ବାଦୁଡ଼ିଙ୍କ ପାଇଁ ସ୍ବର୍ଗ ହରେକୃଷ୍ଣଙ୍କ ବାଡ଼ି, ପୂରା ପରିବାର ଦେଉଛନ୍ତି ସୁରକ୍ଷା
ସିମୁଳିଆ: ଗଛ ଡାଳରେ ଝୁଲିଛନ୍ତି ହଜାର ହଜାର ବାଦୁଡି। ବର୍ଷେ କି ଦୁଇ ବର୍ଷ ନୁହେଁ, ୨ ଶହ ବର୍ଷରୁ ଊର୍ଦ୍ଧ୍ବ ହେବ ଗଛ ଡାଳରେ ବସା ବାନ୍ଧି ରହିଛନ୍ତି । କେବେ ତେନ୍ତୁଳି ଗଛରେ, ତ ଆଉ କେବେ ଆମ୍ବ ଗଛରେ । ସୁରକ୍ଷା ଦେଉଛନ୍ତି ଗୋଟିଏ ପରିବାର ।
ରାତି ପାହିବାଠାରୁ ଆରମ୍ଭ କରି ସନ୍ଧ୍ୟା ଗଡିବା ପର୍ଯ୍ୟନ୍ତ କିଚିରି ମିଚିରି ଶଦ୍ଧରେ କମ୍ପୁଛି ପୁରା ପରିବେଶ । ସତେ ଯେପରି କୌଣସି ଏକ ଚିଡିଆଖାନା । ବିଲେଶ୍ବର ଜିଲ୍ଲା ସିମୁଳିଆ ଖଇରା ବ୍ଲକ ସାରଡାଙ୍ଗ ଗାଁର ହରେକୃଷ୍ଣ ଦାଶଙ୍କ ଘର । ଘର ପାଖରେ ଥିବା ବିଭିନ୍ନ ଗଛରେ ବସା ବାନ୍ଧିଛନ୍ତି ବାଦୁଡି । ହଜାର ହଜାର ବାଦୁଡି ଏଠାରେ ରହୁଥିବା ଦେଖିବାକୁ ମିଳେ । ବାଦୁଡ଼ିଙ୍କୁ ଧରିବାକୁ ଶିକାରୀ ଜାଲ ବସାଉଥିବା ବେଳେ ହରେକୃଷ୍ଣଙ୍କ ପୁଅ ଶରତସେସବୁ ଜାଲ କାଟି ଦେବା ସହ ଥାନାରେ ମଧ୍ୟ ଅଭିଯୋଗ କରିଥାନ୍ତି । ଖରାଦିନରେ ବାଦୁଡି ପାଣି ପିଇବା ପାଇ ଗଛ ଡାଳରେ ପାଣି ବାଲତି ବାନ୍ଧିଛନ୍ତି ପରିବାର ଲୋକେ ।
ଗ୍ରୀଷ୍ମ ପ୍ରବାହ ବଢୁଥିବା ବେଳେ ପାଣି ପାଇଁ ଡହଳବିକଳ ହେଉଛନ୍ତି ବାଦୁଡି । ଯାହାକି ବଂଶବୃଦ୍ଧି କରିବା ପରିବର୍ତ୍ତେ ହ୍ରାସ ପାଉଛି । ପ୍ରତିଟି ପ୍ରତିକୂଳ ପରିବେଶରେ ନିଜକୁ ବଞ୍ଚିବା ପାଇଁ ସଂଘର୍ଷ କରୁଥିବା ବାଦୁଡି ଲୋପ ପାଇବାକୁ ବସିଲାଣି । ବନବିଭାଗ ସହିତ ସରକାର ଏଥିପ୍ରତି ଦୃଷ୍ଟି ଦେଲେ ବିଲପ୍ତ ହେବାକୁ ବସିଥିବା ବାଦୁଡି ପ୍ରଜାତିକୁ ସୁରକ୍ଷା ମିଳିପାରିବ ।
ବାଦୁଡିଙ୍କ ସୁରକ୍ଷା ହରେକୃଷ୍ଣ କରୁଥିବାକୁ ସ୍ଥାନୀୟ ଲୋକେ ଏହାକୁ ପ୍ରଶଂସା କରୁଛନ୍ତି । ବିଲପ୍ତ ହେବାକୁ ବସିଥିବା ଏହି ସ୍ତନ୍ୟପାୟୀ ପ୍ରାଣୀଙ୍କୁ ସୁରକ୍ଷା ଦେବାକୁ ସାଧାରଣରେ ଦାବି ହେଉଛି ।
