ନନ୍ଦିଘୋଷ ବ୍ୟୁରୋ : ପଞ୍ଜାବ ଲୁଧିଆନାରେ ୨ ଆତଙ୍କୀଙ୍କ ଏନକାଉଣ୍ଟର। ପାକିସ୍ତାନ ଗୁଇନ୍ଦା ସଂସ୍ଥା ISI ଲିଙ୍କରେ ୨ ଆତଙ୍କୀଙ୍କ ଏନକାଉଣ୍ଟର କରାଯାଇଥିବା ସୂଚନା ମିଳିଛି। ଗୁଳିବିନିମୟରେ ବାବର ଖାଲସା ଇଣ୍ଟରନ୍ୟାସନାଲ ସହିତ ଜଡିତ ଦୁଇ ଆତଙ୍କବାଦୀ ଆହତ ହୋଇଛନ୍ତି। ଏକ ଆତଙ୍କବାଦୀ ମଡ୍ୟୁଲକୁ ଠାବ କରିବାକୁ ଯାଇ ତିନି ଜଣଙ୍କୁ ଗିରଫ କରିଥିଲା ପୋଲିସ। ଆଇଏସଆଇର ନିର୍ଦ୍ଦେଶରେ କାମ କରୁଥିବା ଦୁଇ ଜଣ ଆତଙ୍କବାଦୀ ସେହି ଅଞ୍ଚଳରେ ଥିବା ଜଣାପଡିଥିଲା। ଜାଲ ବିଛାଇ ଦୁଇ ଆତଙ୍କୀଙ୍କୁ ଧରିଥିଲା ପୋଲିସ। ରିପୋର୍ଟ ଅନୁଯାୟୀ ସନ୍ଦିଗ୍ଧ ଆତଙ୍କୀମାନଙ୍କୁ ଗ୍ରେନେଡ ସଂଗ୍ରହ କରିବା ସହ ନିର୍ଦ୍ଦିଷ୍ଟ ସ୍ଥାନରେ ବିସ୍ଫୋରଣ କରିବାକୁ ଦାୟିତ୍ୱ ଦିଆଯାଇଥିଲା। ପ୍ରାଥମିକ ତଦନ୍ତରୁ ଜଣାପଡିଛି ଯେ ଅଭିଯୁକ୍ତମାନେ ରାଜ୍ୟ ସାରା ବିସ୍ଫୋରକ ସଂଗ୍ରହ, ବିତରଣ କରିବା ଏବଂ ଆତଙ୍କବାଦୀ ଆକ୍ରମଣ ଘଟାଇବାରେ ସମ୍ପୃକ୍ତ ଥିଲେ। ସେମାନଙ୍କର ଲରେନ୍ସ ବିଷ୍ନୋଇ ଗ୍ୟାଙ୍ଗ ସହିତ ସମ୍ପର୍କ ଥିବା ମଧ୍ୟ ଜଣାପଡିଛି। ପୂର୍ବରୁ ଗିରଫ ହୋଇଥିବା ପଞ୍ଜାବ, ହରିୟାଣା ଏବଂ ବିହାରର 3 ଜଣ ଆତଙ୍କବାଦୀଙ୍କୁ ପଚରାଉଚରା ସମୟରେ ମିଳିଥିବା ସୂଚନା ଆଧାରରେ ଏହି ଜାଲ ବିଛାଯାଇଥିଲା। ଆତଙ୍କବାଦୀମାନେ ପୋଲିସ ଉପରେ ଗୁଳି ଚଳାଇଥିଲେ। ପାଲଟା ଗୁଳିଚାଳନା ସମୟରେ ସେମାନଙ୍କ ମଧ୍ୟରୁ ଜଣଙ୍କୁ 3ଟି ଗୁଳି ଏବଂ ଅନ୍ୟ ଜଣଙ୍କୁ ଗୋଟିଏ ଗୁଳି ବାଜିଥିଲା। ଉଭୟଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ଗୁରୁତର ଅଛି। ଉଦ୍ଧାର ହୋଇଥିବା ସାମଗ୍ରୀ ମଧ୍ୟରେ ୨ଟି ଚାଇନିଜ୍ ଗ୍ରେନେଡ୍, ୫ଟି ଚାଇନିଜ୍ ପିସ୍ତଲ ଏବଂ ୫୦ରୁ ଅଧିକ ଗୁଳି ଜବତ ହୋଇଛି।
