ଢାକା : ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ଗାଦିଚ୍ଯୁତ ପଛରେ କାହାର ଥିଲା ହାତ। କାହା ଲାଗି ସାରା ବାଂଲାଦେଶରେ ଲାଗିଥିଲା ନିଆଁ। ଏହି ପ୍ରଶ୍ନ ଏବେ ବି ସାରା ବିଶ୍ବରୁ ଦୂର ହୋଇ ନଥିବାବେଳେ ଖୋଦ ଅନ୍ତରୀଣ ସରକାରର ମୁଖ୍ଯ ପ୍ରଫେସର ମହମ୍ମଦ ୟୁନୁସ କରିଛନ୍ତି ବଡ ଖୁଲାସା। ସେ କହିଛନ୍ତି ଏହି ଐତିହାସିକ ଆନ୍ଦୋଳନର ବ୍ରେନ ଥିଲେ ମହଫୁଜ ଆଲାମ। ଜାତିସଂଘ ସାଧାରଣ ଆସେମ୍ବ୍ଲି ଅଧିବେଶନ ପରିପ୍ରେକ୍ଷୀରେ ଆୟୋଜିତ କ୍ଲିଣ୍ଟନ ଗ୍ଲୋବାଲ ଇନିସିଏଟିଭରେ ଯୋଗ ଦେଇ ସେ ଦେଶରେ ଦେଖାଦେଇଥିବା ଛାତ୍ର ଆନ୍ଦୋଳନକୁ ପ୍ରଶଂସା କରିଛନ୍ତି । ମନସୁନ ରିଭଲ୍ଯୁସନ ନାମରେ ପରିଗଣିତ ହୋଇଥିବା ଛାତ୍ର ଆନ୍ଦୋଳନ ୧୬ ବର୍ଷର ଶେଖ ହସିନା ସରକାରକୁ ଗାଦିଚ୍ୟୁୁତ କରିବାରେ ସକ୍ଷମ ହୋଇଥିଲା ବୋଲି କହିଛନ୍ତି ୟୁନୁସ। ଛାତ୍ର ଆନ୍ଦୋଳନ କାଳରେ ନିଜ ଜୀବନକୁ ବିପନ୍ନ କରି ସେମାନେ ଆନ୍ଦୋଳନକୁ ଓହ୍ଲାଇଥିଲେ ।
ତେବେ ଏହି ଐତିହାସିକ ଛାତ୍ର ଆନ୍ଦୋଳନ ମୂଳରେ ତାଙ୍କର ସ୍ବତନ୍ତ୍ର ସହକାରୀ ମହଫୁଜ ଆଲାମ ହିଁ ମୁଖ୍ଯ ଭୂମିକା ନେଇଥିଲେ ବୋଲି କହିଛନ୍ତି ୟୁନୁସ । ଯଦିଓ ଏହାକୁ ଆଲାମ ଅଗ୍ରାହ୍ଯ କରିଆସୁଛନ୍ତି ତଥାପି ସେ ହିଁ ଆନ୍ଦୋଳନର ବ୍ରେନ ଥିଲେ ବୋଲି ସେ କହିଛନ୍ତି । ତେବେ ସରକାର ବିରୋଧରେ ହୋଇଥିବା ଜାଗରଣ ଆକସ୍ମିକ ନଥିଲା ବରଂ କ୍ରମାଗତ ଅସନ୍ତୋଷର ଫଳ ଥିଲା ବୋଲି ସେ କହିଛନ୍ତି । ବିବାଦୀୟ ସଂରକ୍ଷଣ ନୀତି ବିରୋଧରେ ବାଂଲାଦେଶର ଛାତ୍ରଆନ୍ଦୋଳନ ଗତ ଜୁଲାଇରେ ଆରମ୍ଭ ହୋଇଥିଲା। ଶେଖ ହସିନାଙ୍କ ଇସ୍ତଫା ପରେ ଥମିଥିଲା ଆନ୍ଦୋଳନ । ଅନ୍ତରୀଣ ସରକାରର ମୁଖ୍ଯ ହେବା ପରେ ୟୁନୁସଙ୍କ ସହଯୋଗୀ ଭାବେ ଆଲାମଙ୍କୁ ନିଯୁକ୍ତ ଦିଆଯାଇଥିଲା।
