୯୦ ବର୍ଷରେ ପଦାର୍ପଣ କଲେ ଡ. ମନମୋହନ ସିଂହ, ଅଭିନନ୍ଦନ ଜଣାଇଲେ ରାହୁଲ ଓ ପ୍ରଧାନମନ୍ତ୍ରୀ ମୋଦୀ

ନୂଆଦିଲ୍ଲୀ: ଭାରତର ପୂର୍ବତନ ପ୍ରଧାନମନ୍ତ୍ରୀ ତଥା ବିଶିଷ୍ଠ ଅର୍ଥଶାସ୍ତ୍ରୀ ମନମୋହନ ସିଂହ ଆଜି ୯୦ ବର୍ଷରେ ପଦାର୍ପଣ କରିଛନ୍ତି । ଜନ୍ମଦିବସ ଅବସରରେ ବିଶିଷ୍ଟ ବ୍ୟକ୍ତିମାନେ ତାଙ୍କୁ ଶୁଭେଚ୍ଛା ଓ ଅଭିନନନ୍ଦନ ଜଣାଇବା ସହ ତାଙ୍କ ଦୀର୍ଘାୟୁ ହେବାର କାମନା କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଶୁଭେଚ୍ଛା ଜଣାଇଛନ୍ତି । ଟ୍ୱିଟ କରି ପ୍ରଧାନମନ୍ତ୍ରୀ ଲେଖିଛନ୍ତି, ପୂର୍ବତନ ପ୍ରଧାନମନ୍ତ୍ରୀ ଡ. ମନମୋହନ ସିଂହଙ୍କୁ ଜନ୍ମଦିନର ଅଭିନନ୍ଦନ । ତାଙ୍କର ଦୀର୍ଘାୟୁ ଏବଂ ସୁସ୍ଥ ଜୀବନ ପାଇଁ ପ୍ରାର୍ଥନା କରୁଛି ।

ସେହିପରି କଂଗ୍ରେସ ନେତା ରାହୁଲ ଗାନ୍ଧି ମଧ୍ୟ ମନମୋହନଙ୍କୁ ଜନ୍ମଦିନର ଅଭିନନ୍ଦନ ଜଣାଇଛନ୍ତି । ଟ୍ୱିଟ କରି ରାହୁଲ ଲେଖିଛନ୍ତି, ଭାରତର ଶ୍ରେଷ୍ଠ ରାଜନେତାମାନଙ୍କ ମଧ୍ୟରୁ ଜଣେ, ଡ. ମନମୋହନ ସିଂହଙ୍କୁ ଜନ୍ମଦିନର ଅନେକ ଅନେକ ଅଭିନନ୍ଦନ । ଭାରତର ବିକାଶରେ ତାଙ୍କର ବିନମ୍ରତା, ସମର୍ପଣ ଏବଂ ଯୋଗଦାନରେ କିଛି ସମାନତା ରହିଛି । ସେ ମୋ ପାଇଁ ଏବଂ ଅନ୍ୟ କୋଟି କୋଟି ଭାରତୀୟ ପାଇଁ ଏକ ପ୍ରେରଣା ଅଟନ୍ତି । ତାଙ୍କ ଉତ୍ତମ ସ୍ୱାସ୍ଥ୍ୟ ଏବଂ ଖୁସି ପାଇଁ ପ୍ରାର୍ଥନା କରୁଛି ।

ମନମୋହନ ସିଂହଙ୍କ ଜନ୍ମଦିନ ଭାରତ ବିଭାଜନ ପୂର୍ବରୁ ୨୬ ସେପ୍ଟେମ୍ବର ୧୯୩୨ ରେ ପଞ୍ଜାବର ଗାହ ଗାଁରେ ହୋଇଥିଲା । ସେ ପଞ୍ଜାବ ବିଶ୍ୱବିଦ୍ୟାଳୟ, କେମ୍ବ୍ରିଜ ଏବଂ ଅକ୍ସଫୋର୍ଡରେ ଅଧ୍ୟୟନ କରିଥିଲେ । ଲଗାତାର ଦୁଇଥର ୨୦୦୪-୨୦୧୪ ପର୍ଯ୍ୟନ୍ତ ଭାରତର ପ୍ରଧାନମନ୍ତ୍ରୀ ରହିଥିଲେ । ଆଜି ୯୦ ବର୍ଷରେ ସେ ପଦାର୍ପଣ କରିଛନ୍ତି । ସେ ଜଣେ ବିଶିଷ୍ଟ ଅର୍ଥଶାସ୍ତ୍ରୀ ଅଟନ୍ତି,  ୧୯୯୦ ଦଶକରେ ଅର୍ଥନୀତିକୁ ସୁଧାରିବା ପାଇଁ ତାଙ୍କର କାର୍ଯ୍ୟ ଉଲ୍ଲେଖନୀୟ ଥିଲା ।