ଅମରାବତୀ: ଆନ୍ଧ୍ରପ୍ରଦେଶରେ ଅଜଣା ରୋଗ ଆତଙ୍କ । କରୋନା ମହାମାରୀ ମଧ୍ୟରେ ଆଉ ଏକ ଅଜଣା ରୋଗ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିଛି । ଏହି ରୋଗ କବଳରେ ଏଯାଏଁ ୫୦୦ରୁ ଊର୍ଦ୍ଧ୍ୱ ରୋଗୀ କବଳିତ ହେଲେଣି । ଏହି ରୋଗରେ ଆକ୍ରାନ୍ତ ହୋଇଥିବା ଲୋକେ ଅଚେତ ହୋଇପଡ଼ିବା ସହ ଅପସ୍ମାର ଆଟାକ ଆସୁଥିବା ଦେଖିବାକୁ ମିଳିଛି । କିନ୍ତୁ ଆଶ୍ୱସ୍ତିର ବିଷୟରେ ଏଥିରେ ଆକ୍ରାନ୍ତ ଲୋକ ଶୀଘ୍ର ସୁସ୍ଥ ହୋଇ ଘରକୁ ମଧ୍ୟ ଫେରିଯାଉଛନ୍ତି ।
ରାଜ୍ୟର ସ୍ୱାସ୍ଥ୍ୟ ମନ୍ତ୍ରୀ ଏ କେ କ୍ରିଷ୍ଣା ଶ୍ରୀନିବାସଙ୍କ ସୂଚନା ମୁତାବକ ରୋଗରେ ଆକ୍ରାନ୍ତ ୫୧୦ଙ୍କ ମଧ୍ୟରୁ ୪୩୦ ଲୋକଙ୍କୁ ହସ୍ପିଟାଲରୁ ଛୁଟି ଦିଆଯାଇଛି । ତେବେ ଏହି ରୋଗ ଯୋଗୁଁ ଜଣଙ୍କ ମୃତ୍ୟୁ ହୋଇଥିବା ନେଇ ମଧ୍ୟ ଖବର ଆସିଛି । କିନ୍ତୁ ଏଥିଲାଗି ଲୋକେ ଭୟଭୀତ ନହେବାକୁ ନିବେଦନ କରିଛନ୍ତି । ତେବେ ଏହି ଅଜଣା ରୋଗ ନେଇ ଅଖିଳ ଭାରତୀୟ ଆର୍ୟୁବିଜ୍ଞାନ ସଂସ୍ଥାନ (AIIMS),ଦିଲ୍ଲୀ ଟିମ୍ ଏହି ରହସ୍ୟମୟ ରୋଗର ଯାଞ୍ଚ କରୁଛି । ତେବେ ଏମ୍ସ ଟିମ୍ର ସଦ୍ୟ ସୂଚନା ମୁତାବକ ଆକ୍ରାନ୍ତ ରୋଗୀଙ୍କ ରକ୍ତ ନମୁନାରେ ସିସା, ନିକଲ ଭଳି ଭାରି କ୍ୟାମିକାଲ ଦେଖିବାକୁ ମିଳିଛି । ରାଷ୍ଟ୍ରୀୟ ପୋଷଣ ସଂସ୍ଥାନ (ଏନ୍ଆଇଏନ୍)ର ଟିମ୍ ଏବେ ପାଣି ଖାଦ୍ୟ, ତେଲ ଏବଂ ଚାଉଳ ନମୁନା ସଂଗ୍ରହ କରୁଛି । ତେବେ ଚିନ୍ତାର ବିଷୟ ଏହା ଯେ, ଏହି ରୋଗରେ ସଂକ୍ରମିତ ଲୋକ କୌଣସି ନିର୍ଦ୍ଦିଷ୍ଟ କ୍ଷେତ୍ରର ନୁହଁନ୍ତି । ଏନ୍ଆଇଏନ୍ର ଜଣେ ବୈଜ୍ଞାନିକ କହିଛନ୍ତି, ଯଦି ଏହା ପାଣି ବାୟୁ ଜନିତ ହୋଇଥାନ୍ତା ତେବେ ଏହା ଦ୍ୱାରା ଏକ ନିର୍ଦ୍ଦିଷ୍ଟ କ୍ଷେତ୍ରର ଲୋକ ପ୍ରଭାବିତ ହୋଇଥାନ୍ତେ । କିନ୍ତୁ ଏହି ଅଜଣା ରୋଗ ଦ୍ୱାରା ପୂରା ଏଲ୍ଲୁର ସହରବାସୀ ପ୍ରଭାବିତ । ତେବେ ଅନ୍ୟ ଏକ ଆଶ୍ଚର୍ଯ୍ୟର ଘଟଣା ହେଉଛି ଏହା ଅଧିକାଂଶ ରୋଗୀ ସେମାନଙ୍କ ପରିବାରର ମାତ୍ର ଜଣେ ସଦସ୍ୟ ।
ଜନୈକ ସ୍ୱାସ୍ଥ୍ୟ ଅଧିକାରୀଙ୍କ ସୂଚନା ମୁତାବକ ପାଖାପାଖି ସବୁ ପ୍ରଭାବିତ ବ୍ୟକ୍ତି ଏଲ୍ଲୁରର ଗ୍ରାମୀଣ ଏବଂ ଆଖ ପାଖ ଅଞ୍ଚଳ ପ୍ରଭାବିତ ହୋଇନାହିଁ । ରବିବାର ନିଆଯାଇଥିବା ପାଣିର ନମୁନା ଦୂଷିତ ନହେଁ । କିନ୍ତୁ ସ୍ୱାସ୍ଥ୍ୟ ଅଧିକାରୀ ପାଣି ଏବଂ ଖାଦ୍ୟର ପୁନଃ ପରୀକ୍ଷଣ ନେଇ ଏହି ଅଞ୍ଚଳକୁ ପୁଣି ଥରେ ଯାଉଛନ୍ତି ।ଅପରପକ୍ଷରେ ଦିଲ୍ଲୀ ଏମ୍ସ ନ୍ୟାସନାଲ ଇନଷ୍ଟିଚ୍ୟୁଟ ଅଫ୍ ଭାଇରୋଲୋଜି, (ପୁନେ) ଏବଂ ସେଣ୍ଟର ଫର ଡିଜିଜ୍ କଣ୍ଟ୍ରୋଲ (ଦିଲ୍ଲୀ) ସ୍ୱାସ୍ଥ୍ୟ ବିଶେଷଜ୍ଞ ମଙ୍ଗଳବାର ରାଜ୍ୟର ଅଧିକାରୀଙ୍କ ସହିତ ବୈଠକ କରିଥିଲେ ଏବଂ ପ୍ରଭାବିତ ରୋଗୀଙ୍କ ସହିତ ଆଲୋଚନା କରିଥିଲେ ।
