କେବେ ତୁଟିବ ସାର ସମସ୍ୟା ? ୟୁରିଆ ସାର ବସ୍ତାଏ ପାଇଁ ଚାଷୀ କରୁଛନ୍ତି ସଂଘର୍ଷ..
1 min read
ନନ୍ଦିଘୋଷ ବ୍ୟୁରୋ: ଚାଷ ତର ତର ବଣିଜ ମଠ । ଟିଟିଲାଗଡ ଅଞ୍ଚଳରେ ଚାଷୀ ତର ତର କଣ ହେବ ସତେ ଯେମିତି ଚାଷ କାର୍ଯ୍ୟ ଠପ ହୋଇଯାଇଛି । ସାର ଅଭାବ ଚାଷୀଙ୍କ ନିଦ ହଜାଇ ଦେଇଛି । ବର୍ତ୍ତମାନ ୟୁରିଆ ସାରର ଅଭାବ ଥିବାବେଳେ ଯାହା କେଉଁଠି କିଛି ମିଳୁଛି ତାହା ଚଢ଼ା ଦରରେ ବିକ୍ରି ହେଉଛି । ଯାହାକୁ ନେଇ ତୀବ୍ର ଅସନ୍ତୋଷ ଦେଖାଯିବା ସହ ଚାଷୀ ଲୁଣ୍ଠିତ ଶୋଷିତ ହେଉଥିବା ଅଭିଯୋଗ ହେଉଛି ।
ତୁଟୁନି ସାର ସମସ୍ୟା। ସାର ପାଇଁ ରାଜରାସ୍ତାରେ ଅନ୍ନଦାତା। ଟିଟିଲାଗଡରେ ରାଜ୍ୟ ରାଜପଥରେ ବସି ବିକ୍ଷୋଭ ପ୍ରଦର୍ଶନ । ୟୁରିଆ ସାର ବସ୍ତାଏ ପାଇଁ ଚାଷୀ କରୁଛନ୍ତି ସଂଘର୍ଷ । କ୍ଷେତ ଛାଡ଼ି ଲମ୍ବା ଲାଇନରେ ଚାଷୀ । କାରଣ ଟିଟିଲାଗଡ ଅଞ୍ଚଳରେ ବର୍ତ୍ତମାନ ଦେଖା ଦେଇଛି ୟୁରିଆ ସାରର ଘୋର ଅଭାବ । ସାର ମିଳୁନଥିବାରୁ ଚାଷ କାର୍ଯ୍ୟ ଆଗେଇ ପାରୁନି । ଚାଷୀଙ୍କୁ ଉଚିତ ସମୟରେ ବିହନ, ସାର ଓ ଜଳ ସେଚନ ବ୍ୟବସ୍ଥା ଯୋଗାଇବାରେ ସରକାର ବିଫଳ ବୋଲି କହିଛନ୍ତି ଚାଷୀ ନେତା । ଅନ୍ୟପଟେ ଚାଷୀଙ୍କୁ ସାର ବଣ୍ଟନ ନହେବା ପର୍ଯନ୍ତ ଚାଷୀମାନେ ରାଜରାସ୍ତାରେ ବସି ରହିବେ ବୋଲି ଆନ୍ଦୋଳନକାରୀ କହିଛନ୍ତି ।
ଅନ୍ୟପଟେ ଦୀର୍ଘ ଦିନ ହେଲା ସାର ମିଳୁନଥିବା ବେଳେ ଟିଟିଲାଗଡକୁ ସାର ଆସିଥିବା ଖବର ପାଇଥିଲେ ଚାଷୀ। ଏଥିପାଇଁ ଲମ୍ବା ଲାଇନରେ ଲାଗିଛନ୍ତି ଚାଷୀ । ବର୍ତ୍ତମାନ ଜମିରେ ସାର ବ୍ୟବହାର କରି ଚାଷୀ ବେଉଷଣ କରିବା ଉଚିତ ହେଲେ ବଜାରରେ ସାର ମିଳୁନି। ଫଳରେ ଚାଷ କାମ ହୋଇ ପାରୁନଥିବା ଚାଷୀମାନେ ଅଭିଯୋଗ କରିଛନ୍ତି। ଗାଁ ଗଣ୍ଡାରେ ଚଢା ଦରରେ ୟୁରିୟା ସାର ବିକ୍ରି ହେଉଥିବା ଅଭିଯୋଗ ହୋଇଛି । ସାର ଅଭାବ ଯୋଗୁଁ ଅନେକ ଅଞ୍ଚଳରେ ବାଦାମ, କପା, ଧାନ ଓ ମକା ଭଳି ଅନେକ ଫସଲ ନଷ୍ଟ ହେବାକୁ ଲାଗିଲାଣି। ତେଣୁ ସରକାର ଯଥା ଶୀଘ୍ର ସାର ଯୋଗାଇବାକୁ ଦାବି ହୋଇଛି।
ବର୍ତ୍ତମାନ ସାର ଅଭାବ ଯୋଗୁଁ ଫସଲ ନଷ୍ଟ ହେବାରେ ଲାଗିଲାଣି । ଏନେଇ ଟିଟିଲାଗଡ DAO କହିଛନ୍ତି ବଲାଙ୍ଗୀର ଜିଲ୍ଲାକୁ ପ୍ରାୟ ୩୬ ହଜାର ମେଟ୍ରିକ ଟନ ୟୁରିଆ ସାର ଦରକାର ହୋଇଥାଏ । ଏହା ମଧ୍ୟରୁ ଅଧା ଆସିଥିବାରୁ ୟୁରିଆ ସାରର ଅଭାବ ଦେଖା ଦେଇଛି । ସମସ୍ଯାର ସମାଧାନ ପାଇଁ ସରକାର ପଦକ୍ଷେପ ନେଉଛି ବୋଲି ସେ କହିଛନ୍ତି । ତେବେ କେବେ ସାର ସମସ୍ୟା ଦୂର ହେଉଛି । ଚାଷୀଙ୍କୁ ଆବଶ୍ୟକ ମୁତାବକ ସାର କେବେ ଯୋଗାଉଛନ୍ତି ସରକାର ତା ଉପରେ ରହିଛି ନଜର।
