବେ। ସମସ୍ତ ଶୁଳ୍କ ଏବେ ବି ବଳବତ୍ତର ଅଛି। କୋର୍ଟଙ୍କ ରାୟ ଏକପାଖିଆ ବୋଲି କହିଛନ୍ତି ଟ୍ରମ୍ପ। ସେ ଚେତାବନୀ ଦେଇ କହିଛନ୍ତି ଯଦି ଶୁଳ୍କ ହଟାଇ ଦିଆଯାଏ ତେବେ ଏହା ଦେଶ ପାଇଁ ବଡ଼ ବିପର୍ଯ୍ୟୟ ହେବ। ଆମେରିକାକୁ ଆର୍ଥିକ ଦୃଷ୍ଟିରୁ ଦୁର୍ବଳ କରିଦେବ। ଶୁଳ୍କ ହେଉଛି କ୍ଷମତାର ଅସ୍ତ୍ର ବୋଲି କହିଛନ୍ତି ଟ୍ରମ୍ପ। ଆମେରିକା ଆଉ ବଡ଼ ଧରଣର ବାଣିଜ୍ୟ ନିଅଣ୍ଟ ଏବଂ ଅନ୍ୟ ଦେଶର ଆର୍ଥିକ ନୀତିକୁ ସହ୍ୟ କରିବ ନାହିଁ। ମେଡ୍ ଇନ୍ ଆମେରିକା ଉତ୍ପାଦ ତିଆରି କରୁଥିବା ଆମର ଶ୍ରମିକ ଏବଂ କମ୍ପାନୀଗୁଡ଼ିକ ପାଇଁ ଶୁଳ୍କ ହେଉଛି ସବୁଠାରୁ ବଡ଼ ଅସ୍ତ୍ର। ସୁପ୍ରିମକୋର୍ଟଙ୍କ ସହାୟତାରେ ଆମେ ସେଗୁଡ଼ିକୁ ଦେଶର ସ୍ୱାର୍ଥରେ ବ୍ୟବହାର କରିବୁ ଏବଂ ଆମେରିକାକୁ ପୁଣି ଥରେ ଶକ୍ତିଶାଳୀ କରିବୁ ବୋଲି କହିଛନ୍ତି ଟ୍ରମ୍ପ।