ଆମେରିକାରେ ୧୫ଟି ପ୍ରଜାତନ୍ତ୍ର ଓ ଗୋଟିଏ ଟେରିଟୋରୀରେ ଆଜି ନିର୍ବାଚନ
ୱାଶିଂଟନ: ଆଜି ଆମେରିକା ଲାଗି ସୁପରଟିଉଜ ଡେ। ପୂର୍ବତନ ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ ନିକ୍କି ହାଲେଙ୍କ ଲାଗି ଅଗ୍ନି ପରୀକ୍ଷା। ୧୫ଟି ପ୍ରଜାତନ୍ତ୍ର ଓ ଗୋଟିଏ ଟେରିଟୋରୀରେ ଆଜି ନିର୍ବାଚନ। ରିପବ୍ଲିକାନ ଦଳ ପକ୍ଷରୁ ପ୍ରାର୍ଥୀ ହେବାକୁ ଯାଉଥିବା ଟ୍ରମ୍ପଙ୍କ ବିଜୟ ସମ୍ଭାବନା ଉଜ୍ବଳ ରହିଛି। ସାଉଥ କାରୋଲିନାର ପୂର୍ବତନ ଗଭର୍ଣ୍ଣର ତଥା ରିପବ୍ଲିକାନ ପ୍ରାର୍ଥୀ ନିକ୍କି ହାଲେଙ୍କ ସହ କଡ଼ା ମୁକାବିଲା ହେବ।
ଏହି ନିର୍ବାଚନ ଉଭୟ ପ୍ରାର୍ଥୀଙ୍କ ଲାଗି ଅଗ୍ନିପରୀକ୍ଷାର ଦିନ ବୋଲି କୁହାଯାଉଛି । ତେବେ ମାର୍ଚ୍ଚ ୩ ନିର୍ବାଚନରେ ୱାଶିଂଟନ ଡିସିରେ ବିଜୟ ହାସଲ କରି ଟ୍ରମ୍ପଙ୍କୁ ଚାଲେଞ୍ଜ ଦେଇଛନ୍ତି ନିକ୍କି ହାଲେ। ଆଲାବାମା, ଆଲାସ୍କା, କାଲିଫର୍ଣ୍ଣିଆ, କୋଲରାଡୋ, ମାସାଚୁସେଟେସ, ନର୍ଥ କାରୋଲିନା, ଟେକ୍ସାସ, ଭିର୍ଜିନିଆ ଆଦି ପ୍ରଜାତନ୍ତ୍ରରେ ଏହି ନିର୍ବାଚନ ହେବ। ଗତ ମାର୍ଚ୍ଚ ୨ ତାରିଖ ନିର୍ବାଚନରେ ତିନିଟି ପ୍ରଜାତନ୍ତ୍ର ମିଚିଗାଁ, ଇଡାହୋ ଓ ମିସୋରୀରେ ନିକ୍କି ହାଲେଙ୍କୁ ପରାସ୍ତ କରିଥିଲେ ଟ୍ରମ୍ପ।
ଗତ ଫେବୃଆରୀ ୨୫ ତାରିଖରେ ସାଉଥ କାରୋଲିନା ରିପବ୍ଲିକାନ ଚୟନ ପ୍ରକ୍ରିୟାରେ ବିଜୟୀ ହୋଇଥିଲେ ଟ୍ରମ୍ପ । କ୍ରମାଗତ ୭୭ ବର୍ଷ ବୟସ୍କ ଟ୍ରମ୍ପଙ୍କ ମାନସିକ ଅବସ୍ଥାକୁ ସମାଲୋଚନା କରିଆସୁଛନ୍ତି ହାଲେ । ଯଦି ଟ୍ରମ୍ପ ପୁଣି ରାଷ୍ଟ୍ରପତି ହୁଅନ୍ତି ତେବେ ଅସ୍ଥିରତା ସୃଷ୍ଟି ହେବ ବୋଲି ସେ ସତର୍କ କରାଇଆସୁଛନ୍ତି । ୨୦୧୦ରେ ସାଉଥ କାରୋଲିନାରେ ଗଭର୍ଣ୍ଣର ଥିବା ହାଲେ ନିଜ ରାଜ୍ୟରେ ଦଳୀୟ ପରାଜୟ ବରଣ କରିଥିଲେ । ପୂର୍ବରୁ ଇଓ୍ବା, ନ୍ୟୁ ହାମ୍ପସାୟାର ଓ ନେଭାଦାରେ ଟ୍ରମ୍ପ ବିଜୟ ହାସଲ କରିସାରିଛନ୍ତି । ଆସନ୍ତା ନଭେମ୍ବର ୫ରେ ଦେଶରେ ରାଷ୍ଟ୍ରପତି ନିର୍ବାଚନ ହେବ । ୨୦୨୧ ଜାନୁଆରୀ ୬ରେ କାପିଟଲ ହିଂସାକାଣ୍ଡ ଘଟଣାରେ ଟ୍ରମ୍ପଙ୍କ ଭାଗ୍ୟ ନେଇ ସସପେନ୍ସ ଜାରି ରହିଥିବା ସତ୍ତ୍ବେ ଦଳ ତାଙ୍କ ଉପରେ ଆସ୍ଥା ପ୍ରକଟ କରିଆସୁଛି ।
