ନୂଆଦିଲ୍ଲୀ: ଦିନକୁ ଦିନ ବ୍ଯାପୁଛି ଚାଷୀ ଆନ୍ଦୋଳନର ନିଆଁ। ପଞ୍ଜାବ- ହରିଆଣା ସୀମା ଖାନାଉରିରେ ଜଣେ ଆନ୍ଦୋଳନକାରୀଙ୍କ ମୃତ୍ଯୁ ନେଇ ବଢିଛି ବିବାଦ। ହତ୍ଯା ମାମଲା ରୁଜୁ କରିବାକୁ ଦାବି କରିଛନ୍ତି କୃଷକ ସଂଗଠନ। ଆଜି କଳାଦିବସ ପାଳିବା ଲାଗି କେନ୍ଦ୍ରୀୟ ଟ୍ରେଡ ୟୁନିଅନ ପକ୍ଷରୁ ଘୋଷଣା କରାଯାଇଥିବା ବେଳେ ମୃତ୍ଯୁ ପ୍ରତିବାଦରେ ଆଜି ବି ପଞ୍ଜାବ-ହରିଆଣା ହାଇକୋର୍ଟ ବାର୍ ଆସୋସିଏସନର କାର୍ଯ୍ୟବନ୍ଦ ଡାକରା ଦିଆଯାଇଛି।
ହରିଆଣାର ଖାନାଉରୀ ସୀମାରେ ଜଣେ ଚାଷୀଙ୍କ ମୃତ୍ୟୁକୁ ନେଇ ପୋଲିସ ଉପରେ ଦୋଷ ଦେଇଥିଲା ଅଲ ଇଣ୍ଡିଆ କିଷାନ ସଭା। ଚାଷୀ ମୃତ୍ୟୁକୁ ନେଇ ପୋଲିସ ଓ କେନ୍ଦ୍ର ସରକାରଙ୍କ ଉପରେ ଦୋଷ ଲଦିଥିଲେ ଚାଷୀ ସଂଗଠନ। ବୁଧବାର ‘ଦିଲ୍ଲୀ ଚଲୋ’ ଅଭିଯାନ ଜୋର ଧରିବା ପରେ ପୋଲିସ ପକ୍ଷରୁ ଲୁହ ବୁହା ଗ୍ଯାସ ପ୍ରୟୋଗ କରାଯାଇଥିଲା। ଶହ ଶହ ଟ୍ରାକ୍ଟର ଓ କାର ଦିଲ୍ଲୀ ଅଭିମୁଖେ ବାହାରିବା ଯୋଗୁଁ ସ୍ଥିତି ସଂଗୀନ ହୋଇଥିଲା। କେନ୍ଦ୍ର ସରକାରଙ୍କ ଏମଏସପି ପ୍ରସ୍ତାବକୁ ଅଗ୍ରାହ୍ୟ କରିଆସୁଛନ୍ତି ଚାଷୀ ସଂଗଠନ।
