କେନ୍ଦୁଝର: କେନ୍ଦୁଝର ତେଲକୋଇ ରେଞ୍ଜ ବିମଳା ଫରେଷ୍ଟ ବିଟ୍ ଅଞ୍ଚଳରେ ଗୋଠଛଡ଼ା ଦନ୍ତାହାତୀ ଉପଦ୍ରବ। ପଡାଙ୍ଗ ପଞ୍ଚାୟତର ଅହିଗୋଳା ଗାଁ ଜୁଆଙ୍ଗ ସାହିରେ ଗତକାଲି ବିଳମ୍ବିତ ରାତିରେ ଗୋଠଛଡା ଦନ୍ତା ଉତ୍ପାତ ମଚାଇଥିଲା। ରାତି ପ୍ରାୟ ୪ଟା ସମୟରେ ରବି ପେଣ୍ଠେଇ ଓ ତାଙ୍କ ସ୍ତ୍ରୀ ୨ପିଲାଙ୍କ ସହିତ ଘରେ ଶୋଇଥିବା ବେଳେ ଦନ୍ତା ଘର ଭାଙ୍ଗିଦେଇଥିଲା। ଭୟରେ ପିଲାଛୁଆ ଧରି ସାହି ଭିତରେ ଥିବା ପଡ଼ିଶା ଘରକୁ ଲୁଚି ପଳାଇ ଥିଲେ।
ଦନ୍ତା ଘର ଭାଙ୍ଗିବା ସହ ଦୁଇବସ୍ତା ଧାନ ଖାଇବା ସହ ଦୁଇବସ୍ତା ଚାଉଳ ଟେକି ନେଇ ଚାଲି ଯାଇଥିଲା। ଏବଂ ହାଣ୍ଡିରେ ଥିବା ପଖାଳକୁ ମଧ୍ୟ ଖାଇ ଦେଇଥିଲା। ଗାଁରେ ଦନ୍ତା ପଶିବା ଦେଖି ଲୋକେ ବନବିଭାଗକୁ ଜଣାଇଥିଲେ ମଧ୍ୟ ଯୋଗାଯୋଗ ହୋଇପାରିନଥିଲା। ଫଳରେ ଗାଁ ଲୋକେ ଟାୟାର ଜାଳି ହାତୀକୁ ଘଉଡାଇଥିଲେ। ବାରମ୍ବାର ହାତୀ ଉପଦ୍ରବ ଜାରି ରହିଥିଲେ ମଧ୍ୟ ବନବିଭାଗ କୌଣସି ପଦକ୍ଷେପ ନେଉନଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି।
